جاستار كورگەنىنە ەلىكتەيدى. سوندىقتان, ىرىسى مەن ىنتىماعى ۇيىعان, بەرەكەسى مەن مەرەكەسى تاۋسىلماعان, باقىتتى, ابىرويلى وتباسىلاردى ۇلگى ەتىپ, ەل الدىنا شىعارۋ – يگىلىكتى شارا.
ەشە وقۋشىلار سارايىندا وتكەن استانا قالالىق «مەرەيلى وتباسى» بايقاۋىنىڭ جەڭىمپازدارىن ماراپاتتاۋ سالتاناتىندا قالالىق ارداگەرلەر كەڭەسىنىڭ توراعاسى امانگەلدى سىزدىقوۆ وسىلاي دەدى.
راسىندا دا, ۋىعى بەرىك, كەرەگەسى كەڭ, شاڭىراعى بيىك, باقىتتى وتباسىنىڭ كوپ بولۋى – مەملەكەت دامۋىنىڭ العىشارتى. سوندىقتان دا, ەلباسى نۇرسۇلتان نازارباەۆ وتكەن جىلدان باستاپ ەلىمىزدە «مەرەيلى وتباسى» ۇلتتىق بايقاۋى تۇراقتى وتۋىنە مۇرىندىق بولعان ەدى.
بالا تاربيەسىن ۋىسىنان شىعارماعان وتباسى ينستيتۋتىن نىعايتا تۇسەتىن بۇل بايقاۋ, الەۋمەتتانۋشىلاردىڭ تىلىمەن ايتقاندا, ادام جانىنا جىلىلىق ۇيالاتاتىن, ەڭ شىنايى, ەڭ ونەگەلى, يگى باستاما بولعان. سونىڭ دالەلى شىعار, وعان قاتىسۋعا نيەتتى ازاماتتاردىڭ دا قاتارى كوبەيىپ كەلەدى ەكەن.
ناقتىراق ايتساق, استانا قالاسىنىڭ وزىندە, وتكەن 2014 جىلى العاش رەت «مەرەيلى وتباسى» بايقاۋى وتكىزىلگەندە بۇل شاراعا 44 وتباسى قاتىسقان. ال بيىلعى بايقاۋ جاريالانىسىمەن قۇجاتتارىن جيناپ, تاپسىرىپ ۇلگەرگەن 51
وتباسى بايقاۋدىڭ مەرەيلى بيىگىنە, ياعني, تالاپتارىنا ساي كەلىپتى.
سونىمەن, استانا جۇرتشىلىعى ەكىنشى رەت وتكىزىلگەن «مەرەيلى وتباسى» بايقاۋىنىڭ جۇلدەگەرلەرىمەن تانىسۋعا مۇمكىندىك الدى.
بايقاۋ قورىتىندىسى بويىنشا, وتاناسى ۇلتتىق قولونەردى جالعاستىرىپ, وتاعاسى بىلىكتىلىگى مەن تاجىريبيەلىلىگى ارقاسىندا تالايدى دەرتىنەن ايىقتىرىپ, تالاي ءومىردى جالعاپ كەلە جاتقان دۇيسەنباەۆتار وتباسى جانە ەكى بىردەي مۇگەدەك بالانى ايالاپ ءوسىرىپ, جالپى بەس بالا تاربيەلەپ وتىرعان قايىرىمدى جانۇيا رۋبلەۆسكيلەر وتباسى ءۇشىنشى ورىنعا لايىق دەپ تابىلدى. بۇل جۇلدەگەرلەرگە استانا قالالىق ارداگەرلەر كەڭەسىنىڭ توراعاسى امانگەلدى سىزدىقوۆ قالا اكىمدىگىنىڭ ديپلومى مەن ارنايى سىيلىعىن تابىستادى.
اتا-اناسىنان باستاپ, بالا-شاعاسىنا دەيىن ستول تەننيسىن سەرىك ەتكەن گەراسيمەنكولار مەن ون بالا, جيىرما التى نەمەرە, ءبىر شوبەرە ءسۇيىپ, ءۇبىرلى-ءشۇبىرلى, بەرەكەلى قازاق جانۇياسىنىڭ ۇلگىسىن كورسەتىپ كەلە جاتقان وەكەنەۆتەر ەكىنشى ورىندى يەلەندى. ساحنانى تولتىرىپ, كوز قۋانتقان وەكەنەۆتەر مەن گەراسيمەنكولارعا ديپلوم مەن سىيلىعىن پرەزيدەنت جانىنداعى استانا قالالىق وتباسى جانە ايەلدەر ىستەرى جونىندەگى كوميسسيانىڭ حاتشىسى ريما يمانعازيەۆا تابىستادى.
ال ءبىرىنشى ورىن وسىدان ون بەس جىلداي بۇرىن ساحناعا قامشى ۇستاپ شىعىپ, جاياۋ مۇسانىڭ «اقسيسا» ءانىن ورىنداعان ۇلدارىمەن-اق فاميلياسى تانىمال بولعان ونەرپازدار وتباسى – جۇگىنىسوۆتەر مەن سپورتتا تالاي ەلدە قازاق نامىسىن قورعاپ جۇرگەن ەلەۋسىنوۆتەر وتباسىنا بەرىلدى. ءبىرىنشى ورىن يەلەرىنە جۇلدەسىن تابىستاعان قر پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى,
«وتباسىم» جۋرنالىنىڭ باس رەداكتورى شولپان سىزدىقوۆا جەڭىمپازداردىڭ ەندى رەسپۋبليكا بويىنشا وتەتىن «مەرەيلى وتباسى» ۇلتتىق بايقاۋىنا قاتىساتىنىن مالىمدەدى. سونىمەن قاتار, كورسەتكەن ۇلگى-ونەگەسى مەن جيعان ابىرويىمەن قاتارىنان وزعان ەكى
وتباسىنا استانا اكىمدىگىنىڭ ارنايى ديپلومى جانە شاڭىراقتىڭ ۇلكەندەرىنە الەمنىڭ كەز كەلگەن ەلىنە بارىپ, دەم الۋعا جولداما بەرىلگەنىن اتاپ ءوتتى.
سالتاناتتى كەش وتباسىلىق توپپەن جانە
دۋەتپەن ورىندالعان تاماشا اندەرمەن كورىكتەنە ءتۇستى.
ءنازيرا سايلاۋقىزى
