بيىل 10 ايدا تۇركىستان وبلىسىنان سولتۇستىككە 247 ادام كوشىپتى. وتكەن جىلى 530 وتباسى كوشكەنىن ەسكەرسەك, كوشتىڭ ازايىپ كەتكەنى كورىنىپ تۇر. بۇل تۇيتكىلدى جۋىردا «نۇر وتان» پارتياسى وبلىستىق فيليالىنىڭ جەتەكشىلەرى كاسىپوداقتارمەن بىرگە تالقىلادى.
«تۇركىستاندا كەلەلى كەڭەس وتكىزىپ, جۇمىسشى قۇقىعىن قورعاۋ, تۇرعىنداردى جۇمىسپەن قامتۋ, مەملەكەتتىك باعدارلامالاردىڭ ورىندالۋىن قاداعالاۋ, تيىمدىلىگىن ارتتىرۋ ماسەلەسىن تالقىلادىق. سولتۇستىككە كوشۋ كورسەتكىشى دە كوڭىل كونشىتپەيدى. بيىلعا 10 ايدا 247 وتباسى عانا كوشىپتى. وتكەن جىلى 530 وتباسىدان استام جانۇيا قونىس اۋدارعان ەدى. بيىل تاعى دا كارانتين «كىنالى» مە؟ باستى سەبەپ جاۋاپتى مەملەكەتتىك مەكەمەلەردىڭ نەمقۇرايدىلىعى مەن مامانداردىڭ بىلىكسىزدىگىندە دەپ ويلايمىن. وتكەن جىلى قوعامدىق ەرىكتىلەردى جۇمىلدىرىپ, باعدارلامانىڭ جوسپارلى تۇردە ىسكە اسىرىلۋىنا اتسالىسقانبىز. ناتيجەدە جىلداعىعا قاراعاندا 100 وتباسى ارتىعىمەن كوشكەن. بىلە بىلسەك, بۇل – ايماقتىق ەمەس, ۇلتتىق ماسەلە. مەملەكەتتىك ستراتەگيا. ەندى بارلىق كۇشتەردى قوسىپ, ىسكە اسىرۋعا كىرىسەمىز» دەپ جازدى پارتيانىڭ وبلىستىق فيليالى توراعاسىنىڭ ءبىرىنشى ورىنباسارى بەيسەن ءتاجىباي.
ول مەملەكەتتىك باعدارلامالاردى باق-تا, الەۋمەتتىك جەلىلەردە تۇراقتى تۇردە ناسيحاتتاۋ, ءتۇسىندىرۋدى بارىنشا تالاپ ەتىپ, رەسۋرستارعا باعىتتالاتىنىن ايتتى. «ەكىنشىدەن, قوعامدىق جۇمىسپەن قامتىلعان كەيبىر ازاماتتاردىڭ جۇمىسقا بارماي-اق جالاقى العانى تۋرالى ايتىلىپ ءجۇر. بۇل دا مەملەكەتتىك قاراجاتتىڭ ءوز ماقساتىندا پايدالانىلماعانىن كورسەتەدى. سونىمەن بىرگە اۋدان, قالالارداعى جۇمىسپەن قامتۋ ورتالىقتارىنداعى بازالاردى جۇيەلەۋ قاجەت. كەيبىر جاعدايى جاقسى وتباسىلار ءتۇرلى كومەكتەرگە ىلىگىپ كەتسە, كەيبىر شىن مۇقتاج ازاماتتاردىڭ كومەكتەن شەت قالۋ وقيعالارى دا كەزدەسىپ قالادى. سوندىقتان ءبىز اتالعان ماسەلەلەر بويىنشا پارتيا فراكتسياسى مەن پارتيا فيليالىنان مونيتورينگتىك توپتار قۇرۋ جونىندە شەشىم قابىلدادىق» دەپ جالعادى ب.ءتاجىباي. الەۋمەتتىك قولداۋدى كۇشەيتۋ, ەڭبەك زاڭناماسىن ساقتاۋ, جۇمىسسىزدىقپەن كۇرەس باعىتىنداعى جۇمىستار پارتيانىڭ باقىلاۋىندا بولماق.
