ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءبىر توپ ستۋدەنتى پايدالى جوبانى قولعا الىپتى. ولار جارامسىز باننەرلەردەن تۇرمىستىق زاتتار تىگىپ, پلاستيك بۇيىمدارعا ەكىنشى ءومىر سىيلاۋدا.
– قازىرگى كۇنى قوقىسقا كوپ كەتەتىن دۇنيەلەردىڭ ءبىرى – باننەرلەر. ويتكەنى جارناما ىلەتىن كومپانيالار جەتەرلىك, ال ولار مەرزىمى جاعىنان تەز ەسكىرەدى. ءبىز سونداي جارامسىز باننەرلەردى جيناپ, ودان كوسمەتيكا سالاتىن قالتاشا, قالامساۋىت, قىزدارعا ارنالعان سومكە, كىتاپ-داپتەردىڭ جانە چەموداننىڭ قابى سەكىلدى تۇرمىسقا قاجەتتى دۇنيەلەردى ءازىرلەيمىز, – دەيدى كوماندانىڭ مۇشەسى ۇلبولسىن بايبەك.
جاستار باستاپقىدا قۇرالداردى قولدان تىككەن, كەيىنىرەك ءبىر اتەلەمەن كەلىسكەن. ويتكەنى كاسىبي تىگىنشىلەر تاۋار ساپاسىنىڭ جاقسى ءارى سىرت
كورىنىسىنىڭ ادەمى بولۋىنا كوپ كومەكتەسەتىنىن تۇسىنگەن. جوبا اۆتورلارىنىڭ ءبىرى ايدانا كاسانوۆانىڭ ايتۋىنشا, ستۋدەنتتەر بىرنەشە جارنامالىق اگەنتتىكپەن كەلىسىمشارت ورناتىپتى. ياعني ولار قاجەتسىز باننەرلەرىن بەرىپ وتىرادى. شيكىزاتتى تەگىن الاتىندىقتان, تاۋارلاردىڭ باعاسى دا بازارداعى باسقا انالوگتارىنا قاراعاندا الدەقايدا ارزان. ماسەلەن, ءبىر قالامساۋىتتىڭ وزىندىك قۇنى 284 تەڭگە تۇرادى. بۇعان سىرعىتپا, تۇيمە سەكىلدى دەتالدار, ءىشىن قاپتايتىن ماتا جانە تىگىنشىنىڭ جۇمىسى كىرەدى.
