باستاماشى توپ ەلوردالىقتاردى سۋ تاسقىنىنان زارداپ شەككەن شىعىس قازاقستان وبلىسىنىڭ اۋىل-ايماقتارىنا كومەك قولىن سوزۋعا شاقىرادى. كومەككە كيىم-كەشەك, ازىق-تۇلىك جانە قارجىلاي كومەك قابىلدانادى.
ايتا كەتەيىك, 10 ناۋرىز كۇنى قار سۋى مەن جاۋىن-شاشىن سالدارىنان شىعىس قازاقستان وبلىسىنىڭ اياگوز اۋدانىن سۋ باستى. رەسمي مالىمەتكە سۇيەنسەك, بۇگىندە اياگوز, ءۇرجار, كۇرشىم, ۇلان, گلۋبوكوە, زايسان اۋداندارى سۋ قۇرساۋىندا قالىپ, تۇرعىندار قاۋىپسىز جەرلەرگە كوشىرىلدى.
وسىعان وراي, استانادا تۇراتىن شىعىسقازاقستاندىقتار باستاما كوتەرىپ, ءۇي-جايلارى سۋ استىندا قالعان جەرلەستەرىنە كومەك جيناۋدا.
«بىزگە جەتكەن اقپاراتقا سايكەس, بۇگىنگە اياگوزدىڭ وزىندە 400-گە جۋىق ادام قاۋىپسىز جەرگە كوشىرىلدى. ءوزىم سول ەلدىڭ تۋماسىمىن. كەشەدەن بەرى ەل بولىپ كومەك جيناپ, قىزىل سۋدان زارداپ شەككەن اۋىلدارعا جونەلتۋدى ءجون كوردىك. تەك جەرلەستەر عانا ەمەس, كەز كەلگەن ەلوردالىقتار قاتىسا الادى. اقشالاي كومەكپەن بىرگە ازاق-تۇلىك, كيىم-كەشەكتەر قابىلدانادى» دەدى باستاماشىل توپتىڭ مۇشەسى مەدەت شامەنوۆ.
ونىڭ ايتۋىنشا, قازىر جينالعان زاتتار مەن ازىق-تۇلىكتەردى ەلگە جەتكىزۋ ماسەلەسى شەشىلىپ جاتىر.
«بۇل باستامانى قولعا العانىمىزعا ءبىر-اق كۇن. قازىردىڭ وزىندە حالىق تەلەفونمەن حابارلاسىپ, كومەكتى قالاي كورسەتسەك دەپ سۇراپ جاتىر. ازىرگە ارنايى ەسەپشوت جوق. اۋدارىلعان اقشانىڭ اشىقتىعىن قامتاماسىز ەتۋ ماقساتىندا شوت اشساق پا دەپ وتىرمىز. سونداي-اق, شقو-نىڭ اكىمدىگىمەن كەلىسەمىز. جينالعان زاتتاردى ەلگە جەتكىزىپ بەرۋ ءۇشىن جەرلەستەر كولىك جالدايمىز دەپ وتىرمىز» دەدى ول.
سۋ باسقان شىعىس قازاقستان وبلىسىنا كومەك كورسەتەمىن دەگەن استانالىقتار 8701 400 5026 ءنومىرى بويىنشا مەدەت شامەنوۆكە حابارلاسا الادى.
بۇل ماسەلەگە قاتىستى قازاقستان مۇسىلماندارى ءدىني باسقارماسى پىكىر ءبىلدىردى. اتاپ ايتقاندا, باسقارما ەلوردالىقتاردى «قايىرىمدىلىق كەرۋەنى» شاراسىن قولداۋعا ۇندەدى. بۇگىننەن باستاپ استانانىڭ بارلىق مەشىتتەرىندە سۋ تاسقىنىنان زارداپ شەككەندەرگە كومەك زاتتارىن قابىلداۋ بەكەتتەرى اشىلادى.
