اكىمدىكتىڭ ءباسپاسوز ورتالىعىندا «مەملەكەتتىك قىزمەت كورسەتۋدىڭ ساپاسىن ارتتىرۋ» تاقىرىبىندا بريفينگ ءوتتى.
بريفينگكە قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتىنىڭ باسشىسى تىلەگەن قاسكين, دەنساۋلىق ساقتاۋ باسقارماسىنىڭ باسشىسى كامالجان نادىروۆ پەن ءبىلىم باسقارماسىنىڭ باسشىسى ءانۋار جانعوزين جانە جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ساۋلە نۇرعوجينا قاتىستى.
جيىن بارىسىندا سپيكەرلەر وزدەرى باسشىلىق جاسايتىن مەكەمەلەردە وتكەن جىلى قانشا مەملەكەتتىك قىزمەت كورسەتىلگەنىن اتاپ ءوتتى. سونىمەن قاتار جيىندا تۇرعىنداردىڭ ۋاقىتىن ءتيىمدى پايدالانۋى ءۇشىن ءتۇرلى پيلوتتىق جوبالاردىڭ ەنگىزىلىپ جاتقانى ءسوز بولدى.
– بالالاردى بالاباقشاعا, مەكتەپكە قابىلداۋ, بالا اسىراپ الۋ نەمەسە پاتروناتتىق قامقورلىققا الۋ, كوللەدجدەرگە قۇجات تاپسىرۋ سياقتى ءبىلىم باسقارماسىندا مەملەكەتتىك قىزمەت كورسەتۋدىڭ 37 ءتۇرى بار. مىسالى, وتكەن جىلى 150 مىڭعا جۋىق مەملەكەتتىك قىزمەت كورسەتىلدى, – دەدى ءوز كەزەگىندە ءانۋار جانعوزين.
تۇرعىنداردى مەكەمە تابالدىرىعىن توزدىرماي, ۇيلەرىندە وتىرىپ-اق egov.kz ەلەكتروندى ۇكىمەت پورتالى ارقىلى بارلىق قىزمەت ءتۇرىن الۋعا شاقىرعان سپيكەرلەر مەملەكەتتىك ورگانداردىڭ حالىققا ءمىنسىز قىزمەت كورسەتۋى باستى مىندەت ەكەنىن العا تارتتى.
تىلشىلەردىڭ سۇراقتارىنا جاۋاپ بەرۋ كەزىندە كامالجان نادىروۆ مەديتسينا سالاسىندا قىزمەت كورسەتۋدە جاڭاشىلدىق كوپ ەكەنىن باياندادى. ونىڭ ايتۋىنشا, بۇدان بىلاي كەز كەلگەن ەلوردالىق بۇرىنعى مەديتسينالىق تەكسەرىستەرىنىڭ قورىتىندىسىن ەلەكتروندىق بازادان وڭاي تابا الادى. بۇل اقپارات ونىڭ وزىنە دە, دارىگەرگە دە قولجەتىمدى بولماق. ناتيجەسىندە بۇل ءۇردىس قاعازباستىلىقتان ارىلتاتىن كورىنەدى.
