نۇر-سۇلتان قالاسىنىڭ اكىمى التاي كولگىنوۆ قالانىڭ ءتورت اۋدانىنداعى كوممۋنالدىق قىزمەتتەردىڭ الداعى قىسقا دايىندىعىن تەكسەردى. قىس ماۋسىمىندا جولدار مەن كوشەلەردى تازالاۋعا 2 مىڭعا جۋىق تەحنيكا مەن 3,5 مىڭ قىزمەتكەر جۇمىلدىرىلادى.
قالا باسشىسى الەۋمەتتىك نىساندارعا كىرەتىن جولداردى, تروتۋارلاردى, ايالدامالاردى تازالاۋعا ەرەكشە نازار اۋدارۋ قاجەتتىگىن اتاپ ءوتىپ, پاتەر يەلەرى كووپەراتيۆتەرىمەن بىرلەسىپ اۋلالاردى تازالاۋ جۇمىستارىن كۇشەيتۋدى تاپسىردى.
قازىرگى كەزدە قۇم-تۇز قوسپاسىن دايىنداۋ جۇمىستارى جۇرگىزىلۋدە. ەلوردا اكىمى قىزمەتكەرلەرگە جاعداي جاساۋ كەرەكتىگىن ايتىپ, جالاقىنى ۋاقىتىلى تولەۋ, ىستىق تاماق ۇيىمداستىرۋ, تەحنيكانى جاڭارتۋ سياقتى ماڭىزدى ىستەرگە توقتالدى. بيىل كوممۋنالدىق قىزمەتتەرگە قوسىمشا 100-دەن استام تەحنيكا ساتىپ الۋ جوسپارلانۋدا. ارنايى تەحنيكانى ساتىپ الۋ «استاناەنەرگوسەرۆيس» اكتسيونەرلىك قوعامىنىڭ ۇنەمدەلگەن قاراجاتى ەسەبىنەن جۇزەگە اسىرىلادى. وسىنى ايتقان ا.كولگىنوۆ قىزمەتكەرلەرگە يگى ەڭبەكتەرى ءۇشىن العىسىن جەتكىزدى.
سونداي-اق ا.كولگىنوۆ كومىر ساتىلاتىن ورىندارعا باردى. بۇگىنگى تاڭدا قالانىڭ 11 نۇكتەسىندە «قارا التىندى» ساتۋمەن 8 كومپانيا اينالىسادى. كومىردىڭ ورتاشا باعاسى جەتكىزۋدى قوسپاعاندا – 12 مىڭ تەڭگە.
ەلوردا اكىمى كومىردىڭ باعاسى مەن ساپاسىن باقىلاۋدا ۇستاپ وتىرۋدى ءارى قاراي جالعاستىرا بەرۋدى تاپسىردى. بۇگىندەرى iKomek109 قالالىق مونيتورينگ جانە جەدەل ارەكەت ەتۋ ورتالىعى جانىندا قاۋىرت جەلى قۇرىلدى. وندا ءار تۇتىنۋشى ساتۋ نۇكتەسىندەگى كومىردىڭ بار-جوعى, قانشا قورى بارىن, باعاسى مەن تۇرلەرى تۋرالى بىلە الادى. سونىمەن قاتار قالاداعى كومىرگە قاتىستى اقپارات قالا جانە اۋداندار اكىمدىكتەرىنىڭ رەسمي سايتتارى مەن الەۋمەتتىك جەلىلەرىندەگى پاراقشالارىندا جاريالانىپ وتىرادى.
