باستى وقۋ قۇرالى – كومپيۋتەر مەن تەلەديدار

ەلىمىزدىڭ مەكتەپتەرىندە بيىل العاشقى قوڭىراۋ ونلاين تۇردە سوعىلادى. جۇقپالى ىندەتتىڭ تارالۋىنا جول بەرمەۋ ءۇشىن ءبىلىم جانە عىلىم مينيسترلىگى وسىنداي شەشىم قابىلدادى.ەلىمىزدەگى 7391 مەكتەپ­تەگى 3,3 ميلليونداي بالانىڭ 2,6 ميلليونى – قا­شىقتان وقۋ فورماتىندا, 530 مىڭ بالا – كەزەكشى سىنىپتاردا, ال شتاتتىق تۇردە اۋىلداردا 157 مىڭنان استام وقۋشى ءبىلىم الادى. جاڭا وقۋ جىلىنىڭ قارساڭىندا مۇقتاج وتباسىلاردان شىققان 500 مىڭ وقۋشىنى كومپيۋتەرمەن قامتاماسىز ەتۋ جوسپارلانعان. ونىڭ ىشىندە نۇر-سۇلتان قالاسى بويىنشا 689 جەتىم بالالار, 7212 از قامتىلعان جانە 4159 كوپبالالى وتباسىنان شىققان وقۋشىلار بار. ولار وقۋ جىلىنىڭ باسىنا دەيىن تۇگەلدەي كومپيۋتەرلىك تەحنيكامەن, روۋتەرلەرمەن قامتىلادى.
ەلىمىزدەگى وقۋشىلاردىڭ 80 پايىزى, ياعني 2 ميلليون 600 مىڭ بالا 1 قىركۇيەكتەن باستاپ تاعى دا كومپيۋتەر مەن تەلەديدارعا جۇگىنەدى. وسى ورايدا وقۋشىنىڭ ماتەريالدىق قاجەتتىلىگىنەن بۇرىن, رۋحاني سۇرانىسىن ءوز دەڭگەيىندە قامتۋ وڭاي ەمەس. ءمينيستردىڭ ايتۋىنشا, وسىنشاما وقۋشىعا قاشىقتان ءبىلىم بەرۋدىڭ ءتيىمدى جولدارىنىڭ ءبىرى – تەلەساباقتار دايىنداۋ. وسىعان دەيىن 6 مىڭ ونلاين-ءدارىس ازىرلەنىپتى.
– تەلەديدار ساباقتارى «ءال-فارابي» مەن «ەل ارنا» ارنالارىندا كورسەتىلەدى. كەم دەگەندە ارقايسىسىنا 9 ساعاتتان ەفير بەرىلدى. وعان قوسا, بارلىق تەلەساباقتار ينتەرنەتتە ورنالاستىرىلىپ, وقۋشىلار ءۇشىن تەگىن جانە قولجەتىمدى بولادى, – دەدى اسحات ايماعامبەتوۆ ۇكىمەت وتىرىسىندا.
مينيستر اتاعان ەكى ارنا 604 ەلدى مەكەندە كورسەتپەيدى ەكەن. الايدا ونىڭ جارتىسىندا مەكتەپكە باراتىن وقۋشى جوق كورىنەدى. ال قالعاندارىندا بۇل ماسەلە تەلەساباقتاردى جەرگىلىكتى تەلەارنالاردان كورسەتۋ جانە سپۋتنيكتىك انتەننا ورناتۋ ارقىلى شەشىلمەك. الايدا ونلاين وقىتۋداعى قيىندىق از ەمەس. شالعايداعى اۋىلداردى ايتپاعاننىڭ وزىندە, كەي اۋدان ورتالىقتارىندا ينتەرنەتتىڭ جىلدامدىعى تومەن ەكەنىن توتەنشە جاعداي كورسەتىپ بەردى. قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترىنىڭ مىندەتىن اتقارۋشى باعدات ءمۋسيننىڭ ايتۋىنشا, نۇر-سۇلتان, الماتى جانە شىمكەنت قالالارىندا تالداۋ جاسالعان. سونىڭ نەگىزىندە قوسىمشا انتەننالىق قۇرىلىستار ورناتىلاتىن ورىندار ايقىندالعانىن جانە وسى ماسەلەگە بايلانىستى جەرگىلىكتى اكىمدىكتەرگە ءتيىستى تاپسىرما بەرۋ كەرەكتىگىن ايتتى. ءسويتىپ بايلانىس ساپاسى ناشار ايماقتاردىڭ پروبلەماسىن شەشۋگە بولادى دەدى.