كەشە اقوردادا قازاقستان پرەزيدەنتى قاسىم-جومارت توقاەۆتىڭ توراعالىعىمەن نۇر-سۇلتان, الماتى, شىمكەنت قالالارىنىڭ جانە وبلىستاردىڭ اكىمدەرى قاتىسقان باسقوسۋ ءوتتى. وسى جيىندا قاسىم-جومارت كەمەلۇلى ۇشتىلدىلىك باعدارلاماسىنا قاتىستى ءوز پىكىرىن ءبىلدىردى. «بۇل – وتە كۇردەلى ءارى ماڭىزدى ماسەلە. مەنىڭ ۇستانىمىم, بىرىنشىدەن, قازاق ءتىلى بولۋعا ءتيىس, ورىس ءتىلى بولۋعا ءتيىس. بۇلاردىڭ بالالارىمىز ءۇشىن ماڭىزى زور. تەك سودان كەيىن عانا اعىلشىن ءتىلىن وقىتۋ كەرەك» دەدى ول.
كەڭەس بارىسىندا مەملەكەت باسشىسى قاسىم-جومارت توقاەۆ ەلباسى نۇرسۇلتان ءابىشۇلى نازارباەۆ نەگىزىن قالاعان الەۋمەتتىك تۇرعىدان ادىلەتتى ەل قۇرۋ باعىتىن جالعاستىرۋدى مىندەتتەدى. سونىڭ ىشىندە پرەزيدەنت اكىمدەرگە الەۋمەتتىك جاعدايى تومەن ازاماتتار ءۇشىن 40 مىڭنان استام جالدامالى پاتەرلەردى بەرۋ ماسەلەسىن جەدەلدەتۋدى جانە بۇل ۇدەرىستى بيىلعى مامىر ايىنان باستاۋدى جۇكتەدى. سونىمەن قاتار ق.توقاەۆ حالىقتىڭ تۇرمىس ساپاسىنا تىكەلەي اسەر ەتەتىن ينفراقۇرىلىمعا قاتىستى جۇيەلى ماسەلەلەردى شۇعىل شەشۋدىڭ ماڭىزدى ەكەنىن اتاپ ءوتتى.
قاسىم-جومارت توقاەۆ مەملەكەتتىك اپپارات پەن قوعام اراسىنداعى ءتيىمدى بايلانىستاردى جولعا قويۋدىڭ ماڭىزدىلىعىنا توقتالدى. مەملەكەتتىك ورگاندار تاراپىنان كوممۋنيكاتسيانىڭ زاماناۋي ارنالارىن پايدالانا وتىرىپ, ءتيىمدى ءتۇسىندىرۋ جۇمىستارىن جۇرگىزۋ قاجەتتىگى اتاپ ءوتىلدى. پرەزيدەنت ءوڭىر اكىمدەرىنىڭ حالىقپەن ۇنەمى كەزدەسۋگە جانە ەلدى مەكەندەردى ءجيى ارالاۋعا ءتيىس ەكەنىن دە ايتتى.
جيىن بارىسىندا پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا.سمايىلوۆتىڭ, پرەمەر-ءمينيستردىڭ ورىنباسارلارى ج.قاسىمبەك پەن گ.ءابدىقالىقوۆانىڭ, الماتى قالاسىنىڭ اكىمى ب.بايبەكتىڭ جانە پاۆلودار وبلىسىنىڭ اكىمى ب.باقاۋوۆتىڭ ەسەپتەرى تىڭدالدى.
باسقوسۋ سوڭىندا مەملەكەت باسشىسى ەكونوميكانىڭ ءوسىمىن, ينۆەستيتسيا تارتۋ ءىسىن قامتاماسىز ەتۋگە, الەۋمەتتىك تۇراقتىلىقتى نىعايتۋعا, وڭىرلەردەگى ينفراقۇرىلىمدىق جانە ەكولوگيالىق وتكىر پروبلەمالاردى شەشۋگە, سۋ تاسقىنىنىڭ الدىن الۋعا, تۇرعىن ءۇي-كوممۋنالدىق شارۋاشىلىعىن جانە الەۋمەتتىك سالانى قامتاماسىز ەتۋگە, سونداي-اق كوكتەمگى ەگىس جۇمىستارىنا دايىندىق جانە ونى جۇرگىزۋ جۇمىستارىن ۇيىمداستىرۋعا باعىتتالعان بىرقاتار تاپسىرما بەردى.
