پاندەميا ءپان سايىستارىنا توسقاۋىل بولعان جوق. ويتكەنى ءبىلىمدى مىڭدى عانا ەمەس, ىندەتتى دە «جەڭەدى». جاقىندا الەمدىك ءپان وليمپياداسىنا قاشىقتان قاتىسىپ, ەل مەرەيىن اسىرعان ەلىمىزدىڭ وقۋشىلار قۇرامى قولا جۇلدەگە يە بولدى.
حيميا بويىنشا ەڭ بەدەلدى حالىقارالىق «IChO» وليمپياداسى پاندەمياعا قاراماستان ءوتتى. وليمپيادانى تۇركيا مەملەكەتى ۇيىمداستىرعان. ىستانبۇلدا وتكەن ءبىلىم باسەكەسىنە الەمنىڭ 60 ەلىنەن 200-دەن استام وقۋشى قاتىسقان. ءار ەل ۇلتتىق بىرىنشىلىكتىڭ جەڭىمپازدارىن, ياعني 4 ستۋدەنتتەن تۇراتىن ۇلتتىق قۇرامانى ۇسىندى. وليمپيادانىڭ تالابى دا وسى. قازاقستان حالىقارالىق تۋرنيرگە ىرىكتەۋ تۋرلارى مەن مەندەلەەۆ وليمپياداسىنىڭ جالپى رەيتينگىسىنىڭ ناتيجەلەرى بويىنشا قۇراما كوماندانىڭ مۇشەسى بولعان 4 ۇمىتكەردى ۇسىندى. كوماندا قۇرامىندا نۇر-سۇلتان قالاسىنان ەكى وقۋشى بار: نازارباەۆ زياتكەرلىك مەكتەبىنىڭ وقۋشىسى ءابىلمانسۇر مۋجۋباەۆ, دارىندى ەر بالالارعا ارنالعان «ءبىلىم-يننوۆاتسيا» ليتسەي-ينتەرناتىنىڭ وقۋشىسى باقداۋلەت سەيسەنقۇل.
«حيميا پانىنەن ءبىلىم باسەكەسى وتە تارتىستى ءوتتى. اسىرەسە, وڭتۇستىك كورەيا, اقش, قىتاي, رەسەي, سينگاپۋر, جاپونيا جانە باسقا دا ەلدەردىڭ وقۋشىلارى وزدەرىنىڭ مىقتىلىعىن كورسەتتى» دەيدى وليمپيادانىڭ ەڭ جاس قاتىسۋشىسى باقداۋلەت سەيسەنقۇلوۆ. ول بۇل سايىستا كوماندالىق قۇرامدا جەكەلەي دە ءساتتى ناتيجە كورسەتتى. وسى قاتىسۋدا حيميادان الەمدىك وليمپيادا ىرىكتەۋىنەن ءوتىپ, كەلەر جىلعا التىن الۋدان ءۇمىتتى. 16 جاستاعى باقداۋلەتتىڭ بۇل جەتىستىگى ءبىزدى دە قىزىقتىرىپ, حابارلاستىق.
– وليمپيادا قاشىقتان وتكەنمەن, حالىقارالىق اتموسفەرا سەزىلىپ تۇردى. ءاربىر مەملەكەت ءوز ەلىنىڭ ىشىنەن ەڭ مىقتىلارىن تاڭداپ وسى وليمپياداعا قاتىستىردى. ارينە, ولارمەن باسەكەگە ءتۇسۋ وڭاي بولعان جوق. بىراق سول باسەكەلەستە ءوزىن ەڭ جاقسى كورسەتكەن مەملەكەتتەردىڭ ءبىرى اقش قۇراماسى بولدى. ولاردىڭ كومانداسى 4 التىن جەڭىپ الدى. وسى وليمپياداعا ازىرلەگەن ۇستازدارىم سۇلتان اعاي مەن ماحمۇد كوزاك بەيگە العىسىم شەكسىز, – دەيدى وليمپيادا جۇلدەگەرى باقداۋلەت سەيسەنقۇل.
ايتا كەتەيىك, قۇراما كوماندانىڭ جاتتىقتىرۋشىلارى قازاقستاندىق وقۋشىلاردىڭ حيميا پانىنەن 52-حالىقارالىق وليمپيادادا ەلىمىزدى لايىقتى دەڭگەيدە كورسەتۋى ءۇشىن بار ءبىلىم-بىلىگىن سالعانى قۋانتتى. ال الەم ەلدەرىنىڭ الدىندا وزدەرىنىڭ العان بىلىمدەرىن كورسەتە العان جاستارىمىزعا ساتتىلىك تىلەيىك.
