كوكتەم شىعا ەلوردا اكىمشىلىگى جول جوندەۋ جۇمىستارىنا بەلسەنە كىرىستى. بيىل قالا بويىنشا 150 كوشەنى جوندەۋ جۇمىستارى جوسپارلانعان. ايتا كەتەيىك, بۇل جولدار بىرنەشە كريتەريلەر بويىنشا تاڭدالدى.
ءبىرىنشى, بۇرىن اسفالت بولماعان جولدار ەسەپكە الىندى. مۇنداي جولداردىڭ كوبى ەلدى مەكەندەردە ورنالاسقان, جوسپارلانعان 150 كوشەنىڭ 100-ءى وسىلارعا تيەسىلى. ەكىنشى, جاڭا اۆتوبۋس باعىتتارىن ىسكە قوساتىن كوشە مەن قوزعالىسى جوعارى كوشەلەر قامتىلعان. ءۇشىنشى, تۇرعىندارمەن كەزدەسۋ بارىسىندا ادامدار الەۋمەتتىك نىساندارعا اپاراتىن كوشەلەردى اسفالتتاۋدى سۇراعان. وسى جولدار تىزىمگە ءىلىندى.
نۇر-سۇلتان قالاسىنىڭ اكىمى التاي كولگىنوۆ كەشە «كوكتال» جانە «اگروقالاشىق» ەلدى مەكەندەرىندەگى بىرقاتار كوشەلەردىڭ جول قۇرىلىسى جۇمىستارىن بارىپ كوردى.
جالپى, وسى ەكى ەلدى مەكەندەگى 33 كوشە جوندەلەدى. كەزدەسۋ بارىسىندا تۇرعىندار قالا باسشىسىنا جارىقتاندىرۋ, جىلىتۋ, كارىز ماسەلەلەرى بويىنشا بىرقاتار ماسەلەلەردى كوتەردى. ەلوردا اكىمى كەيبىر ماسەلەلەر بويىنشا شەشىمدى سول جەردە قابىلداپ, قالعاندارىن جوسپارعا بەكىتۋدى تاپسىردى.
سونداي-اق قالا اكىمى ءوز سوزىندە ونەركاسىپتىك سەكتور مەن ەلدى مەكەندەردى گازداندىرۋ 3 كەزەڭدە وتەتىندىگىن ايتتى. بيىلعى جىلىتۋ ماۋسىمىندا «كوگىلدىر وتىنعا» بىرقاتار ەلدى مەكەن قوسىلادى.
