«نۇر وتان» – نۇرلى بولاشاق جولىندا
كەشە نازارباەۆ ورتالىعىندا «نۇر وتان» حالىقتىق-دەموكراتيالىق پارتياسى استانا قالالىق فيليالىنىڭ كەزەكتەن تىس حVIII كونفەرەنتسياسى ءوتتى. القالى جيىندى اشقان «نۇر وتان» حدپ استانا قالالىق فيليالىنىڭ توراعاسى, ەلوردا اكىمى يمانعالي تاسماعامبەتوۆ كۇن تارتىبىندە قارالاتىن ماسەلەلەرمەن تانىستىردى.
سەسسيادا قارالعان العاشقى ماسەلە – «قازاقستان – 2050» ستراتەگياسىن جۇزەگە اسىرۋداعى «نۇر وتان» حدپ-نىڭ جاڭا مىندەتتەرى جونىندە ءوربىدى. بۇل تۋرالى بايانداما جاساعان «نۇر وتاننىڭ» استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ ەلوردالىق پارتيا ۇيىمىنىڭ قىسقا مەرزىم ارالىعىندا قانداي شارۋالاردى ەڭسەرگەنىن اتاپ ءوتتى.
بۇگىندە قالالىق فيليالدىڭ 35 مىڭداي مۇشەسى جانە 327 باستاۋىش پارتيا ۇيىمى بار.
بيىل جىل باسىنان بەرى فيليالدىڭ قوعامدىق قابىلداۋىنا 6 311 تۇرعىن ءارتۇرلى ارىز-شاعىممەن كەلسە, سونىڭ 70 پايىزى قىسقا مەرزىم ىشىندە شەشىلگەن.
ساپار قايراتۇلى پارتيا بەلسەندىلەرى مەن باستاۋىش ۇيىمدار ءتوراعالارىن وقىتۋعا دا باسا كوڭىل ءبولىنىپ جاتقانىنا توقتالدى. بيىل «نۇر وتان» حدپ ورتالىق اپپاراتىنىڭ ساياسي مەنەدجمەنت
مەكتەبىندە 22 توراعا ارنايى باعدارلاما بويىنشا وقىپ شىققان. ءبولىمشەنىڭ وزىندە پارتيا بەلسەندىلەرىنە ارنالعان قوعامدىق-ساياسي جانە قۇقىقتىق تاقىرىپتا 9 سەمينار وتكىزگەن.
«ەلەكتروندى پارتيا» جوباسى بويىنشا پارتيا مۇشەلەرى تۋرالى ەلەكتروندى بازانى قۇرۋ جونىندەگى شارۋالاردى اياقتاعان ەلوردالىق فيليال ەندى كادرلىق رەزەرۆتى جاساقتاۋ جۇمىستارىن قولعا الىپتى.
بۇدان كەيىن كۇن تارتىبىندەگى ەكىنشى ماسەلە – پارتيانىڭ «نۇر وتان, نۇرلى بولاشاق جولىندا!» اتتى ساياسي دوكتريناسىنىڭ جوباسى تۋرالى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ءسوز الدى.
ەل تالقىلاۋىنا ۇسىنىلعان دوكترينادا «نۇر وتاننىڭ» ححI عاسىرداعى ميسسياسى جانە ازامات پەن مەملەكەت ءوزارا ءىس-قيمىلدىڭ جاڭا قاعيداتتارى ايتىلادى. سونداي-اق, بۇل ماڭىزدى قۇجاتتا ەلىمىزدىڭ تابىستى دامۋىنىڭ جەتى فاكتورى اتاپ كورسەتىلگەن. ول: بىرلىك پەن كەلىسىم, ءتول مادەنيەت پەن رۋحانيات, قۋاتتى ەكونوميكا, ءادىل الەۋمەتتىك ساياسات, زياتكەر ۇلت, ءتيىمدى مەملەكەتتىك باسقارۋ جانە الەمدىك قوعامداستىقتاعى قازاقستان. «پارتيا ارقاشان زامان تالابىنا ساي, بولاشاققا بايىپتى باعدارلاما جاساي وتىرىپ, قوعامداعى جانە الەمدەگى زارۋلىكتەرگە ءجىتى قاراپ كەلەدى. سونىڭ ءبىر ايقىن دالەلى – قوعامدىق تالقىلاۋعا ۇسىنعان جاڭا ساياسي دوكترينا. پارتيانىڭ الداعى ون جىلداعى باعدارلاماسىن ايقىندايتىن بۇل ماڭىزدى قۇجات ەلباسىنىڭ «قازاقستان – 2050» ستراتەگياسىن باسشىلىققا الا ازىرلەنگەنىمەن قۇندى. بۇگىنگە دەيىن قازاقستاننىڭ بىردە-ءبىر ساياسي پارتياسى ستراتەگيالىق مىندەتتەرگە ساي كەلەتىن مۇنداي ىرگەلى قۇجات ۇسىنىپ كورگەن ەمەس» دەدى ەرلان سىدىقوۆ.
ال, «نۇر وتان» حدپ توراعاسىنىڭ ءبىرىنشى ورىنباسارى باۋىرجان بايبەك پارتيانىڭ ساياسي دوكتريناسى رەسپۋبليكا وڭىرلەرىندە تالقىلانىپ جاتقانىن, جاقىندا ەلىمىزدىڭ باتىس وڭىرىندە جانە اقمولا وبلىسىنىڭ زەرەندى اۋدانىندا كەزدەسۋلەر وتكەنىن ايتا كەلە, بۇل قۇجاتتى تالقىلاۋ ەشقانداي دا ۇگىت-ناسيحات جۇرگىزۋ ەمەس, اشىق پىكىر الماسۋ ەكەنىن, ونى دايىنداۋدا حالىقتىڭ پىكىرى ماڭىزدى ەكەندىگىن اتاپ ءوتتى.
استانالىقتار پارتيانىڭ ساياسي دوكتريناسى تۋرالى پىكىرلەرىن ورتاعا سالعاننان كەيىن كۇن تارتىبىندەگى كەزەكتى ماسەلە بويىنشا «نۇر وتان» حدپ كەزەكتەن تىس حV سەسسياسىنا دەلەگاتتار سايلاندى. 18 قازان كۇنى وتەتىن القالى جيىنعا 100 ادام سايلاندى.
كەلەسى ماسەلە بويىنشا, «نۇر وتان» پارتياسى قالالىق فيليالىنان استانا قالاسىنىڭ ءماسليحات دەپۋتاتتىعىنا ۇمىتكەر رەتىندە پارتيانىڭ استانالىق فيليالى توراعاسىنىڭ ءبىرىنشى ورىنباسارى ساپار احمەتوۆتىڭ كانديداتۋراسى ۇسىنىلدى.
جيىندى قورىتىندىلاعان يمانعالي تاسماعامبەتوۆ قول جەتكىزگەن جەتىستىگىمىز بەن جەڭىسىمىز حالقىمىزدىڭ تولايىم تابىسى ەكەندىگىن ايتا كەلە, ەلوردانىڭ بۇگىنگى جەتىستىكتەرىنە ناقتى مىسالدارمەن توقتالدى. ونىڭ ايتۋىنشا, قالا ەلورداعا اينالعالى تۇرعىنداردىڭ سانى 5 ەسەگە ءوسىپ, 1 ميلليوندىق مەجەگە جەتكەلى وتىر. ءجىو 20 ەسەگە ارتىپ, 2 تريلليون 700 ميلليارد تەڭگەنى قۇراعان. استانادا جەكە كاسىپپەن اينالىساتىنداردىڭ سانى 5 ەسەگە كوبەيگەن. بيىل جەتى ايدا يندۋستريالاندىرۋدىڭ اۋماقتىق كارتاسى بويىنشا ەلوردادا 10 جوبا پايدالانۋعا بەرىلىپ, 3 مىڭ جاڭا جۇمىس ورنى اشىلعان. ورتاشا جالاقى 10 ەسەگە ءوسىپ, بۇگىندە 152 مىڭعا جەتىپ وتىر. باس شاھاردا جىل سايىن 1 ميلليون شارشى مەتردەن استام تۇرعىن ءۇي تاپسىرىلادى. بيىل العاشقى جارتىجىلدىقتىڭ وزىندە 554 مىڭ شارشى مەتر تۇرعىن ءۇي پايدالانۋعا بەرىلگەن.
– استانا – جاستار قالاسى. بۇگىندە ەلوردالىقتاردىڭ ورتاشا جاسى – 30. سوندىقتان, قولعا العان جۇمىسىمىز بەن مىندەتىمىزدى الدىمەن جاستارعا بەيىمدەۋىمىز قاجەت. ولاردىڭ ساپالى ءبىلىم الۋىنا جول اشىپ, تۇراقتى جۇمىس تابۋىنا, باسپانالى بولىپ, وتباسىن قۇرۋعا, سالاۋاتتى ءومىر سالتىن ۇستانۋىنا بار جاعدايدى جاساي ءبىلۋىمىز كەرەك, – دەدى ەلوردا اكىمى.
ەگىز لەبىز
اقەركە جۇمانباەۆا, قر پرەزيدەنتى جانىنداعى مەملەكەتتىك باسقارۋ اكادەمياسىنىڭ ماگيسترانتى, قالالىق
«جاس وتان» جاستار قاناتىنىڭ مۇشەسى:
– قازىرگى تاڭدا جاسوتاندىقتاردىڭ قاتارىندا 16 148 ازامات ەلىم, جەرىم دەپ جۇمىس ىستەۋدە. جاستار 2012-2013 جىلدار ارالىعىندا 58 428 ادامدى قامتىعان 199 ءىس-شارا وتكىزدى. بۇگىنگى كۇن – ەرتەڭگى بولاشاقتىڭ باعدارى. ءبىز ساياسي دوكترينانى جاستار اراسىندا كەڭىنەن تالقىلاپ, كەيبىر سۇراقتار بويىنشا ۇسىنىس ەنگىزگىمىز كەلەدى. ەلباسىمىز جاسوتاندىقتاردىڭ الدىندا سويلەگەن سوزىندە: «جاس وتان» جاستار قاناتى ەلدى جاڭعىرتۋ ۇردىسىندەگى قازاقستاندىق جاستاردىڭ باستى ساياسي ۇيلەستىرۋشىسى» دەپ اتاپ وتكەن بولاتىن. ءبىز وسى جاۋاپكەرشىلىكتى سەزىنە وتىرىپ, دوكترينانىڭ «ازامات جانە مەملەكەت: ءوزارا ءىس-قيمىلدىڭ جاڭا قاعيداتتارى» اتتى ءبولىمىنىڭ الەۋەتتى ءارى بەلسەندى ازاماتتار بىرلەستىگى دەپ اتالاتىن بولىمشەسىنە «كەيىنگى جاس ۇرپاق – دامۋدىڭ قوزعاۋشى كۇشى» دەگەن بولىمشە ەنگىزۋدى قاجەت دەپ ەسەپتەيمىز. قازاقستاننىڭ جاستارى – مەملەكەتتىڭ بولاشاعى. جاستار ساياساتى – پارتيانىڭ الدىنا قويعان باسىم باعىتتارىنىڭ ءبىرى. ءبىزدىڭ ماقساتىمىز – جاستاردىڭ الەۋمەتتىك قۇقىقتارىن قامتاماسىز ەتۋ, جالپىۇلتتىق قۇندىلىقتار مەن ءپاتريوتيزمدى قالىپتاستىرۋ, شىعارماشىلىق الەۋەت پەن باستاماشىلىقتى دامىتۋ. ءبىز «نۇر وتاندى» قولداۋعا جانە ونىڭ قوزعاۋشى كۇشىنە اينالۋعا دايىنبىز.
التىنشاش قابىلدينا,
№5 قالالىق ەمحانانىڭ باس دارىگەرى,
باستاۋىش پارتيا ۇيىمىنىڭ ءتورايىمى:
– «نۇر وتان » پارتياسى – حالىقتىڭ جارقىن بولاشاعى ءۇشىن قىزمەت ەتۋدە. ەلباسىنىڭ «قازاقستان – 2050» ستراتەگياسىندا ءبىلىم جانە دەنساۋلىق ماسەلەسىنە ايرىقشا ماڭىز بەرىلگەن. ەلىمىزدىڭ دامۋى ءۇشىن ماڭىزدى قۇجاتتى نەگىزگە الا وتىرىپ ازىرلەنگەن ساياسي دوكترينادا باستى قۇندىلىقتارىمىزدىڭ ءبىرى رەتىندە وتباسى جانە ءداستۇر ايرىقشا اتالىپتى. راسىمەن دە ءوز انا ءتىلىن, تاريحى مەن مادەنيەتىن, ءداستۇرىن قۇرمەتتەيتىن ۇلت قانا وركەندەي الادى. ال, بۇلاردىڭ نەگىزى الدىمەن ادامنىڭ وتباسىندا قالىپتاسادى. ياعني, جەكە تۇلعانىڭ ازامات بولىپ قالىپتاسۋى, ومىرگە كوزقاراسى, تاربيەسى الدىمەن وتباسىندا باستالادى. مەملەكەت پەن قوعامعا دەگەن قارىم-قاتىناسى دا وسىندا باستاۋ الادى. وسى ورايدا, دوكتريناعا بايلانىستى ۇسىنىسىمىز – «الەۋەتتى ءارى بەلسەندى ازاماتتاردىڭ بىرلەستىگى» ءبولىمى «ەڭبەك ادامى – مەملەكەتتىڭ باستى كۇشى جانە تىرەگىنە اينالۋ كەرەك» دەگەن سوزدەرمەن تولىقتىرىلعانى ءجون دەپ سانايمىز.
قىمبات نۇرعالي