ءبىر كەزدەرى الەۋمەتتىك جەلىلەردە ءبىر ۆيدەو شارلاپ كەتكەن-ءدى. ەڭكەيگەن قاريا قالتا تەلەفونىم ىستەمەي قالدى دەپ جاس بالاعا تەكسەرتەدى. كوزدەرىندە تەلەفوننىڭ ءۇنسىز قالعانىن بالاسىنان ەمەس, تەحنيكانىڭ اقاۋلىعىنان كورگىسى كەلىپ تۇرعانى سەزىلىپ-اق تۇر. الايدا بالاسىنىڭ جۇرەگى تەمىردەن بولسا نە شارا. قارتتىڭ جۇرەگىنە شەگەدەي قادالعان: «تەلەفون ىستەپ تۇر, بالاڭىزدىڭ ءوزى شىعار حابارلاسپاي جۇرگەن» دەگەن كەسىم قاريانى مۇلدەم ەسەڭگىرەتىپ جىبەرەدى.
جاقىندا سوزدەن ءسوز شىعىپ, ءبىر اۋلەتتەن ءوسىپ-ونگەن 10 بالانىڭ اتا-اناسىنا دەگەن قۇرمەتىن قالاي ءبىلدىرىپ جۇرگەنىن ەستىپ ريزا بولدىم.
سەكسەننەن اسقان اتا-اناسىنىڭ حابارىن كۇندە بىلمەك بولىپ التى قىزى مەن ءتورت ۇلى كەزەكپەن حابارلاسىپ تۇرۋدى داستۇرگە اينالدىرعان. كەلىسىم بويىنشا الدى نەمەرەلى بولىپ جاتقان ون بالا قارتتارىمەن تەك قۋانىشىمەن عانا ءبولىسۋى شارت. ولاردىڭ جۇرەگىنە كىربىڭ تۇسىرەتىن جايتتاردى بىلدىرمەۋگە ۇيعارادى. ون جاقتان قاتار حابارلاسقان كۇندەرى دە بولعان. بۇل كۇن – ادەتتەگى مەملەكەتتىك ەمەس, وتباسىلىق, ەكى قارتتىڭ جەكە مەرەكەسى. اپامىز كەيدە قۋلىققا دا بارادى ەكەن. كەيدە كەزەگىن ۇمىتىپ كەتكەن تەنتەگىنىڭ داۋىسىن ەستۋ ءۇشىن الاقانداي عانا تەلەفوننىڭ باتىرمالارىن كەزەكپەن باسىپ, بار بالاسىن «دۇرلىكتىرەدى». نە بولىپ قالدى دەپ الاڭداعان تۇتقانىڭ ار جاعىنداعى بالالارىنىڭ داۋىسى انانىڭ جانىن ءبىر مەزەتتە جادىراتىپ جىبەرەدى-اق. كەزەگىن ۇمىتىپ كەتكەن ۇلدىڭ قىلىعىن ۇمىتىپ كەتەدى.
بۇدان ايتپاعىم نە؟ بالاسىنىڭ داۋىسىن ءبىر ەستۋ دە قارتايعان شاعىندا دەمگە قۋات. ءتۇن ۇيقىسىن ۇرلاعاندا, كۇندىز عانا حابارىن بىلگەن بالاسىنىڭ سەرگەك داۋىسى قۇلاعىندا تۇرسا, تەككە ويلاپ ۋايىمدامايدى. سول ءۇشىن بار بولعانى تەلەفوننىڭ ءبىر نۇكتەسىن باسۋ كەرەك. سول نۇكتەدە شەكسىز باقىتتىڭ كىلتى جاتىر. ارينە, تۇسىنگەن جانعا.
الەۋمەتتىك جەلىلەردىڭ كەيدە وسىنداي ويعا جەتەلەيتىنى جاقسى. سونىڭ بىرىندە نۇرتاي ەرنازار دەگەن ازامات «اكەم ۇيگە كەلگەن سايىن بالالارىمنىڭ قولىنا اقشا ۇستاتىپ: «مىنانى اتاڭا بىلدىرمەي قالتاسىنا سالىپ قوي» دەۋشى ەدىم. ولار: «نەگە ولاي ىستەيسىز؟» دەيدى. مەن «اشىق بەرسەڭ الماي قويادى, ارى-بەرى جۇرگەندە قالتاسىندا اقشا بولۋ كەرەك, زەينەتاقىسى از عوي» دەپ ءتۇسىندىرۋشى ەدىم. «اتاڭا نە ىستەسەڭ, الدىڭا سول كەلەدى» دەگەن راس-اۋ, قازىر قالتامدا تۇرعان باسى ارتىق اقشانى بايقاپ قالام. بالالارىمنىڭ سىيلىعى ەكەنىن ءىشىم سەزەدى» دەپ جازىپتى.
بۇل دا جۇرەكتى جىلىتادى. كەلىسەسىزدەر عوي؟
