نۇر-سۇلتان قالاسىنىڭ اكىمى باقىت سۇلتانوۆ كوپبالالى انالارمەن كەزدەستى. سونىمەن قاتار جيىنعا ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ پەن ءبىلىم جانە عىلىم ۆيتسە-ءمينيسترى بيبىگۇل اسىلوۆا, دەنساۋلىق ساقتاۋ ۆيتسە-ءمينيسترى ولجاس ابىشەۆ, يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ قاتىستى.
ءوزىنىڭ بايانداماسىندا ەلوردالىق كوپبالالى انالاردى قولداۋعا ارنالعان 13 الەۋمەتتىك شارا تۋرالى كەڭىنەن ايتقان قالا باسشىسى شاھاردىڭ شەتكى ايماقتارىنىڭ جاعدايىنا دا توقتالىپ ءوتتى.
– ەلىمىزدەگى 3 ءىرى مەگاپوليستىڭ شەتكى ايماقتارىن اباتتاندىرۋ بويىنشا رەسپۋبليكالىق بيۋدجەتتەن قارجى قاراستىرىلادى. بۇل تۇرعىدا ەلوردانىڭ شەتكى ايماقتارىن اباتتاندىرۋعا رەسپۋبليكالىق بيۋدجەتتەن قوسىمشا 7,5 ميلليارد تەڭگە ءبولىنىپ وتىر. وسى قارجىعا 4 اۋداندا 4 سپورت كەشەنى مەن مەكتەپتەر سالىنىپ, جولدار جوندەلەتىن بولادى. جالپى, اتالعان باعدارلاما بويىنشا 130 مىڭعا جۋىق ادام الەۋمەتتىك كومەكپەن قامتىلادى, – دەدى ول.
ءوز كەزەگىندە مينيستر بەردىبەك ساپارباەۆ ءبىلىم, دەنساۋلىق, مادەنيەت جانە سپورت, الەۋمەتتىك سالا ماماندارىنىڭ جالاقىسى 15 پايىزدان 30 پايىزعا دەيىن ارتاتىنىن جەتكىزدى.
– اتاۋلى الەۋمەتتىك كومەك جاڭا فورماتتا تولەنەتىن بولادى. اتاپ ايتقاندا, بۇرىن كۇنكورىس دەڭگەيىندەگى جالاقىنىڭ 50 پايىزى تولەنسە, 1 ساۋىردەن باستاپ ول 70 پايىزعا كوتەرىلەدى. مىسالى, بۇعان دەيىن وزگە وڭىردەگىلەر ءۇشىن اتاۋلى الەۋمەتتىك كومەك كولەمى 14849 تەڭگە بولسا, ەندى ول 20789 تەڭگەگە ۇلعايادى. ال ەلوردالىقتار ءۇشىن 15499 تەڭگەدەن 21698 تەڭگەگە كوبەيەدى. سەبەبى باسقا ايماقتارمەن سالىستىرعاندا استانالىقتاردىڭ تابىسى جوعارى. وسى كومەكپەن 830 مىڭعا جۋىق قازاقستاندىقتى قامتۋ جوسپاردا بار. سونىڭ ىشىندە ەلوردالىقتار سانى 6699-عا جەتەدى دەپ كوزدەلۋدە. ال 18 جاسقا دەيىنگى ءار بالاعا تولەنەتىن جاردەماقى 4834 تەڭگەدەن 20789 تەڭگەگە ارتادى. ەگەر بالالاردىڭ ءبىرى ستۋدەنت بولسا, ول 23 جاسقا دەيىن وسىنداي جاردەماقىنى الۋعا قۇقىعى بار, – دەدى ەڭبەك جانە حالىقتى الەۋمەتتىك قورعاۋ ءمينيسترى.
ال مارحابات جايىمبەتوۆ كوپبالالى وتباسىلاردىڭ باسپانالى بولۋعا قانداي مۇمكىندىكتەرى بار ەكەنىن ەگجەي-تەگجەيلى ءتۇسىندىردى. ونىڭ ايتۋىنشا, 7 جىل ىشىندە قازىنادان 350 ملرد تەڭگە قارجى ءبولىنىپ, ەلىمىز بويىنشا 42 مىڭ, ال باس قالادا 4107 پاتەر سالىنادى دەپ جوسپارلانۋدا.
جيىن بارىسىندا كوپبالالى انالار سپيكەرلەرگە باسپانا ماسەلەسى مەن تۇرعىن ۇيگە كەزەككە تۇرۋ جانە بالاباقشاعا قاتىستى ساۋالدارىن قويدى. التى بالانىڭ اناسى ايسۇلۋ ەشەنحان ءۇيىنىڭ جانىنداعى مەملەكەتتىك بالاباقشادا ورىن بولماعاندىقتان, قالانىڭ ەكىنشى جاعىنا جولداما بەرىلگەنىن, الايدا الىسقا اپارۋ وعان ءتيىمسىز ەكەنىن ايتىپ, شاھار باسشىسىنان وسى ماسەلەنى ءبىرجاقتى ەتۋىن سۇرادى.
– بالاباقشالارعا جولداما تۇرعىلىقتى مەكەنجايى بويىنشا بەرىلۋى ءتيىس. بۇل تەك اتا-انالار مەن بالالار ءۇشىن عانا ەمەس, قالاعا دا ءتيىمدى. ويتكەنى تاڭعى جانە كەشكى ۋاقىتتاردا اتا-انالاردىڭ قالانىڭ ءبىر جاعىنان ەكىنشى شەتىنە اعىلۋى – كولىكتىك ينفراقۇرىلىمعا ۇلكەن جۇكتەمە. ال ەگەر جەكە كولىگى بولسا, وندا ول كەپتەلىس تۋدىرادى. سوندىقتان بالاباقشالارعا بەرىلەتىن ورىن سايت ارقىلى تۇرعىلىقتى جەر بويىنشا بولىنەتىن بولادى, – دەدى قالا اكىمى.
ءوز كەزەگىندە «التىن القا» يەگەرى زيا سەيىتوۆا وتباسىنداعى 9 ادامنىڭ 40 شارشى مەتر بولاتىن ءبىر بولمەلى پاتەردى پانالاپ جاتقاندارىن ايتا كەلىپ, «مەملەكەتتىك باعدارلامالاردىڭ ىشىندە باسپانانى كەڭەيتۋدىڭ قانداي دا ءبىر تەتىگى بار ما؟» دەپ سۇرادى. بۇل ساۋالعا كوميتەت توراعاسى مارحابات جايىمبەتوۆ بىلاي دەپ جاۋاپ بەردى:
– جالپى, مەملەكەتتىك باعدارلاما بويىنشا تۇرعىندار باسپانامەن تەك ءبىر-اق رەت قامتىلادى. ەكىنشى رەت ونداي مۇمكىندىك بولمايدى. بىراق كوپبالالى, تولىق ەمەس, مۇگەدەك بالاسى بار وتباسىلارعا «تۇرعىن ءۇي قۇرىلىس جيناق بانكى» ارقىلى 2 پايىزدىق ۇستەمەاقىمەن جەڭىلدەتىلگەن نەسيە بەرىلەدى. وسى باعدارلاماعا سايكەس, 3 جىلدىڭ ىشىندە 150 ملرد تەڭگە قارجى ءبولىنىپ, 56 مىڭ پاتەر پايدالانۋعا بەرىلەدى دەگەن جوسپارىمىز بار. نەسيە 19 جىلعا قاراستىرىلادى. ءسىز قازىرگى پاتەرىڭىزدى ساتىپ, 10 پايىز العاشقى جارنانى قۇيىپ, وسى نەسيە ارقىلى كەڭىرەك پاتەر الۋىڭىزعا مۇمكىندىگىڭىز بار. ەگەر 12 ميلليون تەڭگەنىڭ نەسيەسىن الساڭىز, 88000 تەڭگە تابىسىڭىز بولۋى شارت. العاشقى 8 جىلدا ايىنا 63200 تەڭگە, قالعان 11 جىلدا 44621 تەڭگەدەن تولەيتىن بولاسىز.
سونداي-اق جيىنعا قاتىسقان بىرقاتار كوپبالالى انا باسقا دا جەكە ماسەلەلەرى بويىنشا قالا باسشىسىنىڭ قابىلداۋىنا جازىلدى. جيىن سوڭىندا ەلوردالىق كوپبالالى انالاردىڭ اتىنان ءسوز العان بوتاگوز شىنىقۇلوۆا بەتپە-بەت جۇزدەسىپ وتىرعان سپيكەرلەر ارقىلى ەلىمىزدىڭ بارلىق وڭىرىندەگى اتقارۋشى بيلىككە سالەم جولدادى.
– كەيبىر وبلىستا اۋىزسۋ مەن ەلەكتر جارىعى جوق ەلدى مەكەندەر بار كورىنەدى. ول جاقتاردا جاعداي دۇرىس بولماعان سوڭ, وڭىرلەردىڭ جۇرتشىلىعى باس قالاعا اعىلادى. بۇدان كەيىن وسىنداعى ماسەلە دە ارتا تۇسپەسە, كەمىمەيدى. ەگەر ەلىمىزدەگى بارلىق ءوڭىردىڭ جاعدايى جاقسى بولسا, كوپشىلىك الىستان ات ارىتىپ, ەلورداعا بۇلاي قاۋىرت كوشىپ كەلمەس ەدى, – دەدى ول.
مۇنداعى كوتەرىلگەن ماسەلەلەر بويىنشا جۇيەلى جۇمىس جۇرگىزىلەتىنىن تىلگە تيەك ەتكەن بەردىبەك ساپارباەۆ ايماقتارداعى ءتۇيىنى شەشىلمەگەن تۇيتكىلدەر جايلى وبلىس باسشىلىقتارىنا مىندەتتى تۇردە ايتىلاتىنىن جەتكىزدى.
