مەملەكەت باسشىسى قاسىم-جومارت توقاەۆتىڭ «ادىلەتتى قازاقستاننىڭ ەكونوميكالىق باعدارى» اتتى بيىلعى جولداۋىندا كوپتەگەن سالانىڭ ماسەلەلەرى قامتىلعان. پرەزيدەنت باستى باعداردى ەل ەكونوميكاسىنىڭ دامۋىنا قويدى. شيكىزاتقا تاۋەلدىلىكتەن ارىلۋ ءۇشىن قازاقستاندا بەرىك ونەركاسىپتىك نەگىز قالانۋى كەرەك. ەڭبەك رەسۋرستارىمىزدى پايدالانىپ, ءوزىمىزدىڭ ونىمدەرىمىزدى شىعارۋىمىز قاجەت. قازاقستاندا ازىق-تۇلىكتەن باستاپ قارۋ-جاراققا دەيىن ءبارى شىعارىلعانى ءجون.
مەنىڭ پىكىرىمشە, اۋىر ماشينا جاساۋعا, اۆتوبولشەكتەردى شىعارۋعا, مەتالدى, مۇناي مەن گازدى تەرەڭ وڭدەۋگە جانە كومىر حيمياسىنا باسىمدىق بەرۋ كەرەك. قازاقستان ۋران وندەۋدەن الەمدە جەتەكشى ورىنداردىڭ ءبىرىن الىپ وتىر. مۇنداي رەسۋرسقا يە مەملەكەت تەك قانا شيكىزات ەكسپورتتاۋشى ەل بولماي, ءوزىنىڭ اتومدىق گەنەراتسياسىن قالىپتاستىرۋ كەرەك. ەلىمىزدە اتوم ەلەكتروستانساسىن سالۋ تۋرالى ءارتۇرلى پىكىرلەر بار. بۇل ماسەلەدە سوڭعى نۇكتە رەفەرەندۋمدا شەشىلەدى. ارينە, سوڭعى ءسوزدى حالىق ايتادى.
ەلىمىزدىڭ تۋريستىك الەۋەتىن دە ەل دامۋىنا پايدالانۋ كەرەك. تۋريزم شەتەل ۆاليۋتاسىنىڭ اعىنىن قامتاماسىز ەتەدى جانە تولەم بالانسى مەن جيىنتىق ەكسپورت سياقتى ەكونوميكالىق كورسەتكىشتەرگە وڭ اسەرىن تيگىزەدى. سونداي-اق ول ەلدىڭ ينفراقۇرىلىمىن دامىتۋعا ىقپال ەتىپ, حالىقتىڭ جۇمىسپەن قامتىلۋىن ارتتىرۋعا سەپتەسەدى.
اۋىل شارۋاشىلىعى مەن اگروعىلىمدى دا دامىتۋ كەرەك. زاماناۋي عىلىم بولماسا, سالاداعى جاعداي توقىراپ قانا قويماي, ناشارلاي تۇسەدى. سوندىقتان داقىلداردى ءارتاراپتاندىرۋ, جوعارى رەنتابەلدى داقىلداردىڭ اۋداندارىن ۇلعايتۋ, سونداي-اق سۋدى كوپ قاجەت ەتەتىن جانە مونوكۋلتۋرالىق داقىلداردى ازايتۋ قاجەت.
ەلىمىزدە ورتا كاسىپكەرلىكتىڭ دامۋى دا باياۋ. پرەزيدەنت بيزنەستى قولداۋدى جانە قۇقىق قورعاۋ ورگاندارىنىڭ كاسىپكەرلەردى قۋدالاۋىن ءبىرجولاتا توقتاتۋدى تاپسىردى. ال ەكونوميكا اشىق جانە باسەكەگە قابىلەتتى بولۋى ءۇشىن بارلىق بەيىندى ەمەس اكتيۆتەردى مەملەكەت ءۇشىن اشىق جانە ءتيىمدى شارتتاردا نارىققا بەرۋ قاجەت. مەملەكەت باسشىسىنىڭ «سامۇرىق-قازىنا» قورىنىڭ بەيىندى ەمەس اكتيۆتەرى مەن حالىقتىق IPO-لارىن جەكەشەلەندىرۋدى باستاۋ تۋرالى حابارلاۋى – ءبىزدىڭ ەكونوميكامىزدىڭ دامۋىنداعى ماڭىزدى قادام. بۇل باستاما اكتيۆتەردى باسقارۋدى جاقسارتادى, اشىقتىقتى ارتتىرادى جانە ەلىمىزگە ينۆەستيتسيا تارتادى.
Air Astana اۋەكومپانياسى مەن QazaqGaz كومپانياسىنىڭ حالىقتىق IPO جوسپارى, سونداي-اق ءىرى كومپانيالاردا مەملەكەتتىك اكتيۆتەردى ىسكە اسىرۋ ەكونوميكانى ارتاراپتاندىرۋعا جانە نەعۇرلىم باسەكەگە قابىلەتتى بيزنەس-سەكتور قۇرۋعا ۇمتىلىسىن كورسەتەدى. بۇل دا ءوز كەزەگىندە جاڭا مۇمكىندىكتەر مەن جۇمىس ورىندارىنىڭ ارتۋىنا جول اشادى.
مەن بۇل باستامادان ءبىزدىڭ ايماق ءۇشىن كەڭ پەرسپەكتيۆالاردى كورىپ وتىرمىن. «سامۇرىق-قازىنا» قورىنىڭ جەكەشەلەندىرۋ جانە IPO جوسپارى ەكونوميكانىڭ سانالۋاندىعىنا, يننوۆاتسيالاردى ىنتالاندىرۋعا جانە بيزنەس سەكتوردىڭ باسەكەگە قابىلەتتىلىگىن ارتتىرۋعا ۇمتىلىسىمىزدى كورسەتەدى. بۇل قادامدار جاڭا جۇمىس ورىندارىن قۇرۋعا جانە ازاماتتارىمىزدىڭ ءال-اۋقاتىن جاقسارتۋعا ىقپال ەتەدى.
تاعى ءبىر ماڭىزدى ماسەلە – ۇلتتىق قاۋىپسىزدىكتى قامتاماسىز ەتۋدە شەشۋشى ءرول اتقاراتىن قورعانىس-ونەركاسىپ كەشەنىن جان-جاقتى نىعايتۋ. اسكەرىمىز جوعارى تەحنولوگيالىق قارۋ-جاراقپەن جانە اسكەري تەحنيكامەن, سونىڭ ىشىندە بروندى تەحنيكامەن, ۇشقىشسىز ۇشۋ اپپاراتتارىمەن, زاماناۋي اتىس قارۋىمەن قامتاماسىز ەتىلۋى ءتيىس. تەحنيكانى جەدەل جوندەۋ بويىنشا وندىرىستىك قۋاتتاردى نىعايتۋ, وتاندىق كاسىپورىنداردى قولداۋدى كۇشەيتۋ قاجەت.
سۋ شارۋاشىلىعى جۇيەسىن ءتيىمدى دامىتۋمەن دەربەس ۆەدومستۆو اينالىسۋى ءتيىس دەگەن يدەيانى قولدايمىن. سۋدى ۇنەمدەيتىن تەحنولوگيالاردى ەنگىزۋ قاجەت.
تەڭىزگە شىعۋ جولى جوق الەمدەگى ەڭ ءىرى مەملەكەت جانە جىبەك جولىنىڭ ماڭىزدى قۇرلىق بۋىنى بولا وتىرىپ, ءبىزدىڭ ەلىمىز كولىك-لوگيستيكالىق كەشەننىڭ دامۋىنا تولىعىمەن تاۋەلدى. سوندىقتان مۇنداي الەۋەت ءبىزدىڭ رەسپۋبليكامىزدىڭ دامۋ باسىمدىقتارىنىڭ ءبىرى بولىپ سانالادى.
اسقار سماعۇلوۆ,
استانا قالاسى ءماسليحاتىنىڭ دەپۋتاتى
