مەملەكەتتىك ناگرادالار تاپسىرىلدى
6 ءساۋىر كۇنى اقوردادا نۇرسۇلتان نازارباەۆتىڭ جارلىعىمەن بىرنەشە اسكەري ادامعا ءوز قىزمەتتەرىنە ادالدىعى ءۇشىن جانە اسكەري بورىشىن اتقارۋ كەزىندە باتىلدىق تانىتقانى ءۇشىن مەملەكەتتىك ناگرادالار تاعايىندالىپ, ەلباسى ولاردى ءوز قولىمەن ماراپاتتادى.
وتان قورعاۋشىلار كۇنىنە ورايلاستىرىلعان شارادا ءسوز سويلەگەن پرەزيدەنت: «سىزدەر تەك ءوز قىزمەتتەرىڭىزدى عانا ەمەس, ازاماتتىق بورىشتارىڭىزدى دا ابىرويمەن اتقاردىڭىزدار, جاستارعا ۇلگى بولدىڭىزدار. سىزدەردىڭ ىستەرىڭىز – ءوز حالقىن ءسۇيۋدىڭ جانە وعان ادال بولۋدىڭ ۇزدىك ۇلگىسى» دەپ, اسكەريلەرگە ۇلكەن سەنىم ءبىلدىردى.
جالپى قورعانىس, ىشكى ىستەر جانە توتەنشە جاعدايلار ءجونىندەگى مينيسترلىكتەر, ۇلتتىق قاۋىپسىزدىك كوميتەتى, مەملەكەتتىك كۇزەت قىزمەتى, «سىربار» سىرتقى بارلاۋ قىزمەتى, ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى (قارجى پوليتسياسى), باس پروكۋراتۋرا جانە قازاقستاننىڭ ىشكى ىستەر ورگاندارى مەن ىشكى اسكەرلەرى ارداگەرلەرىنىڭ ۇيىمىنىڭ اتىنان بارلىعى 60 ادام ناگراداعا ۇسىنىلعان بولاتىن. سولاردىڭ ىشىندە ءىى دارەجەلى «داڭق» وردەنىمەن م.احمەتجانوۆ, ب.بەردالين, ا.دجۋماكەەۆ, م.ءيسادىلوۆ, م.ىسقاقوۆ جانە ن.ورمانبەتوۆ ماراپاتتالسا, ءىى دارەجەلى «ايبىن» وردەنىنە ر.جامبىلوۆا, س.كليمچۋك, ا.مۇقاتاەۆ, ە.سماعۇلوۆتار لايىق دەپ تانىلدى.
ال, ءىىى دارەجەلى «ايبىن» وردەنىن ج.بايانباەۆ, ب.موينوۆ, يۋ.نوۆوسەلتسەۆ, ع.تويشىباەۆتار يەلەندى. «ەرلىگى ءۇشىن» مەدالىمەن و.باۋكەن, م.ءدۇيسەنباەۆ, ە.نۇرعاليەۆ, «جاۋىنگەرلىك ەرلىگى ءۇشىن» مەدالىمەن ا.اسانباي, د.گروتس, يۋ.ەۆدوكيموۆ سەكىلدى ازاماتتار ناگرادتالدى.
نۇريسلام قۇسپانعالي