ەلوردا تۇرعىندارى تاراپىنان كوممۋنالدىق تاريف باعاسىنىڭ قىمبات ەكەنى ايتىلىپ ءجۇر. وسى جاعدايعا بايلانىستى نۇر-سۇلتان قالاسىنىڭ تۇرعىن ءۇي ورتالىعىندا كوپپاتەرلى تۇرعىن ۇيلەردى كۇتىپ ۇستاۋعا مينيمالدى ءتاريفتى بەكىتۋ بويىنشا جۇمىس توبىنىڭ العاشقى وتىرىسى ءوتىپ, تولەم باعاسىن تومەندەتۋ مۇمكىندىكتەرى قارالدى.
اتالعان شاراعا تۇرعىن ۇيگە قاتىستى ۇيىمدار مەن ونىڭ باسشىلارى, Nur Otan پارتياسىنىڭ مۇشەلەرى, «اتامەكەن» قر ۇلتتىق كاسىپكەرلەر پالاتاسىنىڭ وكىلدەرى جانە ت.ب. قاتىستى. ولار مينيمالدى تاريف باعاسىن ەنگىزۋ جايىن تالقىلادى.
«تۇرعىن ءۇي ورتالىعىندا كوپپاتەرلى تۇرعىن ۇيلەردى كۇتىپ ۇستاۋ بويىنشا مينيمالدى ءتاريفتى بەكىتۋ بويىنشا العاشقى جۇمىس توبىنىڭ وتىرىسى ءوتتى. مۇندا بارلىق تاراپتاردىڭ ۋاجدەرىن تىڭداپ, مينيمالدى تاريفتەردى بەكىتۋ بويىنشا ءبىر شەشىمگە كەلۋ ءۇشىن جينالدى. سوسىن ونى ماسليحاتقا ۇسىناتىن بولامىز. بۇل جۇمىستاردىڭ ءبارى تولىعىمەن شەشىلەدى. قازىر تۇرعىندار تاريف باعاسىن تومەندەتۋدى سۇراپ جاتىر» دەدى نۇر-سۇلتان قالاسىنىڭ تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ سارىارقا اۋدانى ينسپەكتسياسىنىڭ ءبولىم باسشىسى ەركەبۇلان كوشكىنباي.
ءىس-شاراعا جينالعاندار كوممۋنالدىق تاريف باعاسىنىڭ قىمبات ەكەنىن ايتىپ, اعىمداعى تاريف تۇرعىندارعا سالماق ءتۇسىرىپ جاتقانىن ايتتى. وسى ورايدا, الەم ەلدەرىندەگى تاريف جۇيەسىن ءسوز ەتىپ, ءۇيدىڭ شارشى مەترىنە قاراپ, تاريف باعاسىن بەكىتۋدى ۇسىندى. وسىعان بايلانىستى ءماسليحات تۇرعىنداردىڭ جاعدايىن ەسكەرۋ قاجەتتىگىن ايتتى.
«استانا تۇرعىندارىنىڭ جارتىسى باسقا وڭىرلەردە نەمەسە شەتەلگە كوشىپ كەتكەندىكتەن ۇيلەرىن جالعا بەرىپ قويعان. باعاسى 250 مىڭ تەڭگەدەن باستالادى. ال بۇل باعا تۇرعىندارعا اۋىر. سوندىقتان كوممۋنالدىق تولەمدى وتەي الماي جاتقان ادام كوپ. مەن اعىمداعى تاريفپەن جۇمىس ىستەي الماي جاتىرمىن. باعانى ءتۇسىرۋ كەرەك» دەيدى ەسىل اۋدانى بويىنشا پيك وكىلى باعيلا كلەكبارقىزى.
بىلتىر ەلوردادا تۇرعىن ءۇي سالاسىندا قىزمەت كورسەتەتىن بىرىڭعاي ورتالىق اشىلعان بولاتىن. بۇل ورتالىقتا تۇرعىن ۇيگە كەزەككە تۇرۋ, كەزەك ءنومىرىن تەكسەرۋ, تۇرعىن ءۇي باعدارلامالارىنا قاتىسۋ, تۇرعىن ءۇي سەرتيفيكاتىن الۋ, كرەديتتىك/جالعا بەرىلەتىن پاتەرلەر بويىنشا جانە ت.ب. ماسەلەلەرگە قاتىستى كەڭەس الۋعا بولادى. بۇل ورتالىق قالا تۇرعىندارى ءۇشىن ىڭعايلى, سەبەبى ولار تۇرعىن ءۇي ماسەلەلەرى بويىنشا قالانىڭ ءار اۋدانىندا ورنالاسقان ينستانتسيالارعا بارماي-اق ءبىر جەردەن كەڭەس الا الادى.
https://youtu.be/rBavS0RqxOM
