قازاقستان مۇسىلماندارى ءدىني باسقارماسىنىڭ ۇيىمداستىرۋىمەن «رۋحاني قۇندىلىقتار – قوعام بىرلىگىنىڭ نەگىزى» اتتى ءىىى رەسپۋبليكالىق يمامدار فورۋمى ءوتتى. «جەتى رۋحاني قازىق» قازاقستان مۇسىلماندارىنىڭ رۋحاني تۇعىرناماسى, ءدىن قىزمەتكەرلەرى اتقاراتىن ءدىني راسىمدەر ءتىزىلىمى, قمدب قۇرىلىمىنداعى ءدىني لاۋازىمدار ءتىزىلىمى جانە مىندەتتەرى دەپ اتالاتىن بىرنەشە قۇجات قابىلدانعان فورۋمعا مەملەكەت جانە قوعام قايراتكەرلەرى, عالىمدار مەن بەلگىلى تەولوگتار, 500 يمام قاتىستى.
جيىندى اشقان قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي سەرىكباي قاجى وراز: «ەلىمىزدىڭ تۇڭعىش پرەزيدەنتى – ەلباسى ن.نازارباەۆتىڭ «رۋحاني جاڭعىرۋ» ماقالاسىنداعى يگى يدەيالاردى, مەملەكەت باسشىسى ق.توقاەۆتىڭ سايلاۋالدى تۇعىرناماسىندا كورسەتىلگەن «بارشاعا ورتاق يگىلىك. ساباقتاستىق. ادىلدىك. ورلەۋ» باستاماسىن قولداي وتىرىپ, وعان ۇلەس قوسۋدى ازاماتتىق بورىشىمىز دەپ سانايمىز» دەپ فورۋمعا قاتىسۋشىلارعا العىس ءبىلدىردى.
قر پرەزيدەنتى اكىمشىلىگىنىڭ باسشىسى ەرلان قوشانوۆ پرەزيدەنت قۇتتىقتاۋىن جەتكىزدى. قر اقپارات جانە قوعامدىق دامۋ ءمينيسترى داۋرەن اباەۆ ءدىني باسقارمانىڭ اعارتۋشىلىق ساپاسىن جاڭا دەڭگەيگە كوتەرۋ, تەرىس اعىمعا تۇسكەندەردى ءداستۇرلى دىنگە قايتارۋ جۇمىستارىن كۇشەيتۋ, جەكە ازاماتتاردىڭ سۇراقتارىن اشىق ءارى جىلدام شەشۋ ماقساتىندا ءمۇفتيدىڭ ۆيرتۋالدى قابىلداۋ ءبولىمىن اشۋ تۋرالى, ت. ب. مىندەتتەر مەن ۇسىنىستاردى قاراستىردى. قر پرەمەر-ءمينيسترىنىڭ ورىنباسارى بەردىبەك ساپارباەۆ ءدىن وكىلدەرىن قۇتتىقتاپ, فورۋمنىڭ وزەكتىلىگىنە باعا بەردى. سونىمەن بىرگە فورۋمدا مەملەكەت جانە قوعام قايراتكەرى ءادىل احمەتوۆ, قمدب توراعاسىنىڭ ورىنباسارى, نايب ءمۇفتي ناۋرىزباي قاجى تاعانۇلى, ت. ب. بەلدى ازاماتتار ءسوز سويلەدى.
جادىرا شامۇراتوۆا
