مەن بابام داۋلەتبەكتەن ءبىر عاسىر كەيىن دۇنيەگە كەلىپپىن. بىزگە ارناپ ەركىن اتام «ءبىر عاسىر» دەگەن ەستەلىك كىتاپ شىعاردى. بابام حح عاسىردىڭ اۋمالى-توكپەلى زامانىندا دۇنيەگە كەلسە, مەن ءححى عاسىردا – قازاق حالقى اڭساعان ەگەمەندىكتىڭ العاشقى جىلدارىندا دۇنيە ەسىگىن اشىپپىن.
ءوزىمدى «اجەمنىڭ بالاسىمىن» دەپ ايتا الامىن. ولاي دەيتىنىم, 4-سىنىپتى بىتىرگەنشە اجەم حاميلا قۇلبەكقىزىنىڭ قامقورلىعىندا بولدىم. ارينە, كىشكەنتاي كەزىمدى ونشا بىلە قويمايمىن. بىراق انام ءلايلانىڭ ايتۋىنشا, اجەم اناما جاس ءسابيدى قالاي شومىلدىرىپ, تاماقتاندىرىپ, الپەشتەۋدى ۇيرەتە وتىرىپ, مەنى ءوز قامقورلىعىنا الىپتى. ويتكەنى اجەم – التى بالا تاربيەلەپ وسىرگەن ارداقتى جان. ءبارى دە جوعارى ءبىلىم الىپ, وتباسىن قۇرىپ, حالقىنا ادال قىزمەت اتقارىپ جۇرگەن جاندار. ونىمەن قوسا, مەن ۇل بالادان تۋعان ءبىرىنشى ۇرپاعىنىڭ جالعاسى ەكەنمىن. الدىمەن ءوز بالالارىن, ارتىنشا نەمەرەلەرىن مەكتەپكە دايىنداعان اسىل اجەم – 52 جىل ۇستاز بولعان كىسى, «كۇمىس القا», «ءبىلىم سالاسىنىڭ ۇزدىگى» توسبەلگىلەرىنىڭ يەگەرى.
اجەم حاميلا مەنى ماتەماتيكا ءپانىن سۇيۋگە قالاي بەيىمدەگەنى ءالى ەسىمدە. ماتەماتيكاعا قاتىستى كىتاپتاردى ماعان وقىپ, ءتۇسىندىرىپ وتىراتىن. وسى كۇنگە دەيىن ەسىمدە قالعانى – كوبەيتۋ كەستەسىن ۇيرەتكەنى. كەستەنىڭ كەز كەلگەن جەرىنەن سۇراق قويىپ, جاۋاپ بەرە الماسام, ەستە ساقتاۋدىڭ ءادىسىن ۇيرەتەدى. وسىلايشا ماتەماتيكاعا ىنتام ارتا باستادى. باستاۋىش سىنىپتى بىتىرگەن سوڭ رەسپۋبليكالىق فيزيكا-ماتەماتيكا مەكتەبىنە وقۋعا ءتۇستىم.
اجەم ءوز نەمەرە, شوبەرەلەرىن عانا ەمەس, ءبىر كەزدەرى ءوزى ساباق بەرگەن شاكىرتتەرىن دە ەرەكشە جاقسى كورەدى. بىردە ماعان مەكتەپپەن قوشتاساردا وقۋشىلارى جازعان حاتىن كورسەتتى. جاس ۇستازدارعا دا قامقورشى بولىپتى.
الدا كەلە جاتقان 8 ناۋرىز مەرەكەسى قارساڭىندا اجەمدى قۇتتىقتاي وتىرىپ, ءبىر اۋىز ولەڭ ارناپ ەدىم:
تۋعان جەر, اسىل اجەم, بەسىك جىرىم,
وزىڭدە ءوتىپ ەدى ءسابي كەزىم.
ەڭ العاش ءتاي-ءتاي باسىپ جۇرگەنىمدە,
كوتەرىپ, دەمەدىڭ عوي مەنى ءوزىڭ.
يبراھيم ەركىن,
استانا قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 8-سىنىپ وقۋشىسى
