مەملەكەتتىك حاتشى گۇلشارا ابدىقالىقوۆانىڭ توراعالىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ وتىرىسى ءوتتى.
جيىندى اشقان گۇلشارا ابدىقالىقوۆا بارلىق قاتىسۋشىلاردى مەملەكەتتىك رامىزدەر كۇنىمەن قۇتتىقتاپ, بۇل مەرەكەنىڭ بيىل ەل تاۋەلسىزدىگىنىڭ سيمۆولى – استانا قالاسىنىڭ 20 جىلدىق مەرەيتويىمەن تۇسپا-تۇس كەلىپ وتىرعانىن اتاپ ءوتتى.
باسقوسۋدا اقپارات جانە كوممۋنيكاتسيالار مينيسترلىگىنىڭ, استانا قالاسىنىڭ, قىزىلوردا جانە اقتوبە وبلىستارى اكىمدىكتەرىنىڭ مەملەكەتتىك رامىزدەردى ناسيحاتتاۋ جانە قولدانۋ سالاسىنا قاتىستى جۇمىستارىنىڭ احۋالى جونىندەگى ەسەپتەرى تىڭدالدى.
مەملەكەتتىك رامىزدەردىڭ دۇرىس ورنالاسۋىن قاداعالاۋ ماسەلەسى بويىنشا استانا اكىمىنىڭ ورىنباسارى ەرمەك امانشاەۆ بايانداما جاسادى. ول جاقىندا ەلوردادا مەملەكەتتىك كوميسسيا تاراپىنان تەكسەرۋ جۇمىستارى ءوتىپ, 75 مەكەمە قارالعانىن, ناتيجەسىندە
تۋدىڭ لاستانۋى, كەيبىر جەرلەرىنىڭ جىرتىلۋى, ءتۇستەرىنىڭ كەتۋى سەكىلدى دەرەكتەر انىقتالىپ, ونىڭ ءبارى 1 جۇمىس كۇنى ىشىندە تۇگەل قالپىنا كەلتىرىلگەنىن اتاپ ءوتتى.
سونىمەن قاتار جيىندا قازاقستان رەسپۋبليكاسىنىڭ مەملەكەتتىك رامىزدەردى قولدانۋ سالاسىنداعى نورماتيۆتىك-قۇقىقتىق اكتىلەرىن جەتىلدىرۋ ماسەلەلەرى قارالدى.
رامىزدەردى قۇرمەتتەۋدە استانا وزگە قالالارعا ۇلگى بولۋ كەرەكتىگىن ايتقان گۇلشارا ابدىقالىقوۆا كوميسسيا جۇمىسىنىڭ قورىتىندىسى بويىنشا مەملەكەتتىك ورگاندار باسشىلارىنا مەملەكەتتىك رامىزدەردى ناسيحاتتاۋ جانە قولدانۋ ماسەلەلەرى, سونىمەن قاتار وسى سالاداعى زاڭنامالاردى ساقتاۋ جونىندە بىرقاتار ناقتى تاپسىرما بەردى.
