نۇرلان ەرمەكباەۆ, ءدىن ىستەرى جانە ازاماتتىق قوعام ءمينيسترى : ءدىننىڭ دۇرىس تۇسىنىگىن مەكتەپتە قالاۋ كەرەك

قوعامدا راديكالدىق ءدىني اعىمداردىڭ دەسترۋك­تيۆتى يدەيالارىنىڭ تارالۋى كوپ­­شىلىكتى الاڭداتادى. ولارمەن قالاي كۇرەسۋ كەرەك؟ ءدىني احۋال جانە باسقا دا ماسەلەلەر جونىندە ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ­پەن اڭگىمەلەسكەن ەدىك.

– نۇرلان بايۇزاقۇلى, ەلىمىز­دەگى ءدىني احۋال وتكەن جىل­دارمەن سالىستىرعاندا قالىپتى. دەسەك تە, زايىر­لى مەملەكەتتىڭ زاڭ تالاپ­تارىن مويىنداعىسى كەلمەي­تىندەردىڭ قاتارى كوبەيىپ كە­لە­­دى دەگەن پىكىرمەن كەلىسە­سىز بە؟
– بۇل جەردە مىندەتتى تۇردە باسىن اشىپ الاتىن ماسەلە بار, ول – ءدىني احۋال ۇعىمى. ءدىني احۋالدىڭ تۇراقتىلىعى ەلىمىزدەگى مەملەكەتتىك-كونفەس­سيالىق قارىم-قاتىناس, كونفەسسيالار اراسىنداعى ءوزارا ارەكەتتەستىك, ازاماتتار­دىڭ ار-وجدان بوستاندىعىنىڭ دەڭگەيى, ءدىن سالاسىن رەتتەيتىن قولدانىستاعى زاڭناما تالاپ­تارىنىڭ ساقتالۋى, ازاماتتار­دىڭ ءدىن سالاسىنداعى ساياساتقا قاتىناسى مەن ءدىن سالاسىنداعى احۋالدى باعالاۋى ءتارىزدى كوپ قاتپارلى ولشەمدەردىڭ ءناتي­جەسىنەن قۇرالادى.
بۇل جاعىنان العاندا ەلىمىز­دىڭ ءدىن سالاسىندا شەشىمىن تاپپاي وتىرعان ماسەلە جوق. مەملەكەتتىك-كونفەسسيالىق تۇرعىدان دايەكتى قاتىناس ورناتىلىپ, ازاماتتاردىڭ ءدىني بوستاندىعى تولىعىنان قامتاماسىز ەتىلگەن.
وكىنىشكە قاراي, ءدىندى ءبىر­جاقتى تۇسىنەتىن رادي­كال­دىق اعىمداردىڭ يدەيالارىن ۇستانۋ­شىلار تاراپىنان ەلىمىز­دە سوڭعى 5-6 جىلدا ءبىر­قاتار جانتۇرشىگەرلىك وقي­عالاردىڭ ورىن العانى ءمالىم. دەسەك تە, وسىنداي وقي­عالاردىڭ ءوزى ەلىمىزدەگى ءدىني احۋالدىڭ تۇراقتىلىعىنا سىزات ءتۇ­سىرە المايدى. كەرىسىنشە, مۇنداي لاڭكەستىك وقيعالار قوعامدا بەرىك ورنىققان كون­فەسسياارالىق كەلىسىم مەن اۋىزبىرشىلىكتىڭ باعا جەتپەس قۇندىلىق ەكەنىنە كوزىمىزدى جەتكىزە تۇسەدى. سوندىقتان ەلىمىزدەگى ءدىني احۋال تۇراقتى ەكەندىگىن جانە ءدىني سەبەپتەردى بۇركەنىپ, راديكالداردىڭ قاتىسۋىمەن ورىن العان ءبىردى-ەكىلى وقىس جاع­دايلار وعان تۇبەگەيلى اسەر ەتپەدى دەپ تولىق سەنىممەن ايتا الامىز.
ارينە, بۇل ەلىمىزدىڭ ءدىن سالاسىندا ەشقانداي ماسەلە جوق دەگەندى بىلدىرمەسە كەرەك… ءبىزدىڭ قوعامىمىزدا راديكالدىق ءدىني اعىمداردىڭ دەسترۋكتيۆتى يدەيالارىنىڭ تارالۋىنان كورىنىس تاۋىپ وتىرعان جانە كوپشىلىكتى الاڭداتىپ وتىرعان ءما­سەلە­لەردىڭ بار ەكەنى ءسوزسىز. مەن بىلتىرعى جىلى قازان ايىن­دا وتكەن بريفينگتە سالافيزم يدەولوگياسىن ەلىمىز ءۇشىن مۇلدەم جات ءارى تەرىس ءدىني اعىم دەپ سانايتىنىمىز تۋرالى ۇكىمەتتىڭ ۇستانىمىن ءبىلدىردىم.

زايىرلى زاڭنامالارمەن رەتتەلگەنى ءجون

– سالافيزم يدەولوگياسى­نىڭ تەرىستىگى نەدە؟
– راديكالدىق ءدىني اعىم­داردىڭ ۇستانۋشىلارى ءوز يدەيا­لارىن ءبىزدىڭ ۇلتتىق ءما­دە­­نيەتىمىزدەن, رۋحاني ءداس­تۇر­لەرىمىز بەن قۇن­دى­لىقتارىمىزدان جوعارى قويا­دى جانە ءدىني تالاپتارمەن ءومىر سۇرەتىن مەملەكەتتى قوعام­دىق قۇرىلىستىڭ «ەڭ دۇرىس جۇيەسى» دەپ ەسەپتەيدى. ال مۇنداي شەتىن يدەيالاردىڭ ءبىزدىڭ مەملەكەتىمىزگە جانە سان عاسىرلىق تاريحىمىز بەن مادەنيەتىمىزگە قايشى كەلەتىنى ايتپاسا دا تۇسىنىكتى.
– وسى ماسەلەگە بايلانىس­تى ناقتى قانداي شارالار جۇرگىزىلۋدە؟
– مينيسترلىك قازىرگى كۇندە مۇددەلى مەملەكەتتىك ورگاندارمەن بىرلەسە وتىرىپ, ءدىني سيپاتتاعى راديكالدىق جانە ەكسترەميستىك يدەيالارعا توس­قاۋىل قويۋ باعىتىندا كەشەندى جۇمىستار جۇرگىزۋدە جانە ول ال­داعى ۋاقىتتا كۇشەيە تۇسەتىن بولادى.
جالپى, زايىرلى مەملەكەت بولىپ تابىلاتىن ءبىزدىڭ ەلىمىزدە قانداي دا ءبىر رەسمي نەمەسە مىندەتتى ءدىن جوق. كەرىسىنشە, زايىرلى مەملەكەتتە ءدىننىڭ دامۋىنا جانە ازاماتتاردىڭ ءدىني سەنىم بوستاندىعىنا كەڭ مۇمكىندىكتەر بەرىلەدى. بۇعان الىسقا بارماي-اق ءبىزدىڭ ەلىمىزدىڭ تاجىريبەسىن الساق تا جەتكىلىكتى. وسى ورايدا, ءبىزدىڭ ەلىمىزدە الەۋمەتتىك قاتىناستار, سونىڭ ىشىندە ءبىلىم بەرۋ, دەنساۋلىق ساقتاۋ, وتباسى جانە نەكە ينستيتۋتتارى ءدىني نورمالارمەن ەمەس, زايىرلى زاڭنامالارمەن رەتتەلەتىندىگىن باسا ايتا كەتكىم كەلەدى. ءدىن بۇل سالالارعا ارالاسا المايدى جانە ارالاسپاۋى ءتيىس.
سونداي-اق, تەرىس ءدىني اعىم­­داردىڭ يدەيالارىن ۇس­تانۋشىلار ورتاسىندا, ءتىپ­تى ءداستۇرلى حانافي مازحابىن ۇستانۋشىلاردىڭ ارا­­سىندا دا زاڭدى نەكەگە تۇرۋ­عا نەمقۇرايلىلىق تانىتۋ جايتتارى كەزدەسەدى. بۇل دۇرىس ەمەس. ەلىمىزدىڭ زاڭىنا سايكەس نەكەگە تۇرۋ ءمىن­دەتتى تۇردە مەملەكەت تاراپىنان تىركەلەدى. بۇل – نەكەگە تۇرعان ازاماتتاردىڭ قۇقىقتارى زاڭدى تۇردە قورعالادى دەگەن ءسوز. سايكەسىنشە, نەكەلەرىن ءدىني جولمەن قيدىرىپ, ونى زاڭداستىرماعان قىزداردىڭ, مۇنداي وتباسىندا دۇنيەگە كەلگەن بالالاردىڭ قۇقىقتارىن مەملەكەت قورعاي المايدى.
جالپى, سالافيلەرگە عانا ەمەس, بارلىق راديكالدارعا ءتان ءبىر ەرەكشەلىك – ولار وزدەرىنىڭ جالپى ساۋاتتارىنىڭ جانە زياتكەرلىك دەڭگەيلەرىنىڭ تومەن­دىگىنەن رۋحاني قۇندىلىق­تاردى ەمەس, كەرىسىنشە, ادام مەن قوعامنىڭ تۇرمىس-تىرشىلىگىن, ءجۇرىس-تۇرىسىن, كيىم كيىسى مەن باسقا دا سىرتقى كورىنىستەرىن رەتتەيتىن حاديستەردى ءدال سول كۇيىندە سوزبە-ءسوز تۇسىنەدى جانە سول تالاپتاردى تولىقتاي ورىنداۋعا تىرىسادى.
وسىنداي كەلەڭسىز ماسەلەلەر ەلىمىزدىڭ دامۋىنىڭ زايىرلى قاعيداتىن ىلگەرىلەتۋگە جانە زايىرلى ءومىر ءسۇرۋ قۇن­­دى­لىقتارىن كەڭىنەن ناسيحاتتاۋعا باعىتتالعان جۇ­مىستاردى كۇ­شەي­تە ءتۇسۋدى قاجەت ەتەدى. مەن ەلىمىزدىڭ ءدىندار ازاماتتارى, ەڭ بىرىنشىدەن, ءوز ەلىنىڭ پاتريوتتارى بولۋى ءتيىس دەپ سانايمىن. ولار جاقسى ءبىلىم الىپ, ادال ەڭبەك ەتۋدى, وزدەرىن ۇنەمى جەتىلدىرىپ وتىرۋدى, زاڭ تالاپتارىن ساقتاۋدى باسشىلىققا الۋلارى كەرەك. سوندىقتان زايىرلى مەملەكەتتىڭ زاڭ تالاپتارىن مويىنداعىسى كەلمەيتىندەردىڭ قاتارى كوبەيىپ كەلە جاتىر دەگەن تۇجىرىممەن كەلىسپەيمىن.

ءدىندى مەكتەپ قابىرعاسىندا دۇرىس ءتۇسىندىرۋ كەرەك

– ولاي بولسا, جاستاردىڭ ءدىني اعىمدارعا تەز تارتىلۋ سەبەبى نەدە دەپ ويلايسىز؟
– قوعامنىڭ ەڭ كوپ جانە بەلسەندى توبى رەتىندە جاس­تاردىڭ قانداي ماسەلەگە بولسا دا قىزىعۋشىلىقتارى جوعارى. بۇعان قوسا, جۇ­مىسسىزدىق, قۇقىقتىق جانە ءدىني ساۋاتسىز­دىق, جاستارعا ارنالعان مەملە­كەتتىك باعدارلامالاردان حابار­سىزدىعى سياقتى ءارتۇرلى فاكتورلاردى اتاپ وتۋگە بولادى.
جاستاردىڭ اراسىندا عىلى­ممەن, سپورتپەن, ونەر تۇرلەرىمەن تەرەڭ اينا­لى­سىپ, دىنگە مۇلدەم قىزىق­پايتىندارى دا, وزدەرىن اتەيست سانايتىندارى دا بار ەكە­نىن ايتا كەتۋ كەرەك. وسى ورايدا, مينيسترلىك باسقا دا مۇددەلى مەملەكەتتىك ورگاندارمەن, ءدىني بىرلەستىكتەرمەن, ۇكىمەتتىك ەمەس ۇيىمدارمەن بىرلەسە وتىرىپ, جاستار اراسىندا ءداستۇرلى ۇلتتىق جانە تاريحي قۇندىلىقتاردى ناسي­حاتتاۋ, زايىرلىلىق قاعيدات­تارىن ىلگەرىلەتۋ, ءدىندى راديكالدى تۇرعىدان ۇعىنۋدىڭ قاۋپىن ءتۇسىندىرۋ جانە ولار­دىڭ بويىندا تەرىس ءدىني يدەو­لوگيالارعا قارسى يممۋنيتەت قالىپتاستىرۋ باعىتىندا كەشەندى ءتۇسىندىرۋ جۇمىستارىن جۇرگىزۋدە. اتاپ ايتار بولسام, 2016 جىلى اقپاراتتىق-ءتۇسىندىرۋ توپتارىنىڭ كۇشىمەن بارلىق وڭىرلەردە جاستارمەن 9 مىڭنان استام تىكەلەي ءىس-شارالار وتكىزىلىپ, ونىمەن 700 مىڭنان استام جاستار قامتىلدى.
مينيسترلىك 2016 جىلى قر ءبىلىم جانە عىلىم مينيستر­لىگىمەن, ەلىمىزدىڭ جاستارىنىڭ ايتارلىقتاي كەڭ توبىن بىرىك­تىرىپ وتىرعان «جاس وتان» جاستار قاناتىمەن جانە قازاق­ستان جاستارى كونگرەسىمەن بىرلەسە وتىرىپ, جاستار اراسىندا ءتۇسىندىرۋ جانە الدىن الۋ جۇمىستارىن ىسكە اسىردى. تۇرعىنداردىڭ پىكىرى بويىن­شا ءدىننىڭ دۇرىس تۇسىنىگىن قالىپتاستىرۋدى جانە ءدىني ەكسترەميزمنىڭ الدىن الۋدى مەكتەپ قابىرعاسىنان باستاۋ كەرەك. بۇل ماقسات 2016 جىلعى وقۋ جىلىنان باستاپ جالپى ءبىلىم بەرەتىن ورتا مەكتەپتەردىڭ 9-سىنىپ وقۋشىلارى ءۇشىن ەنگىزىلگەن «زايىرلىلىق جانە ءدىنتانۋ نەگىزدەرى» ءپانى شەڭبەرىندە ىسكە اسىرىلۋدا.

جاستارعا قاتىستى بەس باعىت قولعا الىندى

– ەلورداداعى ءدىني احۋالدى قالاي باعالاۋعا بولادى؟
– استانا قالاسى اۋماعىنداعى ءدىني احۋال ەلىمىزدە قالىپتاسىپ وتىرعان ءدىني احۋالمەن قا­رايلاس. قالا اكىمدىگىندە ءدىن ىستەرى باسقارماسى جانە ءدىن ماسەلەلەرىن زەرتتەۋ ورتالىعى جۇمىس اتقارادى.
قازىرگى تاڭدا استانا قالا­سىندا 14 كونفەسسيانىڭ ءمۇد­دە­سىن بىلدىرەتىن 49 ءدىني ءبىر­لەستىك بار. اتاپ ايتقاندا, قازاقستان مۇسىلماندارى ءدىني باسقارماسىنىڭ 8 مە­شىتى, ورىس پراۆوسلاۆيە وكىل­دەرىنىڭ 6 شىركەۋى, ريم-كاتوليك شىركەۋىنىڭ 4 قاۋىمى, پروتەستانتتىق باعىتتاعى 28 بىرلەستىك, 2 يۋدايستىك, ءبىر-بىردەن باحاي جانە كريشناعا تيەسىلى ءدىني بىرلەستىكتەر بار. قالا اۋماعىندا تىركەلگەن بار­لىق ءدىني بىرلەستىكتەرمەن قارىم-قاتىناس ءوزارا سەنىمگە نەگىزدەلگەن ديالوگتىق الاڭ فورماتى اياسىندا جۇزەگە اسىرىلىپ وتىر. استانا قالاسىنىڭ ءدىن ىستەرى باسقارماسى اقپا­راتتىق-ءتۇسىندىرۋ, رادي­كال­دىق اعىمداردىڭ ۇستا­نۋشىلارىنا كەڭەس بەرۋ جانە وڭالتۋ ورتا­­لىقتارىنىڭ قىزمەتىن ۇيىم­داستىرۋ, ين­تەرنەتتەگى دەسترۋكتيۆتى سايت­تاردى انىقتاۋ جانە ولارعا توسقاۋىل قويۋ سياقتى جۇ­مىستاردى ىسكە اسىرۋدا. جالپى, بۇل باعىتتاعى جۇ­مىستار الداعى ۋاقىتتا پارمەندى تۇردە جالعاسا بەرەتىن بولادى.
– ءوزىڭىز باسقارىپ وتىرعان جاڭا مينيسترلىكتىڭ قۇرا­مىنا ءبىلىم جانە عىلىم مينيسترلىگىنىڭ جاستار ساياساتى سالاسىنداعى فۋنكتسيالارى بەرىلدى. ناقتى قانداي جۇمىستار قولعا الىندى؟
– وزدەرىڭىزگە بەلگىلى, جىلدىڭ باسىندا مەملەكەتتىك جاستار ساياساتى ماسەلەسى جو­عارعى دەڭگەيدە تالقىلاندى. مي­نيستر­لىك ءوز تاراپىنان بەس باعىت بويىنشا جۇمىس ءجۇر­گىزۋدى ۇسىندى. ولار – اۋىل مەن قالا جاستارى اراسىنداعى بايلانىستى نىعايتۋ, الەۋمەتتىك ساتىنى دامىتۋ, جاس وتباسىلاردى قولداۋ, جاستارمەن جۇمىس ىستەيتىن كادر الەۋەتىن ارتتىرۋ مەن ۆەدومستۆوارالىق ۇيلەستىرۋدى كۇشەيتۋ. سونىمەن قاتار, ەستەرىڭىزدە بولسا, وتكەن جىلى جاستار فورۋمى ءوتتى. فورۋمدا جاستار اراسىندا جۇرگىزىلگەن ساۋالناما ناتيجەسىندە ولاردىڭ 60 پايىزى قوعامدىق-ساياسي ومىرگە بەلسەنە ارالاسامىز دەسە, قالعاندارىنىڭ ساياساتقا قىزىقپاي, ازاماتتىق باستامالارعا قاتىسۋعا ىنتالى ەمەس ەكەنى بەلگىلى بولدى. بۇل دەگەنىمىز – جاستارىمىز ءوزىن قوعامدا بوتەن ساناپ, جات ۇيىمداردىڭ جەتەگىنە ەرىپ كەتۋلەرى مۇمكىن دەگەن ءسوز. سوندىقتان دا ءبىزدىڭ نەگىزگى مىندەتىمىز – مەملەكەت تاراپىنان جۇزەگە اسىرىلىپ جاتقان جوبالار مەن باعدارلامالارعا جاستاردى كوپتەپ تارتۋ.
قوعامداعى الەۋمەتتىك تۇر­عىدان جاعدايى تومەن جاس­تارمەن دە جۇمىستى جال­عاستىرۋدامىز. كوپ جاعدايدا بۇل كاتەگورياداعى جاستارعا ارنالعان جوبالاردى جۇزەگە اسىرۋ بارىسىندا مۇمكىندىگى شەكتەۋلى جاندارمەن جۇمىستار جۇرگىزىلەدى. ال جەتىمدەر, از قامتىلعان وتباسىنان شىققان بالالار مەن باس بوستاندىعىنان ايىرىلىپ, ەركىندىككە شىققان, ياعني قيىن جاعدايلارعا تاپ بولعان جاستار جەتكىلىكتى الەۋ­مەتتىك قولداۋ شارالارىمەن قامتىلماعان. وسىعان سايكەس, مەملەكەتتىك ورگاندارمەن جۇمىستا الەۋمەتتىك جوبالاردى جوسپارلاعاندا, جاستاردىڭ ءتۇرلى ساتىداعى الەۋمەتتىك توبىن كەڭىنەن قامتۋدى ۇسىندىق. سونداي-اق, وڭىرلەردە جاستاردىڭ بوس ۋاقىتىن ءتيىمدى دەمالىس­پەن قامتاماسىز ەتۋ بويىنشا جەلىلىك قاراپايىم اشىق سپورت كەشەندەرىن, اۋلا كلۋبتارىن كەڭەيتۋ مەن شىعىنى از نىساندارعا جاستاردى جاپپاي تارتۋ بويىنشا جۇمىستار جۇرگىزىلۋدە.

قارجىلاندىرۋ كولەمى ۇلعايدى

– مەملەكەتتىڭ باستى سترا­­تە­گياسىنىڭ ءبىرى – ازا­ماتتىق قوعام قۇرۋ. ونى قالىپتاستىرۋدا قوعامدىق ۇيىمداردىڭ ورنى مەن بەل­سەندىلىگى قانداي؟
– بۇگىنگى تاڭدا ۇكىمەتتىك ەمەس ۇيىمدار ازاماتتىق قوعام قۇرۋدا مەملەكەتتىڭ سەنىمدى سەرىكتەسى بولىپ وتىر. تاۋەلسىزدىك جىلدارى قازاقستاندا ازاماتتىق فورۋمدار, الەۋمەتتىك جوبالار جارمەڭكەلەرى, بەيرەسمي كەزدەسۋلەر, كەڭەستەر سياقتى ارىپتەستىكتىڭ وڭ تاجىريبەلەرى قالىپتاستى. مىسالى, ءىرى ديالوگتىق الاڭداردىڭ ءبىرى ازاماتتىق فورۋم بولىپ تابىلادى. كەزەكتى VII ازاماتتىق فورۋم 2016 جىلى قاراشا ايىندا وتكىزىلدى. فورۋمعا ەلىمىزدىڭ تۇكپىر-تۇكپىرىنەن 300-دەن استام ۇەۇ جينالدى. فورۋمنىڭ قورىتىندىلارى بويىنشا 2017-2018 جىلدارعا ارنالعان ءىس-شارالار جوسپارى بەكىتىلىپ, ىسكە اسىرىلۋدا.
سونىمەن قاتار, ۇكىمەتتىك ەمەس ۇيىمدارمەن ءوزارا ارە­كەتتەسۋ بويىنشا مينيستر­لىكتىڭ جانىندا ۇيلەستىرۋ كەڭەسى مەن جۇمىس توبىنىڭ, سونداي-اق ورتالىق جانە جەر­گىلىكتى مەملەكەتتىك ورگان­داردىڭ جانىنان قۇرىلعان كەڭەستەر اياسىندا سەرىكتەستىك مەحانيزمىن جەتىلدىرۋ بويىنشا جۇمىستار جۇرگىزىلۋدە.
مەملەكەت پەن ۇەۇ ءوزارا ءىس-قيمىلىنىڭ ءتيىمدى تە­تىك­تە­رى­نىڭ ءبى­رى – مەملەكەتتىك-الەۋمەتتىك تاپسىرىس. وسىلايشا, وتكەن جىلى مەملەكەتتىك الەۋمەتتىك تاپسىرىستى ىسكە اسىرۋدى قارجىلاندىرۋ كولەمى 20%-عا ۇلعاي­تىلدى. 2015 جىلى 7,1 ملرد بولسا, 2016 جىلى 8,9 ملرد تەڭگەنى قۇرادى.
قوعامدىق ۇيىمدار ازا­ماتتىق قوعامنىڭ ماڭىزدى ينستيتۋتى بولعاندىقتان, ۇەۇ قارجىلاندىرۋدىڭ جاڭا مەحانيزمدەرى – گرانتتار مەن سىياقىلار ەنگىزىلدى. گرانتتىق قارجىلاندىرۋ وپەراتورى قۇرىلدى. 2016 جىلى جالپى كولەمى 208 ملن تەڭگەنى قۇرايتىن 11 جوبا جۇزەگە استى. بيىلعى جىلى گرانتتىق قارجىلاندىرۋ كولەمى 3 ەسەگە دەيىن ءوستى. وسى جىلدان باس­تاپ ۇكىمەتتىك ەمەس ۇيىمدارعا الەۋمەتتىك ماسە­لە­لەردى شە­شۋگە قوسقان ۇلەسى ءۇشىن سىي­اقىلار بەرىلەتىن بولادى.
قوعامدىق ماڭىزدى ماسەلە­لەر بويىنشا ازاماتتىق قوعامنىڭ پىكىرىن ءبىلدىرۋ ماق­ساتىندا تۇ­راق­تى تۇردە قوعامدىق كە­ڭەستەر قىزمەت ەتەدى. قوعام­دىق كەڭەستەردىڭ قۇرامىنا ازاماتتىق قوعام­نىڭ, ۇەۇ, ساياسي پارتيالار, كاسىپوداقتاردىڭ وكىلدەرى كىرەدى. بۇگىنگى تاڭدا رەسپۋبليكادا 227 قوعامدىق كەڭەس قۇرىلعان, ولار قوعامدىق ماڭىزدى سۇراقتار بويىنشا 450-دەن استام قوعامدىق تىڭداۋلار وتكىزدى. مەملەكەت باسشىسى قازاقستان حالقىنا جولداۋىندا اتاپ وتكەندەي, الداعى ۋاقىتتا دا مەملەكەت ۇەۇ-دارعا كومەك كورسەتۋىن جالعاستىرا بەرەتىن بولادى.
– اڭگىمەڭىزگە راحمەت!

گۇلميرا ايماعانبەت,
«استانا اقشامى»