استانا قالاسى بويىنشا مەملەكەتتىك قىزمەت ىستەر دەپارتامەنتىنىڭ باسشىسى تىلەگەن قاسكيننىڭ توراعالىعىمەن «سىبايلاس جەمقورلىققا قارسى مادەنيەت-مەملەكەتتىك مۇلىكتى باسقارۋدىڭ تيىمدىلىگىن قامتاماسىز ەتۋدىڭ نەگىزى» تاقىرىبىندا كونفەرەنتسيا بولىپ ءوتتى. جيىنعا مەملەكەتتىك قىزمەتكەرلەر, قوعامدىق ۇيىمدار مەن باق وكىلدەرى قاتىستى.
استانا قالاسىنىڭ مەملەكەتتىك مۇلىك جانە جەكەشەلەندىرۋ دەپارتامەنتى زاڭدى تۇلعالاردىڭ مەملەكەتتىك مۇلىكتى ماقساتقا ساي جانە ءتيىمدى پايدالانۋىن قامتاماسىز ەتۋدى ىسكە اسىرادى. دەپارتامەنت باسشىسىنىڭ ورىنباسارى ەربولات جاڭبىرباەۆ مەكەمەدە سىبايلاس جەمقورلىققا قارسى جۇرگىزىلگەن شارالار جونىندە باياندادى.
– مەملەكەتتىك قىزمەتتە ادامدارمەن قارىم-قاتىناستى مەيلىنشە ازايتۋ – سىبايلاس جەمقورلىققا جول بەرمەۋدىڭ نەگىزى. مەملەكەتتىك مۇلىكتى ساتىپ الۋ جانە ونى جالعا بەرۋ جۇمىستارى كوممۋنيكاتسيالىق جاڭا تەحنولوگيالار نەگىزىندە جۇزەگە اسىرىلادى. ياعني, مۇلىكتى ساتۋ ينتەرنەت ارقىلى اشىق جۇرگىزىلەدى. بۇرىن اۋكتسيونعا قاتىسقىسى كەلگەن ازاماتتار كوپتەگەن قۇجاتتار جيناپ, ۋاقىت جوعالتاتىن. قازىر كورشى قالادا ءجۇرىپ-اق, قاتىسا بەرۋ مۇمكىندىگى قاراستىرىلعان. ونىڭ ۇستىنە ساتىلىمعا تۇسكەن ءاربىر مۇلىكتىڭ سيپاتتاماسى, باعاسى, تەحنيكالىق جاعدايى الدىن الا سايتقا سالىنادى. سودان بولار, بۇرىن بار-جوعى 15-20 ادام قاتىسسا, ءدال قازىر اۋكتسيونعا قاتىساتىنداردىڭ سانى 100-دەن اسىپ جىعىلادى. بۇل ءوز كەزەگىندە مەملەكەتكە ەداۋىر تابىس اكەلەدى, – دەيدى استانا قالاسى مەملەكەتتىك مۇلىك جانە جەكەشەلەندىرۋ دەپارتامەنتى باسشىسىنىڭ ورىنباسارى ەربولات سەيىتكامالۇلى.
سونداي-اق, جيىندا, «كامەدا» قوعامدىق قورىنىڭ اتقارۋشى ديرەكتورى م.ەسپەنوۆا, «ساندج» زەرتتەۋ ورتالىعىنىڭ ديرەكتورى ج.جاندوسوۆا جانە تاعى باسقا ازاماتتار سىبايلاس جەمقورلىقپەن كۇرەسۋدىڭ ءتيىمدى جولدارى تۋرالى باياندادى.
گۇلميرا ايماعانبەت
