قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا 2020 جىلدىڭ 1 قاڭتارىنان باستاپ بارلىق كوپبالالى وتباسىنا تابىسىنا قاراماستان جاردەماقى تولەنەتىنىن ءمالىم ەتتى.
ءمينيستردىڭ ايتۋىنشا, بيىلعى توعىز ايدا 417 مىڭ وتباسىنا ااك تاعايىندالعان. «ءبىز رەسپۋبليكالىق بيۋدجەتتەن جەكەلەگەن مەملەكەتتىك جاردەماقى ەنگىزۋدى جوسپارلاپ وتىرمىز. ول ەلىمىزدەگى بارلىق كوپبالالى وتباسىلارعا تولەنەدى. ورتاشا ەسەپپەن ءبىر بالاعا 10-11 مىڭ تەڭگەدەن بەرىلەدى. جالپى مولشەرى 2018 جىلدان توقتاتىلعان وسىنداي جاردەماقى مولشەرىنەن 4-7 ەسە ارتىق» دەدى مينيستر ءبىرجان نۇرىمبەتوۆ. اتاپ ايتقاندا, 4 بالاسى بار وتباسىنا – 42500 تەڭگە, 5 بالاسى بارلارعا – 53125 تەڭگە, 6 بالاسى بار ۇيگە – 63750 تەڭگە, 7 بالاسى بار وتباسىنا 73370 تەڭگە كولەمىندە جاردەماقى تولەنەتىن بولادى. ەگەر كوپبالالى وتباسى تابىس مولشەرىنە قاراي تۇرمىسى تومەن وتباسى ساناتىنا جاتسا, وندا بۇل وتباسىعا ااك-پەن قوسا بالالارعا كەپىلدى الەۋمەتتىك پاكەت تاعايىندالادى. ءسويتىپ كوپبالالى تۇرمىسى تومەن وتباسى مەملەكەت تاراپىنان ءۇش الەۋمەتتىك كومەك پاكەتىنە يە بولادى.
سونىمەن بىرگە مينيستر ااك الاتىن ەڭبەككە قابىلەتتى وتباسى مۇشەلەرى جۇمىس ىستەۋى ءتيىس ەكەنىن اتاپ ءوتتى. ەگەر ۇسىنىلعان جۇمىستان نەمەسە جۇمىسپەن قامتۋ شاراسىنان باس تارتاتىن بولسا, وندا تەك وعان عانا ەمەس, بۇكىل وتباسىعا تولەم توقتاتىلادى. ولاردى جۇمىسقا ورنالاستىرۋ ءۇشىن ناتيجەلى جۇمىسپەن قامتۋدا, كاسىپكەرلىكتى دامىتۋدا «ەڭبەك» مەملەكەتتىك باعدارلاماسىنىڭ بارلىق مەحانيزمدەرى پايدالانىلاتىن بولادى. «مەكتەپكە دەيىنگى جاستاعى بالالار ءۇشىن بالالار تاعام, گيگيەنالىق قۇرالدار, ءبىلىم بەرۋ قىزمەتتەرى ۇسىنىلادى. مەكتەپ جاسىنداعى بالالار ءۇشىن ىستىق تاماق, مەكتەپ كيىمدەرى, جول شىعىنىن تولەۋ, مەديتسينالىق قىزمەت كورسەتۋ قاراستىرىلعان» دەدى مينيستر. الماتىنىڭ بارلىق اۋدانىندا ۇكىمەتتىك ەمەس ۇيىمدار تاراپىنان قۇرىلعان «باقىتتى وتباسى» ورتالىقتارىندا انالارى كۋرستان ءوتىپ جاتقاندا بالالاردىڭ قاراۋسىز قالماۋىنا جاعداي جاسالعان. كۋرستان وتكەن انالارعا كاسىبىن جۇرگىزۋگە قايتارىمسىز گرانتتار بەرىلمەك. ب.نۇرىمبەتوۆ قر ەڭبەك مينيسترلىگى ارقىلى ءاربىر وتباسىنىڭ الەۋمەتتىك كارتاسى جاسالعانىن, ول مەملەكەتتىك ورگانداردىڭ اقپاراتتىق جۇيەلەرىنەن اۆتوماتتاندىرىلعان دەرەكتەر نەگىزىندە وتباسىلاردىڭ ناقتى مارتەبەسىن انىقتاۋعا مۇمكىندىك بەرەتىنىن اتاپ ءوتتى.
جادىرا شامۇراتوۆا
