23 قاراشادان باستاپ ەلىمىزدىڭ بارلىق كينوتەاترلارىندا «كوكونىڭ قۇپياسى» اتتى ديسنەيلىك ءمۋلتفيلمىن تاماشالاي الاسىزدار. قازاق تىلىندە. ءيا, بۇل – «بولاشاق» قاۋىمداستىعىنىڭ باستاماسىمەن وسىمەن 23-رەت قازاقشا دۋبلياجدالىپ وتىرعان انيماتسيالىق فيلم.
ميگەل ەسىمدى مەكسيكالىق بالانىڭ باسىنان وتكەن حيكايا ەشكىمدى بەي-جاي قالدىرمايدى. قاشان دا وتباسىلىق قۇندىلىقتاردى دارىپتەيتىن «ديسنەي» بۇل جولى «ءولى رازى بولماي, ءتىرى بايىمايدى» دەگەندى العا تارتادى. سيۋجەت جەلىسى بويىنشا, ميگەل تانىمال مۋزىكانت بولۋدى ارماندايدى. الايدا ءۇي-ءىشى وعان تۇبەگەيلى قارسى. كەزىندە ءان ايتىپ, بي بيلەپ, وتباسىن ونەرىمەن اسىراپ جۇرگەن اتاسى ءبىر كۇنى ۇيىنە ورالمايدى. «ول ءبىزدى تاستاپ كەتتى» دەپ توپشالاعان ەميلدا اجە ۇيدەگى بار مۋزىكالىق اسپاپتاردى دالاعا لاقتىرىپ تاستاپ, اياق-كيىم تىگۋگە بىلەك سىبانا كىرىسەدى. كاسىپ ۇرپاقتان ۇرپاققا جالعاسادى. مىنە, وسى تۇستان باستاپ اۋلەتتىڭ قالىپتاسقان قاعيداسى بويىنشا ەشكىمنىڭ مۋزىكامەن اينالىسۋىنا رۇقسات بەرىلمەيدى. مۋزىكانىڭ كەسىرىنەن كۇيەۋىنەن ايىرىلعان ەميلدا اجەنىڭ قىزى كوكو قۇپياسىن نەمەرەسى اشۋعا تىرىسادى.
دۋبلياج رەجيسسەرى رەتىندە استانالىق ءارتىس شاح-مۇرات ورداباەۆ تاڭدالىنىپ الىندى. ال 12 جاسار ميگەلدىڭ داۋىسىن ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرلەرى نۇركەن وتەۋىلوۆ جانە اينۇر بەرمۇحامبەتوۆانىڭ ۇلدارى اقارىس ءاشىمحان سالدى.
«اقشامنىڭ» انىقتاماسى:
• جوباعا تارتىلعان ەڭ جاس ءارتىس – اقارىس ءاشىمحان 12 جاستا, ال جاسى ەڭ ۇلكەن ءارتىس, قر حالىق ءارتىسى, پروفەسسور قۇرالاي ەشمۇراتوۆا 73 جاستا.
• ارتىستەرگە قويىلعان باستى تالاپ – مىندەتتى تۇردە ءان ايتا ءبىلۋ, سەبەبى مۋلتفيلم كەيىپكەرلەرى كۇردەلى ۆوكال پارتيالارىن ورىندايدى.
• ءوزىن سىناپ كورگەن 25 بالانىڭ ىشىنەن ۇزدىك بولىپ تانىلعان اقارىس ءاشىمحان دۋبلياجدى 5 كۇننىڭ ىشىندە جاساعان.
«جۇمىستىڭ بەس كۇنى دە ۇنادى, وتە قىزىق ءوتتى. رەجيسسەر شاحمۇرات اعانى تىڭدامايتىن كەزدەرىم دە بولدى. باستى كەيىپكەر ونەرگە جاقىن, ءان ايتقىسى كەلەدى. مۋلتفيلمدە ءتورت ءان بار, سونىڭ بارلىعىن ءوزىم ورىنداپ شىقتىم. فيلم بالالاردى دوستىققا باۋلۋ, اتا-انالاردى قۇرمەتتەۋ, اتا-بابالاردى ۇمىتپاۋعا شاقىرادى» دەيدى جاس ءارتىس.
