1 ماۋسىم – بالالاردى قورعاۋ كۇنىنە وراي كەشە ەلوردادا قايىرىمدىلىق شاراسى وتكىزىلدى. «كومەك» الەۋمەتتىك كومەك كورسەتۋ ورتالىعى مەن استانا قالاسىنىڭ مۇگەدەك بالالار قوعامى بىرلەسە ۇيىمداستىرعان جيىنعا 100-دەن اسا ءبۇلدىرشىن قاتىستى.
– ءبىزدىڭ ۇيىم 1999 جىلى قۇرىلعان. ال الەۋمەتتىك كومەك كورسەتۋ ورتالىعى 2008 جىلدان بەرى مەملەكەتتىڭ قولداۋىمەن قىزمەت ەتىپ كەلەدى. جاردەمگە مۇقتاج ۇل-قىزدارعا قول ۇشىن بەرۋ ماقساتىندا ءتۇرلى جۇمىستار اتقارامىز. قاتارىمىزداعى ەرىكتىلەر شاھارداعى ساۋدا ورىندارىمەن كەلىسىپ, ورتالىققا كيىم-كەشەك جەتكىزىپ تۇرادى. تۇرمىسى تومەن جانە كوپ بالالى وتباسى مۇشەلەرىنە ولاردى تەگىن ۇسىنامىز. بۇدان بولەك, بالاقايلاردى ساياباقتا قىدىرتىپ, بۋرابايعا اپارامىز. يپپوتەراپيامەن, كانيستەراپيامەن شۇعىلداندىرامىز, – دەدى استانا قالاسىنىڭ مۇگەدەك بالالار قوعامى توراعاسىنىڭ ورىنباسارى ايگۇل بولاتوۆا.
سىيلىق قۇشاقتاعان سابيلەردىڭ بال-بۇل جانعان جۇزدەرىن كورىپ, ءبىزدىڭ دە ءىشىمىز جىلىدى. اتا-انالارى دا ءدان ريزا. «ورتالىقپەن تانىسقانىمىزعا ءبىر جىلداي ۋاقىت بولدى. ەشقانداي مەرەكەدەن قۇر قالدىرعان ەمەس. دەمەۋشىلەرگە العىستان باسقا ايتارىمىز جوق» دەپ اعىنان اقتارىلدى اقتىلەك اتتى بوبەكتىڭ اناسى جۇلدىز الداجارقىزى. مەرەكە سوڭىندا بالالار اسپانعا قىزىلدى-جاسىلدى شارلار ۇشىرىپ, داستارقاننان ءدام تاتتى.
بوتاگوز ماراتقىزى
