استانادا 28 ماۋسىم كۇنى قازاقستان رەسپۋبليكاسىنى تۇڭعىش پرەزيدەنتى – ەلباسىنىڭ كىتاپحاناسىندا «پرەسس تسەنتر ازيا» قوعامدىق قورى ەل تاۋەلسىزدىگىنىڭ 25 جىلدىعىنا جانە ءباسپاسوز كۇنىنە وراي «جاس مەديا. اقپاراتتىق تەحنولوگيالار مەن قازاقستان مەدياسفەراسىنىڭ زاماناۋي كونتسەپتسياسى» فورۋمىن وتكىزدى. بۇل ايتۋلى شاراعا قازاقستاننىڭ جاستار كونگرەسى دە قاتىستى.
فورۋم اياسىندا جاس جۋرناليستەردىڭ كادرلىق پوتەنتسيالىن ارتتىرۋ, وقيعالاردى حالىققا كەڭىنەن جان-جاقتى ءارى ساپالى جەتكىزۋ ماسەلەلەرى پلەنارلىق وتىرىستا تالقىلاندى. سونىمەن قاتار, فورۋمعا قاتىسۋشىلار ديالوگ الاڭدارىندا جۋرناليستيكانىڭ وزەكتى ماسەلەلەرىن ورتاعا سالدى. سونداي-اق, الەۋمەتتىك-ساياسي, ەكونوميكالىق وقيعالاردى حالىققا جەتكىزۋ جۇمىستارى تاجىريبەسى جايىندا پىكىر الماسىپ, مەديا سالاسىنىڭ ترانسفورماتسياسى داۋىرىندەگى جاستاردىڭ ورنى, جۇمىس جاساۋ فورمالارى مەن تەتىكتەرى كەڭىنەن ءسوز بولدى.
فورۋم جۇمىسىندا پارلامەنت ءماجىلىسىنىڭ دەپۋتاتى ءاليا ساپاروۆا, ءبىلىم جانە عىلىم ءمينيسترى ەرلان ساعاديەۆ, پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ اتقارۋشى ديرەكتورىنىڭ ورىنباسارى جاپسارباي قۋانىشەۆ, «قازاقستان – 2050» جالپى ۇلتتىق قوزعالىسى كەڭەسىنىڭ توراعاسى دانات جۇمين, باس رەداكتورلار كلۋبىنىڭ پرەزيدەنتى بيبىگۇل جەكسەنباي جانە باسقا بەلگىلى تۇلعالار ءسوز سويلەپ, اقپاراتتىق شىڭدىق, زاماناۋي سىن قاتەرلەر, ساپالى جۋرناليستيكانىڭ قۇپيالارى تاقىرىپتارىندا اڭگىمە ءوربىتتى.
ال ءبىلىم بەرۋ بولىمىندە جۋرناليست-بلوگەر وركەن كەنجەبەك, بەلگىلى بلوگەر ياكوۆ فەدوروۆ, تەلەجۋرناليستيكانىڭ جەتەكشى مامانى ۆلاديمير رەريح شەبەرلىك ساباقتارىن وتكىزىپ, جاس جۋرناليستەرگە كاسىبي باعدارلار كورسەتتى.
فورۋمعا جاس جانە بەلگىلى جۋرناليستەر, بلوگەرلەر مەن جۋرناليستيكا فاكۋلتەتىنىڭ ستۋدەنتتەرى, ءباسپاسوز قىزمەتكەرلەرى, جاستار ۇيىمدارى مەن قوزعالىستارىنىڭ وكىلدەرى قاتىستى. وسىنداي اۋقىمدى اۋديتوريانىڭ الدىندا «ZhastarUP» ءبىرىنشى قازاقستاندىق جاستاردى وقىتۋ جوباسىنىڭ تۇساۋكەسەرى وتكىزىلدى. بۇل جوبا سايت ارقىلى ونلاين ءبىلۋ بەرۋ ماقساتىن كوزدەيدى. اتالمىش سايتتا بەينەلەكتسيالار, ونلاين-كۋرستار, ماقالالار مەن ستۋدەنتتىك كونكۋرستار, حالىقارالىق ستيپەنديالار جونىندەگى اقپاراتتار ورنالاستىرىلادى. بۇل جاڭا جوبانىڭ ءباسپاسوز سالاسىنا كەلگەن جاس جۋرناليستەردىڭ بىلىكتىلىگىن اتتىرۋدا سەپتىگى مول بولارى ءسوزسىز.
مەڭدوللا نۇرىمۇلى
