جەكپە-جەك ۇرىستارىنىڭ ءتۇر-ءتۇرىن تاماشالاۋ ەلوردالىقتار ءۇشىن داستۇرگە اينالىپ كەلەدى. قالا اكىمدىگىنىڭ ۇيىمداستىرۋىمەن استانادا وسىمەن ەكىنشى رەت وتكىزىلگەن حالىقارالىق جاۋىنگەرلىك ونەر فەستيۆالى بيىلعى كورەرمەن نازارىنا ايرىقشا باعدارلاما ۇسىندى.
ايتۋلى شارادا قازاقستان, يتاليا, قىتاي, رەسەي, فيليپپين جانە جاپونيا شەبەرلەرى 11 ديستسيپلينا بويىنشا ونەر كورسەتتى. بۇل جولى فەستيۆال قوناقتارى دجيۋ-دجيتسۋ, كيوكۋشينكاي-كان كاراتە, قويان-قولتىق ۇرىس, سۋمو, تاەكۆاندو, مۋاي-تاي, ۆين-چۋن, قازاقشا كۇرەس, برازيليالىق دجيۋ-دجيتسۋ, شاولين-تسيۋان جانە پەكيتي-تيرسيا كالي جەكپە-جەكتەرىنىڭ كورنەكى ۇلگىلەرىن تاماشالادى.
فەستيۆالگە شاقىرىلعان مارتەبەلى مەيمانداردىڭ ورنى ءبىر توبە: ۆين-چۋن حالىقارالىق فەدەراتسياسىنىڭ (IWCO) قۇرمەتتى پرەزيدەنتى سيفۋ دونالد ماك, Ultimate Fighting Championship قامقورلىعىمەن ونەر كورسەتەتىن, ارالاس ستيلدەگى كاسىپقوي سپورتشى حابيب نۋرماگومەدوۆ, كاسىپقوي رەسەيلىك تايبوكسشى جانە كيكبوكسشى, تاي بوكسىنان جانە كيكبوكسينگتەن كاسىپقويلار مەن اۋەسقويلار اراسىنداعى جارىستاردىڭ بىرنەشە دۇركىن جەڭىمپازى, تاي بوكسىنان رەسەيدىڭ ەڭبەك سىڭىرگەن سپورت شەبەرى ارتەم لەۆين.
سونىمەن قاتار, اتالعان شاراعا اكتەر, كاسىپقوي سپورتشى, جاۋىنگەرلىك جەكپە-جەك بويىنشا اسكەري نۇسقاۋشى سەرگەيا باديۋكتىڭ قاتىسۋى سپورتسۇيەر قاۋىم ءۇشىن ەرەكشە سىي بولدى. «قر مەملەكەتتىك كۇزەت قىزمەتىنىڭ شەبەرلىگىنە ءتانتىمىن. ماسكەۋدە وتكەن «الفا» كۋبوگىندا ولار بارلىق سايىس ءتۇرىن جەڭىپ, ءابسوليۋتتى چەمپيون اتانعان ەدى. وسى فەستيۆالدە جىگىتتەر سوڭعى بولىپ ونەر كورسەتەدى ەكەن. ەڭ ءبىر اسىعا كۇتىپ جۇرگەنىم, سولاردىڭ كورسەتىلىمى» دەيدى سەرگەي باديۋك. ونىڭ ايتۋىنشا, تۇنگى كلۋبتاردى كەزىپ, زياندى ادەتتەرگە اۋەستەنۋدىڭ زامانى ءوتىپ كەتكەلى قاشان. «بۇگىنگىنىڭ ءسانى – ءبىلىم ىزدەپ, سپورتپەن شۇعىلدانۋ. سالاۋاتتى ءومىر سالتىن ۇستاناتىن جاستاردىڭ كوپتىگى قۋانتادى. استانادا بايقاعانىم, جاتتىعۋعا ارنالعان جاقسى الاڭدار بار. سوندىقتان كەلەسى جىلى مۇنداي پاركتەردە شانتي-پراكتيكا وتكىزۋىمىز ابدەن مۇمكىن» دەدى سەرگەي باديۋك.
ال, استاناعا العاش رەت ات باسىن تىرەگەن دونالد ماك 200 جىل بۇرىن قىتايدا پايدا بولعان ۆين-چۋن سپورتىنىڭ نەگىزىن ايەل ادام قالاعانىن ايتادى. جەكپە-جەكتىڭ بۇل ءتۇرىن بريۋس لي مەن ونىڭ ۇستازى يپ مان كەڭىنەن ناسيحاتتاعان ەكەن. «بۇگىندە الەمنىڭ 16-دان اسا ەلىندە ۆين-چۋننىڭ جۇزگە جۋىق فيليالى بار. وسى سپورت ءتۇرى قازاقستانعا جاقىندا تارادى. قارقىندى دامىتۋعا بار تاجىريبەمدى سالامىن» دەگەن دونالد ماك سالتاناتتى تۇردە گونگ اسپابىن ۇرىپ, فەستيۆال شىمىلدىعىن اشىپ بەردى.
العاشقىلاردىڭ ءبىرى بولىپ ورتاعا قاراعاندى وبلىستىق تاەكۆاندو فەدەراتسياسى شىقتى. بۇدان كەيىن قازاقستان رەسپۋبليكاسىنىڭ دجيۋ-دجيتسۋ قاۋىمداستىعىنىڭ جەتكىنشەكتەرى ونەر كورسەتتى. اسىرەسە, استانا قالاسى مۋاي-تاي بوكسىنىڭ فەدەراتسياسى اتىنان شەبەرلىگىن كورسەتكەن 4 جاسار سپورتشىنىڭ تالابى تاڭعالدىردى.
ال, قىتايدان كەلگەن شاولين-تسيۋان شەبەرلەرىنىڭ ونەرى بارىنەن ەرەك. قۇددى ءبىر شاپسا قىلىش وتپەيتىن اڭىز كەيىپكەرلەرى ىسپەتتى. قاتار-قاتار قويىلعان وتكىر ارانى جۇمساق كورپەدەي كورىپ, ۇستىنە ەمىن-ەركىن ارقاسىن توسەيدى, ال كەۋدەسىنە ءجۇزى ۇشكىر شەگەلەردى قادايدى. دەنەسىنىڭ ەش جەرىن جارالاماي وعان دا بىر جىگىت سۇيەنە كەتەدى. ەڭ جوعارىداعى موناحتىڭ توسىنە قاتتى تاقتايشا قويىلادى. ءتورتىنشىسى سول تاقتايشانى ءبىر ۇرعاننان سىندىرادى. ودان كەيىن ەكى موناح شىعىپ, نايزانى مويىندارىمەن ۇستايدى. ولار ءبىر-بىرىنە قاراي كۇشپەن يتەرىلگەندە, نايزانىڭ ۇشى موينىن تەسىپ جىبەرە مە دەپ قورىقتىق. الايدا, مويىندارىنا سىزات تا تۇسكەن جوق. كەرىسىنشە, نايزا قاق ورتاسىنان مايىستى دا قالدى. ول ول ما, تاقىرلاپ الىنعان باسىنا اعاش تاياقپەن تارس ەتكىزىپ ۇرعاندا تاياق ەكىگە ءبولىنىپ سىندى. باسى ەتتەن بە, تاستان با دەپ تاڭداناسىڭ مۇنى كورىپ.
كۇتكەندەي-اق, قر مەملەكەتتىك كۇزەت قىزمەتىنىڭ قويىلىمى كۇش-قۋات بەرىپ, كەۋدەگە ماقتانىش سىيلادى. ەل تىنىشتىعىن كۇزەتىپ جۇرگەن جاۋىنگەرلەر قويان-قولتىق ۇرىستىڭ وزىق ۇلگىسىن كورسەتىپ, ەڭ سوڭىندا قازاقستاننىڭ مەملەكەتتىك تۋىن بيىككە كوتەرگەندە, بۇكىل زال تۇرىپ قوشەمەتتەدى.
ءمادينا جاقىپ
