استانادا ۇلىستىڭ ۇلى كۇنى قارساڭىندا ۇلتتىق قۇندىلىقتاردى دامىتۋعا ۇلەس قوسقاندارعا ارنالعان رەسپۋبليكالىق «ناۋرىز-2024″ ۇلتتىق سىيلىعىنىڭ ماراپاتتاۋ ءراسىمى ءوتتى. ءىس-شارادا ۇلتتىق قۇندىلىقتاردى دامىتۋعا ۇلەس قوسقاندار ماراپاتتالدى, دەپ حابارلايدى astana-akshamy.kz.
بيىل «ۇزدىك ۇلتتىق ەتنو كيىم ديزاينەرى», «ۇزدىك ۇلتتىق بي ءانسامبلى», «ۇزدىك ۇلتتىق تاعام ءوندىرۋشى», «ۇزدىك ەتنو فولكلورلىق ۇجىم», «ۇزدىك توعىزقۇمالاقشى», «ۇزدىك قۇسبەگى», «ۇزدىك يت باپتاۋشى», «ۇزدىك اتبەگى» جانە «ۇزدىك ات سپورتى شەبەرى» سىندى توعىز نوميناتسيا بويىنشا جەڭىمپازدارعا سىيلىق تابىستالدى.
مىسالى, «ۇزدىك ۇلتتىق ەتنو كيىم ديزاينەرى» نوميناتسياسى بويىنشا ماراپاتتالعان قايرۋللا ءابىشوۆ ديماش قۇدايبەرگەنگە شاپان تىككەن. «ديماش قۇدايبەرگەننىڭ اق, التىن ءتۇستى كوستيۋمدەرىن تىككەنمىن. بۇعان دەيىن وسى بايقاۋ تۋرالى كوپ ەستىدىم. بيىل ۇلتتىق ديزاينەرلەردىڭ قاتارعا قوسىلعانىن ەستىپ, قاتتى قۋاندىم, – دەدى ول.
«ۇزدىك ۇلتتىق بي ءانسامبى» نوميناتسياسى بويىنشا شىمكەنتتىك «قازىنا» بي ءانسامبلى ۇزدىك دەپ تانىلدى. «ءبىزدىڭ ۇجىم قۇرامىندا 14 قىز بەن 10 ەر بالا بار. رەسپۋبليكالىق جانە حالىقارالىق بايقاۋلاردا جەڭىمپاز اتانىپ ءجۇرمىز», – دەدى زاۋرە اشىربەكوۆا.
ال رامازان اقساقال اتا-بابادان قالعان ءداستۇر بويىنشا تازى باپتاپ ءجۇر. «اتام دا, اكەم دە, ناعاشىم دا تازى باپتاعان. مەن سونى جالعاستىرۋشىمىن. جاس كەزىمدە 5 تازىنى باپتاعانمىن, قازىر 2 تازىم بار. قازاقتىڭ وسى تازىسىن الەم تانىسا دەيمىن», – دەدى رامازان ۇسەەۆ.
«ساندىق» مەيرامحاناسى ۇلتتىق تاعامدار دايىندايتىن مەيرامحانالار اراسىنان ۇزدىك دەپ تانىلدى. «ءبىزدىڭ مەيرامحانا ەل اۋزىندا جۇرگەن سوڭ, وسىنداي نوميناتسيامەن ماراپاتتالىپ وتىرمىز. مەيرامحانا ەرەكشەلىگى – قازاق حالقىنىڭ ءداستۇرىن دارىپتەۋ», – دەدى مەيرامحانانىڭ باس اسپازى ماناس ىسقاق.
ءىس-شارا ونەر مايتالماندارى مەن بەلگىلى شىعارماشىلىق ۇجىمدارىنىڭ مەرەكەلىك كەشىمەن اياقتالدى.
