ۇلتتىق كيىم – ۇلتىمىزدىڭ ۇلىلىعىن ۇلىقتايتىن, ۇلتتىق كودىمىزدى بىلدىرەتىن ايشىقتى كورسەتكىش. ۇلتتىق كيىمدەرىمىزدىڭ مول مۇراسىمەن ماقتانا الاتىنداي ەلمىز. باسقا كيىمدەردى ايتپاعاندا, ءبىر عانا باس كيىمنىڭ قازاق حالقىندا 20-دان استام ءتۇرى بار. بۇگىندە ۇلتتىق كيىم وزىمىزدە عانا ەمەس, وزگە ەلدەردە دە كەڭىنەن ۇلىقتالۋ ۇستىندە. الەۋمەتتىك جەلىدە قىتايدا قازاق جىگىتىنىڭ ۇلتتىق كيىممەن كوشەدە ءجۇرىپ ەلدىڭ نازارىنا تۇسكەن ۆيدەوسى 5 ميلليونعا جۋىق قارالىم جيناپ, حالىقتىڭ ىستىق ىقىلاسىنا بولەنگەن.
ەلدە ۇلتتىق كيىمدى ناسيحاتتاۋ تەك ءبىر رەتتىك چەللەندجدەرمەن, اكتسيالارمەن عانا شەكتەلۋدە. سوڭعى ۋاقىتتا جالپى حالىق اراسىندا «ۇلتتىق سەزىم» جالپىۇلتتىق اكتسياسى باستالىپ, ەل اراسىندا كەڭىنەن قولداۋ تاۋىپ كەلەدى. اكتسيانى زيالى قاۋىم وكىلدەرى, جۋرناليستەر مەن بلوگەرلەر, وقۋ وردالارى قولداپ, اپتانىڭ ءار جۇماسىندا ۇلتتىق ناقىشتاعى كيىمدەردى كيىپ جۇرگەندەر قاتارى كوبەيدى. وسى اكتسيانى باستاعان ازاماتتارعا ەرەكشە العىسىمدى بىلدىرەمىن. ۇلتتىق كيىم مادەني مايداننىڭ نەگىزگى قارۋى, حالىق ساناسىنا اسەر ەتۋشى كۇش ەكەنىن ەسكەرسەك, بۇل ماسەلەگە ءۇستىرتىن قاراۋعا بولمايدى.
«ۇلتتىق كيىمدەردى تەك ناۋرىزدا عانا ەمەس, جاي كۇندەرى دە ءجيى كيىپ ءجۇرۋىمىز كەرەك» دەپ پرەزيدەنتىمىز دە ۇندەۋ تاستاعان ەدى. الداعى ۋاقىتتا ۇلتتىق ناقىشتاعى كيىم كيۋ ءداستۇرىن تەك ناۋرىزبەن, ءبىر رەتتىك شارالارمەن عانا شەكتەمەي, ونى ترەندكە اينالدىرۋ قاجەت. ماسەلەن, باۋىرلاس قىرعىز حالقى باسىنان ايىر قالپاعىن تاستامايدى. سوعان قاراپ-اق ونىڭ قىرعىز ەكەنىن جازباي تانيسىڭ. ءتىپتى جوعارعى كەنەشتىڭ وزىندە دەپۋتاتتارى ايىر قالپاعىن كيىپ وتىرادى. ول قالا بەردى ۇلتتىق كيىمدەرىن ساقتاۋ ماقساتىندا 5 ناۋرىزدى ايىر قالپاق كۇنى دەپ مەملەكەتتىك دەڭگەيدە بەكىتىپ, يۋنەسكو-نىڭ ماتەريالدىق ەمەس مادەني مۇرالارىنىڭ تىزىمىنە ەنگىزگەن. مۇنداي كۇن تەك قىرعىزستاندا عانا ەمەس, الەمنىڭ برازيليا, يسپانيا, شوتلانديا, جاپونيا سىندى الپاۋىت ەلدەرىندە بار. كورشىلەس وزبەك حالقى دا الا تاقياسى مەن شاپانىن كۇندەلىكتى كيەدى. سول سەكىلدى شەشەن حالقى دا ەلتىرى بورىگىمەن ەرەكشەلەنەدى.
ءبىز دە ءوز ۇلتتىق كيىمىمىزدى ءوزىمىز كيۋدى سانگە اينالدىرماساق, بىرتىندەپ ولاردى باسقالار يەمدەنىپ كەتۋى مۇمكىن. سوڭىندا شاپانىمىزدان ايىرىلىپ, قامشىمىزدى عانا ۇستاپ قالمايىق. جوعارىدا ايتىلعانداردى قورىتا كەلە, ۇكىمەتكە مىناداي ءىس-شارالاردى قولعا الۋدى ۇسىنامىن:
بىرىنشىدەن, ۇلتتىق كيىمدەرىمىزدى ۇلىقتاۋ ماقساتىندا رەسپۋبليكالىق دەڭگەيدە «ۇلتتىق كيىم» كۇنىن بەكىتۋ. بۇل كۇن مادەني قۇندىلىقتارىمىزدى كەڭىنەن ناسيحاتتاپ, وسكەلەڭ ۇرپاقتى وتانشىلدىققا تاربيەلەۋدىڭ نەگىزى بولار ەدى.
ەكىنشىدەن, مەملەكەتتىك قىزمەتكەرلەر مەن حالىققا قىزمەت كورسەتەتىن ورتالىق قىزمەتكەرلەرىنىڭ كيىمدەرىنە قازاقي ويۋ-ورنەك ەلەمەنتتەرىن قوسۋ.
ۇشىنشىدەن, ۇلتتىق كيىم وندىرەتىن وتاندىق كاسىپكەرلەرگە مەملەكەت تاراپىنان قولداۋ كورسەتىپ, بيزنەستى قولداۋعا باعىتتالعان گرانتتارعا, ۇلتتىق كيىم كاسىبىنە باسىمدىق بەرۋ. حالىق اراسىندا ۇلتتىق كيىمدى قولجەتىمدى ەتۋگە ىقپال ەتىپ, سۇرانىستى ارتتىرۋ.
تورتىنشىدەن, مەكتەپ وقۋشىلارى كيەتىن ۇلتتىق كيىمدەر ستاندارتىن ازىرلەپ ەنگىزۋ ءارى حالىقارالىق ءتۇرلى جارىستارعا (عىلىمي وليمپيادا, سپورت) باراتىن ازاماتتاردىڭ فورمالارىنا مىندەتتى تۇردە ۇلتتىق ناقىش بەينەلەۋ.
داۋلەت مۇقاەۆ,
ءماجىلىس دەپۋتاتى
