جاقىندا ءبىر وقيعا كۋاسى بولدىم. ايالدامادا جاسى 18-20 شاماسىنداعى جاس قىز تۇر ەدى. تىزەسى جىرتىق دجينسى مەن كىندىگى اشىق تۇراتىن كوفتا كيىپ الىپتى. اۋا رايى دا بۇل كيىم ۇلگىسىنە ساي ەمەس ەدى, سالقىن, وعان قوسا جەل سوعىپ تۇرعان. وسى كەزدە ايالداماعا ءبىر ۇلكەن اپا كەلدى. ورىندىققا وتىرا بەرە, جانىنداعى قىزعا جاقتىرماي قاراپ, ءبىر كۇرسىنىپ الدى. سودان سوڭ: «نەگە كىندىگىڭدى اشىپ العانسىڭ, سۋىق تيگىزەسىڭ عوي. اتا-اناڭ بۇلاي جۇرمە دەپ ايتقان ەمەس پە؟ تىزەڭدى دە جالتىراتىپ الىپسىڭ. وسى جىرتىق دجينسى كيۋ قايدان شىققان؟» دەپ اقىرىن اقىلىن ايتتى.
ول كىسىنىڭ قىزعا جانى اشىعانى ما, الدە ىزالانعانى ما, بىلمەدىم, بىراق جاس قىزدىڭ ۇيالىپ قالعانى قىزارا تۇسكەن وڭىنەن بەلگىلى ەدى.
سول وقيعادان كەيىن اينالاما زەر سالىپ قاراي باستادىم. اشىق-شاشىق كيىنىپ العان تەك جاڭاعى قىز ەمەس ەكەن. وكىنىشتىسى, جاستاردىڭ كوبى سول ۇلگىدە كيىنگەن, ءتىپتى كەيبىر ۇلكەن تاتەيلەر دە. وسى ورايدا ماعان «جاستار كىمگە ەلىكتەپ ءجۇر؟» دەگەن وي كەلدى. بايقاساق, بۇرىن جاستاردىڭ كيەتىنى كەڭ بالاق شالبار, 1-2 ولشەم ۇلكەن كورىنەتىن جەيدەلەر ەكەن. ول ەۋروپانىڭ ءسان ۇلگىسىنە سايكەس كەلەتىن ەدى. سولاي كيىنگەن ادامدى ءساندى دەپ ايتاتىنبىز. ال قازىر شە؟ قازىرگىنىڭ سانقويلارى قالاي كيىنەدى؟ جاڭاعى ايالداماداعى قىز سەكىلدى, اشىق-شاشىق, جىرتىق نەمەسە دەنەگە جابىسىپ تۇراتىن كوفتالار, تىزەسى داليىپ جىرتىلعان دجينسى كيۋگە اۋەس. مۇنى ەۋروپانىڭ ءسان ۇلگىسى دەپ ايتا المايمىن. «ءسان» دەپ اتالاتىن بۇل كيىم ءتۇرى كورەيا رەسپۋبليكاسىنىڭ جاستارىنا ەلىكتەۋدەن تۋعان. ناقتى ايتساق, سولارعا ەلىكتەپ ءوزىمىز كيىپ العانبىز, ايتپەسە بىزگە ەشكىم كۇشتەپ كيگىزگەن جوق قوي. كورەيادان شىققان, بار الەمدى جاۋلاپ العان ك-پوپ مادەنيەتىنىڭ كيىنۋ ۇلگىسى بۇل. ك-پوپ ارتىستەرىنە ۇقسايمىز دەگەن جاستار, ءوزىنىڭ ءتول مادەنيەتىنەن قالاي ايىرىلىپ بارا جاتقانىن بايقاماي كەلەدى.
ارينە, قازاقى مادەنيەتپەن كيىنسىن, شاپان جامىلىپ, ساۋكەلە كيسىن دەمەيمىن, بىراق ەتەك-جەڭى جابىق كيىم كيىپ, سول كيىمگە ءبىر قازاقى ورنەكتى ورناتا سالسا, قانەكي! بۇرىن اقسەلەۋ سەيدىمبەك اعامىز دا «ءار قازاق قىزى كيىمىنىڭ ءبىر شەتىنە قازاقشا ويۋ سالىپ السا, جاراسىپ شىعا كەلەر ەدى» دەپ ارمانداماپ پا ەدى؟
ءسان دەگەن ءۇش ارىپتەن تۇراتىن ۇلكەن ۇعىمدى ەلىكتەۋشىلىك رەتىندە ەمەس, جاراسىمدى كيىنۋ دەپ تۇسىنسەك ەكەن.
جادىرا شىناربەك,
ل.گۋميلەۆ اتىنداعى ەۋرازيا
ۇلتتىق ۋنيۆەرسيتەتىنىڭ
1-كۋرس ستۋدەنتى
