بەلگىلى قالامگەر تابىل قۇلياس اعامىزدىڭ جەكە مۇراعاتى وتە باي. وندا حالقىمىزدىڭ ءجۇرىپ وتكەن جولىنا قاتىستى قۇندى دەرەكتەر مول. ءتۇرلى تاريحي سۋرەتتەردى دە كەزدەستىرەسىز. سونداي ءبىر وتكەن كۇننەن سىر شەرتەتىن فوتونى ساتيريك جاقىندا بىزگە بەردى.
وتكەن عاسىردىڭ سەكسەنىنشى جىلدارى. جازۋشى وندا الماتىداعى قازاق تەلەۆيدەنيەسىنىڭ ناسيحات رەداكتسياسىندا قىزمەت ىستەيدى. «جەبە» ساتيرالىق جۋرنالىن شىعارادى. سول كەزدە الماتىعا كەلىپ اقتوبە وبلىسىنىڭ ونەرپازدارى كونتسەرت قويادى. ونى تەلەۆيدەنيە تۇسىرەدى. الىستان ەلدىڭ سازدى ساعىنىشىن الىپ كەلگەن تالانتتى جاستاردىڭ ونەرىن الاتاۋدىڭ ەتەگىندەگى اسەم شاھاردا تۇراتىن اقتوبەلىكتەر بارىپ تاماشالايدى. كەش اياقتالعاننان كەيىن مادەني شارانى باستاپ كەلگەن ازاماتتار الماتىدا تۇراتىن اتاقتى جەرلەستەرىن ورتاعا الىپ, سۋرەتكە تۇسەدى. بۇل جادىگەر – سول ۇمىتىلماس كۇننەن قالعان ەستەلىك. فوتودان جۇرتشىلىق جاقسى بىلەتىن ەكى ايتۋلى تۇلعانىڭ بەينەسىن كورەسىز. ونىڭ ءبىرىنشىسى – قازاق مۋزىكاسىن زەرتتەپ, ءبىر ىزگە ءتۇسىرىپ كەتكەن كورنەكتى عالىم, كومپوزيتور
احمەت جۇبانوۆتىڭ قىزى عازيزا اپاي. ارداقتى جان كوزى تىرىسىندە اكەسىنىڭ كىندىك قانى تامعان ولكەنى قادىر تۇتىپ وتكەن. اكەسىنىڭ جولىن قۋىپ, مۋزىكانىڭ بيىك شىڭىن باعىندىردى. قازاقستان مەن كسرو-نىڭ حالىق ءارتىسى اتاندى. مەملەكەتتىك سىيلىقتىڭ لاۋرەاتى بولدى. ەكىنشىسى – مەديتسينا عىلىمى سالاسىندا ۇلتىمىزدان شىققان العاشقى پروفەسسور يشانباي قاراقۇلوۆ. اسىل ازامات اقتوبەنىڭ ويىل اۋدانىندا تۋعان. 1950-1954 جىلدارى دەنساۋلىق ساقتاۋ ءمينيسترى بولىپ قىزمەت ىستەدى. ەلىمىزدەگى ەپيدەميولوگيا, پروفيلاكتيكا جانە ميكروبيولوگيا سالاسىن زەرتتەپ, مەكتەپ قالىپتاستىرعان عالىم. سۋرەتتەن تابىل اعامىزدىڭ دا قىرىقتى ورتالاعان قايراتتى كەزى كوزگە جىلى ۇشىرايدى.
