پرەزيدەنتتىككە كانديدات جيگۋلي دايراباەۆ اقتوبە وبلىسىنىڭ سايلاۋشىلارىمەن كەزدەستى.
ول جۇرتشىلىقپەن تىلدەسە وتىرىپ, ءوزىنىڭ سايلاۋالدى باعدارلاماسىنىڭ نەگىزگى باعىتتارىنا دا توقتالدى. اقتوبە وبلىسى ونەركاسىپتى ءوڭىر بولعانمەن, حالقىنىڭ جارتىسىنا جۋىعى اۋىل شارۋاشىلىعىمەن اينالىسادى. بۇل جولعى كەزدەسۋدە اوك ىشىندەگى سالالار, اتاپ ايتقاندا, مامانداردى دايارلاۋ كوبىرەك قاراستىرىلدى. اقتوبە قالاسىنىڭ اۋىل شارۋاشىلىعى كوللەدجىندە وتكەن باسقوسۋدا ۇمىتكەر قازىرگى تاڭدا ەڭبەك نارىعىندا دەفيتسيت بولعان ماماندىقتار تۋرالى ءسوز قوزعادى. ج.دايراباەۆ جاس كادرلاردى دايارلاۋدىڭ ماڭىزى تۋرالى ايتتى.
«اگرارلىق دەرجاۆانىڭ قۇرىلۋى وڭىرلەردە جۇمىس ىستەۋگە جانە اگروبيزنەستىڭ جاڭا تۇرلەرىن بىرىكتىرۋگە دايىن جاڭا, ءبىلىمدى جاستاردى قالىپتاستىرۋدى تالاپ ەتەدى. قازىر كوللەدجدەردە, مەنىڭ پىكىرىمشە, ەڭبەك ادامى سانالاتىن مەحانيزاتورلار دايىندالىپ جاتىر. ەگەر مەنىڭ باعدارلامام جۇزەگە اسىرىلعان جاعدايدا, بولاشاقتا ولار جوعارى مارتەبەگە يە بولاتىنىنا سەنىمدىمىن» دەدى ۇستازدار الدىندا ءسوز سويلەگەن جيگۋلي دايراباەۆ.
ودان كەيىن قارعالى اۋدانىنا ات باسىن بۇرىپ, ونداعى ايماقتا جەرگىلىكتى كوكونىستەردى ساقتاۋ ءۇشىن سالىنعان نىسان – كوكونىس قويماسىنىڭ جۇمىسىمەن تانىستى. كوكونىس قويماسى ماسەلەسى كەزىندە وڭىردە وتە وتكىر بولدى. ءونىم وندىرۋشىلەر جەرگىلىكتى اكىمدىك باسشىسى – اۋدان اكىمىنىڭ قولداۋىمەن وسى نىساندى سالۋعا قول جەتكىزدى. نىساننىڭ پايدا بولۋى كوپتەگەن ماسەلەنى شەشتى. قازىر ول كوكونىستەرمەن جۇمىس ىستەيتىن شارۋاشىلىقتارعا قىزمەت ەتەدى. بۇل قالاداعى باعاعا دا ايتارلىقتاي اسەر ەتتى. بۇگىندە كوپشىلىك وسىنداي كوكونىس قويمالارى جەلىسىن ارتتىرۋعا مۇددەلى. «تاۋار وندىرۋشىدە ساقتاۋ جانە ساتۋ ماسەلەسى ەشقاشان بولماۋى ءۇشىن مۇنداي نىساندار ءار اۋداندا بولۋى كەرەك» دەدى جيگۋلي دايراباەۆ. كانديدات بۇدان كەيىن شارۋاشىلىقتارعا بارىپ, مادەنيەت ۇيىندە اۋدان تۇرعىندارىمەن كەزدەستى. كەزدەسۋگە جەتپىسكە جۋىق ادام قاتىستى. جيىنعا جينالعاندار الدىندا كانديدات ءوز باعدارلاماسى تۋرالى ايتتى.
