كەشە اكىمدىكتە قالا باسشىسى باقىت سۇلتانوۆتىڭ توراعالىعىمەن مەملەكەتتىك باعدارلامالاردىڭ ىسكە اسىرۋ جولدارىن تالقىلاعان جيىن ءوتتى.
الدىمەن كۇن تارتىبىندە 2016-2019 جىلدارعا ارنالعان دەنساۋلىق ساقتاۋدى دامىتۋ باعدارلاماسىنىڭ جۇمىسى ءسوز بولدى. بۇل ماسەلە جايىندا اكىمنىڭ ورىنباسارى نۇرلان نۇركەنوۆ بايانداما جاسادى. ونىڭ ايتۋىنشا, سوڭعى ءۇش جىلدا تۇرعىنداردىڭ مەديتسينالىق كومەك كورسەتۋدىڭ ساپاسىنا كوڭىلدەرى تولارلىق. 2017 جىلدىڭ قورىتىندىسى بويىنشا باس قالادا ادامنىڭ ءومىر ءسۇرۋ ۇزاقتىعى 76,2 جاسقا جەتكەن.
اكىم ورىنباسارى ن.نۇركەنوۆ ەلىمىزدەگى تۇرعىنداردىڭ جاسىن ۇزارتۋ بويىنشا ەلوردا الدىڭعى ورىندا ەكەنىن ايتتى. بۇل باس قالاداعى مەديتسينا سالاسىنداعى اتقارىلعان جۇمىستاردىڭ ناتيجەسىندە جاقسارىپ وتىر. سونداي-اق ەلوردادا سابيلەردىڭ ومىرگە كەلۋ دەڭگەيى جوعارى. ءتۇرلى اۋرۋلاردان بولاتىن ءولىم-ءجىتىم دە ازايعان.
ودان كەيىن قالا بيۋدجەتىنىڭ ورىندالۋى, 2016-2019 جىلدارعا ارنالعان ءبىلىم جانە عىلىمدى دامىتۋ مەملەكەتتىك باعدارلاماسىنىڭ جۇمىسى دا تالقىلاندى.
ەلوردا باسشىسى ءوز سوزىندە مەكتەپتەردەگى وقۋشىلاردىڭ شامادان تىس تولىق بولۋى دا وزەكتى ماسەلەنىڭ ءبىرى ەكەندىگىن اتاپ ءوتتى. جيىن بارىسىندا استانا اكىمى ءوز ورىنباسارلارىنا ينۆەستيتسيالىق جوبالاردىڭ ىسكە اسىرىلۋىن ۋاقىتىلى قامتاماسىز ەتۋدى تاپسىردى. «ءبىز ءسوز ەتكەن باعدارلامالار جۇمىسى بيىل اياقتالادى. الدىمىزدا از عانا ۋاقىت قالدى. وعان دەيىن ءبىراز شارۋالاردى ءبىتىرۋىمىز قاجەت. ەڭ باستىسى, بۇل شارالاردىڭ ءبارى الەۋمەتتىك سالاعا قاتىستى بولىپ وتىر» دەدى باقىت سۇلتانوۆ.
وتىرىستا قالاداعى جاۋعان قاردى شىعارۋ ماسەلەسى دە نازاردان تىس قالمادى. قوعامدىق دامۋ ىستەرى باسقارماسىنىڭ باسشىسى دانيار ەسين ناۋرىز مەرەكەسى قارساڭىندا شاھاردى بەزەندىرۋ جۇمىستارى تۋرالى بايانداما جاسادى.
