«حان شاتىر» ساۋدا, ويىن-ساۋىق ورتالىعىندا جاستار جىلى اياسىندا يۋنۋس ەمرە تۇرىك مادەني ورتالىعىنىڭ ۇيىتقى بولۋىمەن جاس قىلقالام شەبەرى نازەركە كەمەلباەۆانىڭ «قازاقستاندىقتار كوزىمەن – تۇركيا» دەپ اتالعان سۋرەت كورمەسى ءوتتى.
كورمەگە دارىندى سۋرەتشىنىڭ گرافيكا تاسىلىمەن سالىنعان 40-قا جۋىق ەڭبەگى قويىلدى. وندا باۋىرلاس تۇرىك ەلىنىڭ وتكەن داۋىرلەردەن سىر شەرتكەن كونە ەسكەرتكىشتەرى مەن تابيعاتى كوركەم جەرلەرى نازىك تالعاممەن بەينەلەنگەن. ولاردىڭ اراسىنان كونيا قالاسىنداعى «مەۆلانا» كەسەنەسى, ىستانبۇلداعى الەمگە تانىمال «ايا سوفيا» مۇراجايى, «قىز» مۇناراسى, «رۋمەلي حيسار» بەكىنىسى, «ەجەلگى ەفەس» قالاسى, «ىسقاق پاشا» سارايى سەكىلدى ەسكى مادەني عيماراتتار اسەمدىگىمەن كوز تارتادى. ءاربىر كارتينادان جاس شەبەردىڭ شىنايى سەزىمى مەن تولعانىسى انىق كورىنەدى. سيقىرلى سان ءتۇرلى بوياۋدى ادەمى سويلەتە بىلگەن. ءبىر عاجابى, نازەركە تۇركياعا بارعان ەمەس. جۇمىستاردىڭ ءبارىن ونىڭ جۇيرىك قيالى مەن شابىتىنان تۋعان تۋىندىلار دەپ ايتۋعا بولادى. نازەركە كەمەلباەۆا 15 جاسىنان باستاپ ەلورداداعى بالالار سۋرەت مەكتەبىندە قوسىمشا ءبىلىم الىپ, بەينەلەۋ ونەرىنىڭ قىر-سىرىن ۇيرەنەدى. قازىر ول قازاق ۇلتتىق ونەر ۋنيۆەرسيتەتىندە ستسەنوگرافيا ماماندىعى بويىنشا وقيدى. بولاشاقتا يلليۋستراتور بولۋدى ارماندايدى. ونىڭ اعايىن ەلدىڭ تاريحىنا تەرەڭ بويلاۋى دا بەكەر ەمەس. ول جايىندا بىزگە ءوزى ايتىپ بەردى.
– تۇرىك رۋحانياتىنا قىزىعۋشىلىعىم كينو الەمىنەن باستالدى. تۇرىكتەر تۇسىرگەن تاريحي فيلمدەردەگى اكتەرلەر, كوركەم مۋزىكا, تاماشا كوستيۋمدەر مەن ديزايندار ماعان ەرەكشە اسەر ەتتى. وسىدان ءبىر جارىم جىل بۇرىن استاناداعى يۋنۋس ەمرە ورتالىعىنا بارىپ, تۇرىكشە ءۇيرەنە باستادىم. ودان سايىن تۇرىك مادەنيەتى مەن ونەرىنە ىنتىعا ءتۇستىم. سودان ءبىراز سۋرەتتەر سالىپ, ۇستازىم احمەت بەيگە كورسەتتىم. ول كىسى مەنىڭ وسىنداي سۋرەتتەر سەرياسىن جالعاستىرا بەرۋىمدى قالادى. كەيىن كورمە وتكىزۋگە دە بولاتىندىعىن ايتتى. ءسويتىپ مەن ءۇشىن بۇل يدەيا شىعارماشىلىققا اينالدى, – دەدى ول. ايتپاقشى, نازەركە ءسوز قونعان وتباسىندا وسكەن. ونىڭ اناسى ايگۇل كەمەلباەۆا – قازاقتىڭ بەلگىلى جازۋشىسى.
كورمەنىڭ اشىلۋىندا تۇركيا رەسپۋبليكاسىنىڭ قازاقستانداعى ەلشىسى نەۆزات ۋيانىك, پارلامەنت سەناتىنىڭ دەپۋتاتى سارسەنباي ەڭسەگەنوۆ, يۋنۋس ەمرە تۇرىك مادەني ورتالىعى ديرەكتورىنىڭ مىندەتىن اتقارۋشى الماگۇل يسينا ءسوز الىپ, جاس سۋرەتشىگە ىزگى تىلەكتەرىن جەتكىزدى.
