ەلوردامىز استانا قالاسىنىڭ ءتورتىنشى اۋدانى – بايقوڭىر اۋدانىنىڭ قۇرىلعانىنا ءبىر جىل تولۋىنا وراي «ەلوردا دامۋىنداعى بايقوڭىر اۋدانىنىڭ الاتىن ورنى» تاقىرىبىندا عىلىمي-تاجىريبەلىك كونفەرەنتسيا مەن قۇتتىقتاۋ شارالارى ءوتتى. ۇلىستىڭ ۇلى كۇنىنە وراي وتكىزىلگەن شاراعا استانا قالاسى ءماسليحاتىنىڭ دەپۋتاتتارى, «نۇر وتان» پارتياسىنىڭ اۋداندىق فيليالىنىڭ, اۋداندىق ارداگەرلەر كەڭەسىنىڭ وكىلدەرى قاتىستى.
بايقوڭىر اۋدانىنىڭ اكىمى ەرلان قاناليموۆ اۋداندا ءبىر جىلدان بەرى ىستەلگەن جۇمىستار مەن وتكىزىلگەن ءىس-شارالارعا توقتالىپ, اۋداننىڭ ينفراقۇرىلىمداردى جاقسارتۋ, تۇرعىنداردىڭ تۇرمىس ساپاسىن كوتەرۋ جاعىندا ىستەلگەن ىستەردى قىسقاشا اتاپ ءوتتى. «اۋدانىمىز قۇرىلعان ءبىر جىلدان بەرى تۇرعىنداردىڭ الەۋمەتتىك-ەكونوميكالىق جاعدايىن جاقسارتۋ ءۇشىن قارقىندى جۇمىس جۇرگىزىلدى. اتاپ ايتقاندا, 400-دەن اسا مادەني, 37 قايىرىمدىلىق شارالار وتكىزدىك. جالپى ۇزىندىعى 16553,6 كم بولاتىن كوشە جولىن سالدىق. 36 كوشە مەن قىسقا كوشەگە ۋاقىتشا جول توسەلدى. 3 گيمناستيكالىق «Street workout» الاڭى سالىندى. اۋلالار اباتتاندىرىلىپ, گۇلزارلار جاسالدى. وسىنىڭ ءبارى – حالىقتىڭ تۇرمىسىن جاقسارتۋ ءۇشىن ىستەلگەن جۇمىستار» دەدى اۋدان اكىمى.
كونفەرەنتسيادا ءسوز العان قاتىسۋشىلار اۋداندا ءبىر جىلدان بەرى ىستەلگەن ىستەرگە وڭ باعالارىن بەرىپ, ۇتىمدى ۇسىنىستارىن دا ورتاعا سالدى. «كوپبالالى انالارعا جاعداي جاساۋ ارقاشان نازاردان قاعىس قالماۋى كەرەك» دەپ ءسوز باستاعان قوعام قايراتكەرى ورازكۇل اسانعازى «بولاشاققا باعدار: رۋحاني جاڭعىرۋ» باعدارلاماسى مەن جاستار جىلى اياسىنداعى ءىس-شارالار حالىقتىڭ رۋحاني تۇرمىسىن بايىتۋعا, انا ءتىلىمىزدىڭ مارتەبەسىن كوتەرۋگە دە باعىتتالۋى كەرەك» دەدى. «اقىلدى» قالا قۇرۋ ءۇشىن قالانىڭ تۇرعىندارى دا اقىلدى بولۋى كەرەك. ال اقىلدى تۇرعىن ەلىمىزدىڭ اتا زاڭىن دا قۇرمەتتەپ, مەملەكەتتىك ءتىلدى جەتىك مەڭگەرۋى شارت. مەن بايقوڭىر اۋدانىنىڭ اكىمشىلىگى مەملەكەتتىك ءتىلدىڭ مارتەبەسىن كوتەرۋگە قاتىستى ماسەلەنى ەشقاشان نازاردان قاعىس قالدىرمايدى دەپ ءۇمىت ەتەمىن» دەدى و.اسانعازى.
ل.گۋميلەۆ اتىنداعى ەۇۋ-دىڭ الەۋمەتتىك-مادەني دامۋ جونىندەگى پرورەكتورى, ۇعا-نىڭ اكادەميگى ديحان قامزابەكۇلى «ەلوردا جانە بايقوڭىر اۋدانىنىڭ بەلەستەرى – «رۋحاني جاڭعىرۋ» اياسىندا» اتتى بايانداما جاساپ, بىرقاتار ماسەلەلەرگە توقتالىپ, بىلاي دەدى: «رۋحاني جاڭعىرۋ» باعدارلاماسىنىڭ قامتيتىن كولەمى دە, مازمۇنى دا وتە كەڭ. ءبىز اتالعان باعدارلاما ارقىلى جاستاردى تۋعان ەلىن, جەرىن سۇيەتىن وتانشىلدىققا باۋلىپ, ەل ءۇشىن ەڭبەك ەتۋگە تاربيەلەيمىز. ارقاشان جاستاردىڭ يدەياسىنا ۇلتتىق تاعىلىمدى ءسىڭىرىپ, ولاردىڭ بويىندا ۇلتتىق جىگەردى جەتىلدىرۋگە دەن قويۋمىز كەرەك. سوندىقتان ءبىز اۋداندا اتقارىلاتىن جۇمىستارعا اتسالىسۋعا دايىنبىز». اۋداننىڭ مەرەيتويىنا ارنالعان كونفەرەنتسيادان كەيىن مەرەكەلىك كونتسەرت وتكىزىلىپ, ونەرپازدار ءان-كۇيدەن شاشۋ شاشتى.
ايتا كەتەيىك, قالا اكىمىنىڭ «شەت ايماقسىز قالا» جوباسى اياسىنداعى جۇمىستاردى جالعاستىرۋ, شاھار ينفراقۇرىلىمىن دامىتۋ جانە جەتىلدىرۋ, شاعىن بيزنەستىڭ وركەندەۋىنە جاعداي جاساۋ, قالا تۇرعىندارىنىڭ الەۋمەتتىك ماسەلەلەرىن جەدەل شەشۋ ماقساتىندا قۇرىلعان بايقوڭىر اۋدانىنىڭ جالپى اۋماعى 18,1 مىڭ گەكتاردى قۇرايدى. تۇرعىندارى 200 مىڭنان اسىپ جىعىلادى.
