استانا مەن الماتىدا تۇراتىن 150 سوعىس ارداگەرى توتەنشە جاعداي بولعاندا دابىل قاعاتىن ەلەكتروندى قۇرىلعىمەن قامتاماسىز ەتىلەتىن بولدى. بۇل تۋرالى ۇلتتىق كاسىپكەرلەر پالاتاسى ۇيىمداستىرعان ءباسپاسوز ءماسليحاتىندا ايتىلدى.
جيىنعا ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى نۇرجان التاەۆ, رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى ومىرزاق وزعانباەۆ جانە «ءومىر جولى» جوباسىنىڭ وكىلى ءىلياس وماروۆ قاتىسىپ, جۋرناليستەردىڭ سۇراعىنا جاۋاپ بەردى.
«ءومىر جولى» اتتى الەۋمەتتىك جوبا اياسىندا پايدا بولعان GPS-ناۆيگاتورلارى جەڭىس كۇنى مەرەكەسى قارساڭىندا ارداگەرلەرىمىزگە توسىن سىي بولىپ وتىر. بۇل – كارىلىك جەڭىپ, كۇش-قۋاتى ازايعان قارتاڭ ادامدارعا تاپتىرماس كومەكشى قۇرىلعى. ەگەر قاريا جالعىز قالعاندا نەمەسە كوشەدە كەلە جاتىپ كەنەت سىرقاتتانىپ, ومىرىنە قانداي دا ءبىر قاۋىپ تونسە, وسى قۇرىلعىداعى «SOS» بەلگىسى بار جەدەل شاقىرۋ تۇيمەشەسىن باسسا بولعانى, دابىل نۇكتەسى بىردەن بىرىڭعاي كومەك ورتالىعىنىڭ اقپاراتتىق بازاسىنا كەلىپ تۇسەدى. «قوندىرعىداعى ءتۇيمەشەنى باسقان كەزدە سول ادامنىڭ قايدا تۇراتىنى, جاسى قانشادا ەكەندىگى, قانداي سىرقاتپەن اۋىراتىنى, ءتىپتى جاقىن تۋىستارىنىڭ تەلەفون ءنومىرى مونيتورعا شىعا كەلەدى.
وپەراتورلار بىردەن شاقىرۋ جولداعان اداممەن تىلدەسۋگە تىرىسادى. قۇرىلعى داۋىس كۇشەيتكىشىمەن قامتاماسىز ەتىلگەن. جاۋاپ الۋ بارىسىندا تۇيمەشەنىڭ بايقاۋسىزدا باسىلىپ كەتپەگەنى انىقتالادى. ال ەگەر شىنىمەن دە قوندىرعى يەسىنىڭ ومىرىنە قاۋىپ ءتونگەن بولسا, وندا جەدەل ءجاردەمگە, پوليتسياعا, باسقا دا ورگاندارعا نەمەسە تۋعان-تۋىسقاندارىنا حابار بەرىلەدى. وسىلايشا, قارتتارعا دەر كەزىندە كومەك كورسەتىلەتىن بولادى» دەيدى ءىلياس وماروۆ.
قۇرىلعىنىڭ نەگىزگى اپپاراتى ارداگەردىڭ ۇيىندەگى تەلەفونعا نەمەسە قالتافونعا ورناتىلادى. «SOS» دەگەن بەلگىسى بار ەكىنشى بولىگى بىلەزىك رەتىندە قولعا نەمەسە القا ىسپەتتى مويىنعا تاعىلادى. ياعني ادام قايدا جۇرسە دە, وزىمەن بىرگە الىپ جۇرۋگە ىڭعايلى.
مۇنداي يننوۆاتسيالىق قۇرىلعى امەريكادا جانە ەۋروپا ەلدەرىندە 30 جىلدان بەرى قولدانىلىپ كەلەدى ەكەن. رەسەيدە وسىدان ەكى جىل بۇرىن ىسكە قوسىلعان. ال ەلىمىزدە وتكەن جىلدان بەرى قولعا الىنا باستاعان. بىلتىر وتكىزىلگەن «Atameken Start-up» بايقاۋىندا وسى «ءومىر جولى» جوباسى ۇزدىك دەپ تانىلعان ەكەن. ەندى مىنە, ۇلتتىق كاسىپكەرلەر پالاتاسى بيزنەستىڭ الەۋمەتتىك جاۋاپكەرشىلىگى رەتىندە ەلىمىزدەگى سوعىس ارداگەرلەرىنە قۇرىلعىنى تەگىن تاراتا باستادى.
ۇكپ باسقارما توراعاسىنىڭ ورىنباسارى نۇرجان التاەۆتىڭ ايتۋىنشا, بيزنەس قاۋىمداستىق ۇلى جەڭىستىڭ 70 جىلدىعىنا دەيىن سوعىس ارداگەرلەرىن تۇگەل وسى قۇرىلعىمەن قامتاماسىز ەتۋدى كوزدەپ وتىر.
قىمبات توقتامۇرات
