جۋىردا گرەكيا ەلىنەن ءسۇيىنشى جاڭالىق جەتتى! ەلوردالىق قوس دارىن رۇستەم مەن مۇحاممەدالي جۇگىنىسوۆتەر «Paradise Fest» ءان بايقاۋىندا جۇلدە الدى.
اعايىندى تالانتتار ەۋروپانىڭ وڭتۇستىك-شىعىسىنا قازاق مادەنيەتىن دارىپتەۋگە اتتانعانىن گازەتىمىزدىڭ وتكەن ساندارىندا («ءانى مەن ءسانى ۇيلەسكەن ۇيەلمەن», №47, (3104)) جازعان بولاتىنبىز. بىرنەشە كۇنگە جالعاسقان سايىس ناتيجەسىندە اعايىندى جۇگىنىسوۆتەر قازاقستاننىڭ ابىرويىن اسقاقتاتىپ, رۇستەم ءى ورىندى جەڭىپ السا, مۇحاممەدالي باس جۇلدەنى يەلەنىپتى. ورىس حالقىندا «الما اعاشىنان الىسقا تۇسپەيدى» دەگەن ماقال بار. ونەرلى وتباسىنان شىققان ورەندەردىڭ ەرتەڭگى كۇنگە ارتقان ارمان-ماقساتتارى كوپ.
«بايقاۋ ءادىل ءوتتى. الەمدىك دەڭگەيدەگى ونەر مايتالماندارى كوپتەگەن جوبالارعا اتسالىسۋعا شاقىردى. مۇحاممەداليگە «نوۆايا ۆولنا», «سلاۆيانسكي بازار» بايقاۋلارىنا, قىتاي جانە رەسەي انشىلەرىمەن بىرگە بەينەبايانعا تۇسۋگە ۇسىنىس ءتۇستى» دەيدى رۇستەم.
ال, رۇستەمگە يتاليادان كەلگەن قازىلار القاسىنىڭ كوزى ءتۇسىپ, ونى «سان رەمو» يتاليالىق اندەر فەستيۆالىندە كورگىسى كەلەتىنىن جەتكىزىپتى. سونداي-اق, جۇگىنىسوۆتەردىڭ تۇڭعىشى گرەكيانىڭ جۇلدىزىمەن بەينەبايان جاساپ, رەسەيدە وتەتىن «گولوس» جوباسىندا ەل نامىسىن قورعاۋعا دايىندىقتى باستايدى.
ايتا كەتەيىك, بۇل جۇلدە ءان الەمىنە نىق قادام باسقان ونەرپازداردىڭ العاشقى جەڭىسى ەمەس. كىشكەنتاي مۇحاممەدالي گرەكياعا جول جۇرەردىڭ الدىندا عانا «المالى-2014» حالىقارالىق سايىسىندا باس جۇلدەنى قانجىعالاعان بولاتىن. سونىمەن بىرگە, ۋكراينادا وتكەن «ەۆروۆيدەنيەدە» جارقىراي كورىنىپ, جانكۇيەرلەرىنىڭ سەنىمىن اقتادى. ال, 6 جاسىنان ۇلكەن ساحناعا قادام باسقان رۇستەم مىسىر, پولشا, رەسەيدە قازاق ونەرىن اسپەتتەپ, توپ جاردى.
ماقپال جۇماشوۆا
