اقپان ايىندا استانالىقتار جىلۋ مەن جارىق ءۇشىن كوممۋنالدىق تۇبىرتەكتىڭ ادەتتەگىدەن اجەپتاۋىر قىمبات بولىپ كەلگەنىنە شاعىمدانىپ, ءبىراز مەكەمەنىڭ ەسىگىن توزدىردى. وسىعان وراي, تابيعي مونوپوليالاردى رەتتەۋ كوميتەتىنىڭ ەلوردالىق دەپارتامەنتى تۇرعىندارعا كوممۋنالدىق قىزمەتتەردىڭ تاريفتەرى تۋرالى تۇسىنىكتەمە بەردى.
تابيعي مونوپوليالاردى رەتتەۋ كوميتەتى ەلوردالىق دەپارتامەنتىنىڭ حابارلاماسىندا اتاپ وتىلگەندەي, جاقىندا ەلوردا تۇرعىندارى قاڭتار ايىنداعى تۇبىرتەكتەردى الىپ, جىلۋ مەن ەلەكتر ەنەرگياسى ءۇشىن تولەمدەردىڭ ارتقانىن بايقادى. ۆەدومستۆو ماماندارى ءتاريفتىڭ نەگە وسىنشا ارتقانىن تۇسىندىرۋگە تىرىستى.
«ەلوردادا جىلۋمەن جابدىقتاۋ قىزمەتىن «استاناەنەرگوسبىت» جشس كورسەتەدى. تاريف 2024 جىلعى 1 قاڭتاردان باستاپ ەڭبەكاقى تولەۋگە ارنالعان شىعىستاردىڭ ءوسۋىن, ستراتەگيالىق تاۋار قۇنىنىڭ ءوسۋىن جانە كورسەتىلەتىن قىزمەتتەر كولەمىنىڭ ۇلعايۋىن ەسكەرە وتىرىپ تۇزەتىلدى. جىلۋ ەنەرگياسىنىڭ تاريف دەڭگەيى جىلۋ ەنەرگياسىن وندىرۋگە, تاسىمالداۋعا جانە جەتكىزۋگە قاجەتتى شىعىندار دەڭگەيىنە بايلانىستى. سونىمەن قاتار جىلۋمەن جابدىقتاۋ ءتاريفىنىڭ دەڭگەيى, ەڭ الدىمەن, وتىن ءتۇرىنىڭ, اتاپ ايتساق, گاز, مازۋت, كومىر قۇنىنا بايلانىستى, ونىڭ قۇرىلىمىندا ول نەگىزگى ۇلەستى الادى. تيىسىنشە, وتىن باعاسىنىڭ وزگەرۋى, سونداي-اق ولاردى تاسىمالداۋ جىلۋمەن جابدىقتاۋدا ءتاريفتىڭ وزگەرۋىنە الىپ كەلدى» دەلىنگەن حابارلامادا.
سونداي-اق دەپارتامەنت دەرەكتەرىنە سايكەس, «استاناەنەرگوسبىت» ءتاريفىنىڭ قۇرىلىمىندا شىعىنداردىڭ 97 پايىزىن جىلۋ ەنەرگياسىن وندىرۋگە ارنالعان شىعىندار جانە جىلۋ ەنەرگياسىن بولۋگە ارنالعان شىعىندار الادى. ناتيجەسىندە وسى فاكتورلاردىڭ بارلىعىن ەسكەرە وتىرىپ, استانادا جىلۋ ءتاريفى 20 پايىزعا ءوستى. سونداي-اق سوڭعى ايدا كەلگەن تۇبىرتەككە ءتاريفتىڭ جوعارىلاۋى عانا ەمەس, سونىمەن قاتار سىرتقى اۋا تەمپەراتۋراسى جانە سونىڭ سالدارىنان تۇتىنۋ كولەمىنىڭ ارتۋى اسەر ەتكەنى اتاپ ءوتىلدى.
تابيعي مونوپوليالاردى رەتتەۋ كوميتەتىنىڭ ەلوردالىق دەپارتامەنتى جىلىتۋ كەزەڭىندە «استاناەنەرگوسبىت» جشس-ءتىڭ ەلەكتر ەنەرگياسىن بولشەك ساۋدادا وتكىزۋ بويىنشا قىزمەتتەردىڭ باعاسى وزگەرمەگەنىن جەتكىزدى.
«ەلەكتر ەنەرگياسى بويىنشا ەسەپتەۋ ەلەكتر ەنەرگياسىنىڭ ناقتى تۇتىنىلعان كولەمى ءۇشىن ەسەپتەۋ اسپاپتارىنىڭ كورسەتكىشتەرى نەگىزىندە جۇرگىزىلەدى. جەكەلەگەن جاعدايلاردا ەسەپكە الۋ قۇرالىنىڭ كورسەتكىشتەرى دۇرىس بەرىلمەۋى مۇمكىن» دەلىنگەن حابارلامادا.
تۇسىنبەۋشىلىكتەر تۋىنداي قالسا, استانالىقتار ا.پەتروۆ كوشەسى, 5-ءۇي مەكەنجايى بويىنشا نەمەسە «ە-Otinish» ازاماتتاردىڭ بارلىق ءوتىنىشىن قابىلداۋ مەن وڭدەۋدىڭ بىرىڭعاي پلاتفورماسى ارقىلى تولىق اقپارات الا الادى. تۇتىنۋشىنىڭ دالەلدەرى راستالعان جاعدايدا, دەپارتامەنت جوسپاردان تىس تەكسەرۋلەردىڭ ناتيجەسى بويىنشا شارالار قابىلدايدى.
وتكەن جىلدىڭ جازىندا استانادا جىلۋ ءتاريفىن ەكى ەسەدەن استام ارتتىرۋ جوسپارلانعانى تۋرالى حابارلانعان بولاتىن. كۇزدە قازاقستاننىڭ قاي ايماعىندا كوممۋنالدىق قىزمەتتەردىڭ باعاسى وسكەنى تۋرالى جازىلدى. سودان كەيىن ەلوردادا سۋىق سۋ 15,7 پايىزعا, سۋ بۇرۋ 15,5 پايىزعا, ەلەكتر ەنەرگياسى 7,6 پايىزعا, گازبەن جابدىقتاۋ 8 پايىزعا قىمباتتادى دەپ حابارلاندى. ورتالىق جىلىتۋ تاريفتەرى وزگەرىسسىز قالدى.
«ينۆەستيتسياعا ايىرباستاۋ ءتاريفى» باعدارلاماسى اياسىندا كوممۋنالدىق قىزمەتتەردى جەتكىزۋشىلەر باعانى كوتەرە الادى, بۇل رەتتە ولار ينفراقۇرىلىمدى رەتكە كەلتىرۋگە جانە ءوز قىزمەتكەرلەرىنىڭ ەڭبەك جاعدايىن جاقسارتۋعا مىندەتتى.
