كەشە رەسپۋبليكا جۇرتشىلىعى مەملەكەتتىك رامىزدەر كۇنىن اتاپ ءوتتى. استانا قالاسىنىڭ مەكەمەلەرى مەن ۇيىمدارىندا دا تانىمدىق-تاعىلىمدىق شارالار ۇيىمداستىرىلدى.
ەلوردا اكىمدىگىندە رامىزدەر كۇنىنە وراي ەلتاڭبا اۆتورى, بەلگىلى ساۋلەتشى جانداربەك مالىبەكوۆپەن مەملەكەتتىك قىزمەتكەرلەردىڭ كەزدەسۋى ءوتتى. شارانى قالالىق تىلدەردى دامىتۋ جانە ارحيۆ ءىسى باسقارماسى ۇيىمداستىردى.
مەملەكەتتىك رامىزدەر – ەل تاۋەلسىزدىگىن بىلدىرەتىن سيمۆوليكالىق ايىرىم بەلگىلەرى. سوندىقتان بۇل مەرەكەنىڭ ءجونى بولەك. كەزدەسۋ بارىسىندا ساۋلەتشى جينالعاندارعا رامىزدەردىڭ قۇندىلىعى جايىندا ءسوز سويلەدى. ءوزى اۆتورى سانالاتىن ەلتاڭبانىڭ جاساۋ بارىسىنان ەستەلىك ايتتى. بۇل كىسى كوميسسياعا جۇمىسىن 173-ءشى بولىپ تاپسىرىپتى. كەيىن كەلە ۇمىتكەرلەردىڭ سانى 245-كە, جازبا تۇرىندە 293-كە جەتكەن. سولاردىڭ اراسىنان جانداربەك اعا مەن شوت-امان ءۋاليحانوۆتىڭ ەڭبەگىنىڭ باعى جانعان.
«4 ماۋسىم – شىن مانىندە قاسيەتتى كۇن. وسى كۇنى مەملەكەتتىك رامىزدەر قابىلداندى. ءبىز كوكپەن تالاسىپ جەلبىرەگەن كوك بايراقتى, ءاربىر تاڭباسى ۇلتىمىزدىڭ تاريحىنان سىر شەرتەتىن ەلتاڭبانى, تىڭداعان كەزدە نامىسىڭىزدى قايرايتىن ءانۇراندى كيە تۇتۋىمىز قاجەت. مەملەكەتتىك رامىزدەر ەلىمىزدىڭ ءاربىر ازاماتىنىڭ رۋحىن كوتەرەتىن نىشانعا اينالۋى كەرەك. سوندىقتان ءبارىڭىزدى ماڭىزدى مەرەكەمەن قۇتتىقتايمىن» دەدى ەلتاڭبا اۆتورى.
