ەلوردادا «كوشپەندىلەر الەمى» اتتى IV حالىقارالىق فەستيۆال بولىپ ءوتتى.
جىل ساناپ اتالعان ماڭىزدى شارانىڭ بەدەلى ارتىپ كەلەدى. بىلتىر فەستيۆالعا الەمنىڭ 8 ەلىنەن 90 قاتىسۋشى كەلسە, بيىل 10 مەملەكەتتەن 180 قوناق ات باسىن تىرەدى. «Kazakh تourism» اق توراعاسىنىڭ ورىنباسارى تيمۋر دۇيسەنعاليەۆتىڭ ايتۋىنشا, ايتۋلى شارانىڭ ماقساتى استانامىزدىڭ دامىعان بۇگىنگى كەلبەتىن عانا ەمەس, سان عاسىرلار بويى قالىپتاسقان باي مادەنيەتىمىز بەن تاريحي مۇرامىزدى كورسەتۋ دەيدى.
«فەستيۆالدى ءداستۇرلى مەرەكەگە اينالدىرۋ تۋريستىك سالانى عانا ەمەس, قوماقتى تابىس اكەلۋ تۇرعىسىنان دا ءتيىمدى. بۇل ەلىمىزدەگى شاھارلار مەن ايماقتارداعى وندىرىستەردىڭ قوسىمشا دامۋىنا سەبى تيەدى» دەدى ول.
شارا بارىسىندا كوشپەندىلەر الەمىنىڭ كورىنىستەرى كەلۋشىلەردى تاڭعالدىرماي قويمادى. ولار قولونەرشىلەردىڭ وزدەرى جاساعان بۇيىمدارىن كورىپ, ساداقشىلاردىڭ جەبە اتۋداعى مەرگەندىگىنە ءتانتى بولدى. سەمسەرلەسۋ سايىسىنىڭ دا كورىگى قىزىپ, سوم بىلەكتى جىگىتتەر قازاق كۇرەسىنىڭ جالاۋىن كوتەردى. الىستان كەلگەن قوناقتار ۇلتتىق تاعامنان ءدام تاتتى.
