بيىل ەلوردادا ۇلى وتان سوعىسى قاتىسۋشىلارى مەن مۇگەدەكتەرىنە جەڭىس كۇنىنە وراي قوسىمشا الەۋمەتتىك كومەك كورسەتۋ ءۇشىن جەرگىلىكتى بيۋدجەتتەن 25 ملن 900 مىڭ تەڭگە ءبولۋ قاراستىرىلىپ وتىر. وسى ساناتقا جاتاتىن 74 ادامنىڭ ارقايسىسى 520 مىڭ تەڭگەدەن الادى.
كەشە قالالىق قوعامدىق كەڭەس وتىرىسىندا جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابىلدينوۆ وسىلاي دەپ مالىمدەدى. كەڭەس مۇشەلەرى بۇل ۇسىنىستى ءبىراۋىزدان قولدادى.
قالالىق قوعامدىق دەنساۋلىق ساقتاۋ باسقارماسى قوعامدىق كەڭەسكە وسى سالاداعى كوممۋنالدىق قازىنالىق كاسىپورىندارى وندىرەتىن جانە ساتاتىن تاۋارلاردىڭ, جۇمىستاردىڭ, قىزمەتتەردىڭ قۇنىن بەلگىلەۋ تۋرالى قاۋلىنىڭ جوباسىن جىبەرگەن بولاتىن. بۇل قۇجاتپەن اتالمىش باسقارما باسشىسىنىڭ ورىنباسارى بيبىگۇل مىرزابەكوۆا تانىستىردى.
سونىڭ ىشىندە جيتس-ءتىڭ الدىن الۋ جانە وسى اۋرۋمەن كۇرەس ورتالىعىندا قازاقستان رەسپۋبليكاسىنىڭ ازاماتتارى مەن ورالماندار تەگىن تەكسەرىلە الاتىنى ايتىلدى. بۇل ورتالىق اقىلى قىزمەتتى تەك شەتەلدىك ازاماتتارعا كورسەتەدى. وتكەن جىلى بۇل مەكەمەدە 3 مىڭ 254 ادام قارالعان. دەنساۋلىق ساقتاۋ مينيسترلىگىنىڭ ءتيىستى بۇيرىعىنا سايكەس اقىلى قىزمەت 1444 تەڭگە بولىپ بەلگىلەنگەن.
الايدا باس قالاداعى جيتس ورتالىعى بۇل قىزمەتتى 980 تەڭگەگە كورسەتەدى. بۇل مينيسترلىكتىڭ بۇيرىعىنا قايشى كەلىپ تۇر. ورتالىق باعاسى 2016 جىلدان بەرى وزگەرمەي كەلە جاتىر. ال باسقا وڭىرلەردە اتالعان قىزمەت قىمباتتاۋ. ماسەلەن, الماتى, قاراعاندى, سولتۇستىك قازاقستان جانە پاۆلودار وبلىستارىندا – 2 مىڭ تەڭگە, ماڭعىستاۋ مەن اتىراۋ وبلىستارىندا – 3080 تەڭگە. وسىعان بايلانىستى قالالىق قوعامدىق دەنساۋلىق باسقارماسى باعانى كوتەرۋدى قولداۋدى سۇرادى. قوعامدىق كەڭەس مۇشەلەرى بۇل ماسەلەنى ءبىراز تالقىلاپ, ءوز ۇسىنىس-پىكىرلەرىن ايتتى.
