مەملەكەت جاھانتوردى «جۇگەندەمەيدى»

«ۇكىمەتتىڭ قاۋلىسى مەملەكەتكە ەشقانداي جاڭا وكىلەتتىكتەر بەرمەيدى. 2004 جىلدان بەرى قولدانىلىپ كەلە جاتقان قۇجات مەملەكەتتىك ورگانداردىڭ توتەنشە جاعدايداعى كوممۋنيكاتسيالىق جۇمىسىن رەتتەيدى. الەمدىك تاجىريبەدە مۇنداي بار. ۇكىمەتتىڭ قاۋلىسى «جاھانتوردى جانە الەۋمەتتىك جەلىلەردى «جۇگەندەمەيدى». بۇل تاقىرىپتى كەيبىر ادامدار ءوز ماقساتىنا پايدالانىپ قالعىسى كەلىپ وتىر». اقپارات جانە كوممۋنيكاتسيالار ءمينيسترى داۋرەن اباەۆ Facebook-تەگى پاراقشاسىندا ۇكىمەتتىڭ جاڭا قاۋلىسىن وسىلاي ءتۇسىندىرىپ بەردى. ول جاھانتوردىڭ «جەلى جانە بايلانىس قۇرالى» ساناتىنا كىرگەنىنە قاراماستان مەملەكەتتىڭ جاھانتوردى «جۇگەندەۋىن» اقىلعا سىيمايتىن ىسكە بالادى.
ۇكىمەتتىڭ جاڭا قاۋلىسىنا سايكەس, بۇدان بىلاي ءىىم, ۇقك, باس پروكۋراتۋرا جانە قورعانىس مينيسترلىگى توتەنشە جاعداي ورىن العاندا جەلىلەر مەن بايلانىس قۇرالدارىنىڭ قىزمەتىن بۇعاتتاي الادى. مەملەكەتتىك قىزمەت ىستەرى جانە سىبايلاس جەمقورلىقپەن كۇرەس اگەنتتىگى, مەملەكەتتىك كۇزەت قىزمەتى, مونوپولياعا قارسى كوميتەتپەن قاتار, بارلىق مينيسترلىكتەردىڭ باسقارمالارى مەن بولىمدەرى كىرگەن بۇرىنعى تىزىمدە 22 مەملەكەتتىك ورگان بولعان. «شىن مانىسىندە بۇل قاۋلى مەملەكەتتىك ورگانداردىڭ سانىن قىسقارتتى. بۇرىنعى تىزىمدە مادەنيەت جانە سپورت, اۋىل شارۋا­شىلىعى, ءبىلىم جانە عىلىم مينيستر­لىگىنىڭ قۇرىلىمدىق بولىمشەلەرى دە سونداي قۇقىققا يە بولاتىن. ەندى ولار توتەنشە جاعدايدىڭ زارداپتارىن جويۋعا عانا قاتىسادى» دەدى د.اباەۆ.
ءمينيستردىڭ پايىمداۋىنشا, مەملەكەت عالامتوردى بۇعاتتاۋعا ەمەس, اقپارات جەلىلەرىن قامتۋعا نازار اۋدارىپ وتىر. دەسەك تە, ۇكىمەتتىڭ قۇجاتىندا قانداي دا ءبىر الەۋمەتتىك, تابيعي جانە تەحنوگەندىك سيپاتتاعى توتەنشە جاعداي بولا قالسا, 4 كۇشتىك قۇرىلىمنىڭ جەلىلەر مەن بايلانىس قۇرالدارىن پايدالانۋعا, بۇعاتتاۋعا قۇقىعىنىڭ بار ەكەنى تايعا تاڭبا باسقانداي ەتىپ جازىلعان. «توتەنشە جاعدايدا مەملەكەتكە بارلىق بايلانىس ارنالارى حالىقتى قۇلاقتاندىرۋعا قاجەت بولارى ءسوزسىز. مىسالى, تەلەديدار مەن راديو. بۇل قاۋلى مەملەكەتكە قازاقستان اۋماعىندا حابار تاراتاتىن كەز كەلگەن تەلە نەمەسە راديوارنانى ادامدارعا توتەنشە جاعدايدىڭ قاۋپى جونىندە اقپارات تاراتۋعا پايدالانۋعا مۇمكىندىك بەرەدى. بيلىكتىڭ «باسىمدىقپەن پايدالانۋى» دەگەنىن وسىلاي ءتۇسىنۋىمىز كەرەك» دەپ جازدى داۋرەن اباەۆ.
قۇزىرلى ۆەدومستۆونىڭ باسشىسى بۇعان دەيىن ەلىمىزدە Telegram-دى بۇعاتتاۋدىڭ ىقتيمالدىلىعىن جوققا شىعارعان بولاتىن. «مەملەكەتتىڭ قۇقىق بۇزاتىن كونتەنتتى تاراتۋمەن كۇرەسۋدە بۇعاتتاۋعا بارۋى – امالسىزدان جاسالاتىن شارا. ەگەر دە Telegram-نىڭ اكىمشىلىگى ءبىزدىڭ حابارلامامىزعا قۇلاق اسپاسا, مۇنداي ارەكەتكە بارۋىمىز مۇمكىن. بىراق باق-تار جازعانداي, اتالعان مەسسەندجەردىڭ بۇعاتتالۋ مۇمكىندىگى از» دەپ جاۋاپ بەردى مينيستر پاۆلودارلىق ازاماتتىڭ شاعىمىنا. ايتپاقشى, ونىڭ Telegram-ىن ءوز كەلىسىمىنسىز بىرەۋلەر ەلىمىزدە تىيىم سالىنعان ەكسترەميستىك قدت-نىڭ توبىنا قوسىپ قويىپتى.