نۇر-سۇلتان قالاسى قوعامدىق كەڭەسىنىڭ وتىرىسىندا ەلورداداعى اللەياعا «قالامگەرلەر» اتاۋىن بەرۋ, «اراي» ساياباعىن «جەتىسۋ» ساياباعى دەپ قايتا اتاۋ, قالا كوشەلەرىنە رايىمبەك باتىردىڭ, تولە, قازىبەك, ايتەكە بيلەردىڭ, ءال-ءفارابيدىڭ, اناتولي حراپاتىيدىڭ اتتارىن بەرۋ ۇسىنىلدى. قالانىڭ ونوماستيكالىق كوميسسياسىنىڭ بۇل شەشىمىن تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلەۋعالي قىشقاشباەۆ جاريالادى. كەڭەس مۇشەلەرى بۇل شەشىمدى ءبىراۋىزدان ماقۇلدادى.
ءبىر ەسكەرەتىن نارسە, رايىمبەك باتىردىڭ كوشەسى ەلوردادا بۇرىن بولعان ەكەن. بىراق تاۋەلسىزدىك داڭعىلىنا قوسىلىپ كەتكەن. قوعامدىق كەڭەس جانە قالانىڭ ارداگەرلەر كەڭەسىنىڭ توراعاسى سانسىزباي ەسىلوۆ كەلەسى جىلى ۇلى جەڭىستىڭ 75 جىلدىعى اتاپ وتىلەتىنىن ايتىپ, اقساقالدار مەن ۇلى وتان سوعىسىنىڭ ارداگەرلەرى ەلوردادا تالعات بيگەلدينوۆكە ەسكەرتكىش قويۋ ماسەلەسىن كوتەرىپ جاتقانىن جەتكىزدى. تاياۋدا بۇل ماسەلە ارداگەرلەر كەڭەسى پرەزيديۋمىنىڭ وتىرىسىندا تالقىلانىپ, قولداۋ تاپسا, اكىمدىككە حات جونەلتىلمەك. وسى ورايدا قوعامدىق كەڭەس مۇشەسى مارات مۇستافين جۇمابەك تاشەنوۆكە دە ەسكەرتكىش قوياتىن ۋاقىت جەتكەنىن ايتتى.
