ەلوردانىڭ جارتىجىلدىقتاعى كورسەتكىشتەرى وسىلاي دەۋگە نەگىز بولادى. قالا تۇرعىندارىنىڭ سانى الداعى ونجىلدىقتان كەيىن-اق 2 ميلليون ادامعا جەتۋى مۇمكىن. بۇل تۋرالى كەشە استانانىڭ جارتىجىلدىقتاعى الەۋمەتتىك-ەكونوميكالىق قورىتىندىسىنا ارنالعان جيىندا ءمالىم بولدى.
رەسمي ساناق بويىنشا بۇگىنگى كۇنى قالا حالقى – 1 ميلليون 200 مىڭ ادام. ال ەلباسى نۇرسۇلتان نازارباەۆ قالا باسشىلىعىنا استانانى 2 ميلليون ادام ەركىن ءومىر سۇرەتىندەي قالاعا اينالدىرۋدى تاپسىرعان بولاتىن. الدىن الا رەسمي باعامداۋ بويىنشا بۇل كورسەتكىشكە جەتۋ مەرزىمى 2030 جىل دەپ بەلگىلەنگەن. الايدا قالا اكىمى اسەت يسەكەشەۆ تۇرعىنداردى تىركەۋدەگى جەدەل باعامداۋ بويىنشا 2030 جىلعا جەتپەي-اق ەلوردالىقتاردىڭ سانى 2 ميلليونعا تولۋى مۇمكىن ەكەنىن ايتىپ وتىر.
حالىق سانى ارتقان سايىن اتقارىلۋعا ءتيىس جۇمىس اۋقىمى دا ۇلعاياتىنى بەلگىلى. سوعان وراي, قالانى دامىتۋعا باعىتتالعان 20 قادامنان تۇراتىن باعدارلاما دايىندالعان. ول قالا ومىرىنە قاتىستى بارلىق سالانى قامتيدى. ايتسە دە, قالا اكىمى كەشەگى جيىندا باعدارلامانىڭ ەكى باستى باعىتىنا ەرەكشە توقتالدى. ءبىرىنشىسى – قالا تۇرعىندارى ءۇشىن قاۋىپسىزدىك پەن جايلىلىق قالىپتاستىرۋ. ەكىنشىسى – جول جانە كولىك قاتىناسىن رەتتەۋ.
اتاپ كورسەتىلگەندەي, كولىكتىك موبيلدىلىك – قالا باسشىلىعىنىڭ الدىندا تۇرعان ماڭىزدى ماسەلەلەردىڭ ءبىرى. وعان قوعامدىق كولىكتەردىڭ قاۋىپسىزدىگى مەن جايلىلىعى, جاياۋ جانە ۆەلوجۇرگىنشىلەرگە ارنالعان جولداردىڭ قاۋىپسىزدىگى, باعدارشامدار جۇيەسى جانە بارلىق قالالاردىڭ پروبلەماسى بولىپ تابىلاتىن كەپتەلىستى ازايتۋ سەكىلدى ماقسات-مىندەتتەر كىرەدى. اسەت يسەكەشەۆتىڭ ايتۋىنشا, بۇل ماسەلەنى وڭتايلى شەشۋ ءۇشىن الەمنىڭ ءىرى مەگاپوليستەرى – ماسكەۋ, دۋباي, سينگاپۋر قالالارىنىڭ ۇزدىك تاجىريبەلەرى نازارعا الىنىپ وتىر.
جول, كولىك قوزعالىسى تۋرالى ايتقاندا, قالا باسشىسى تاۋەلسىزدىك سارايىنان جاڭا «نۇرلى جول» ۆوكزالىنا دەيىن جاڭا «مىڭجىلدىق» اللەياسى قۇرىلىسىنىڭ باستالعانىن اتاپ ءوتتى. وسى ايماقتا الداعى 5 جىل كولەمىندە جاڭا قالاشىق تۇرعىزىلادى دەپ جوسپارلانعان. ودان بولەك, قالانىڭ باستى كولىك اعىنى وتەتىن ماڭگىلىك ەل, تۇران, قابانباي باتىر داڭعىلدارىنان ۇلكەن جانە كىشى اينالما جولدار سالۋ قولعا الىنعان. بۇل جوبالاردىڭ ءبارى 2020 جىلى تولىق اياقتالۋى ءتيىس.
قالا تۇرعىندارىنىڭ سانى ارتۋى قۇرىلىس نىساندارىنىڭ دا كوبەيۋىن قاجەت ەتەتىنى تۇسىنىكتى. بۇل ورايدا تۇرعىن ۇيلەر مەن جالپى قۇرىلىس نىساندارىن سالۋدا استانا قازاقستان بويىنشا الدا كەلە جاتقانىن العا تارتقان ەلوردا اكىمى باس قالانىڭ ۇلەسى 23 پايىزدى قۇراعانىن مالىمدەدى.
«ەكسپو وبەكتىلەرىن, كوپتەگەن تك مەن كوممەرتسيالىق نىسانداردى تاپسىرۋعا قاتىستى وتكەن جىل ايتارلىقتاي كۇردەلى بولعانىنا قاراماستان, ادامدار ءۇشىن جايلى قالا قۇرۋدا ەلوردانىڭ ەكونوميكالىق ساياساتى جاپپاي كاسىپكەرلىك پەن جەكەمەنشىك ينۆەستيتسيانى قولداۋعا باعىتتالدى. ءوسىم ايتارلىقتاي جوعارى بولسا دا, بارلىق ەكونوميكالىق ينديكاتورلار وڭ ناتيجە كورسەتتى» دەدى ەلوردا اكىمى.
جىل باسىنان استانادا «نۇرلى جەر» تۇرعىن ءۇي قۇرىلىسى باعدارلاماسىن ىسكە اسىرۋ شەڭبەرىندە استانا اكىمدىگىنىڭ تاپسىرىسىمەن سالىنعان 3 كوپ قاباتتى ءۇي تاپسىرىلىپ, مىڭنان استام ادام باسپانالى بولعان. جىل سوڭىنا دەيىن تاعى دا ءۇش تۇرعىن ءۇي كەشەنى پايدالانۋعا بەرىلمەك. سونىمەن بىرگە, «نۇرلى جەر» تۇرعىن ءۇي قۇرىلىسى باعدارلاماسى شەڭبەرىندە سوڭعى ءۇش ايدا استانا قالاسى اكىمدىگىمەن 720 ادام جاڭا پاتەرگە كوشكەن, ونىڭ ىشىندە 410 ادام – كەزەكتەگىلەر.
ەلوردادا جازدىڭ جاۋىندى كۇندەرى ورتالىق كوشەلەردىڭ بويى تەرەڭ سۋ استىندا قالىپ, كولىكتەرگە دە, جاياۋلارعا دا ايتارلىقتاي قيىندىق تۋىپ جۇرگەنى بەلگىلى. قالا اكىمدىگى بيىلعى جىلدان باستاپ وسى ماسەلەنى شەشۋگە ەرەكشە نازار اۋدارىپ وتىر. وسى جىلى قولعا الىنعان ءىرى جوبالاردىڭ قاتارىندا جاڭا LRT ترانسپورت جۇيەسىنىڭ, نوسەر كارىزدىك قۇرىلىسىنىڭ, تەو-2, تەو-3 جانە باسقا دا وبەكتىلەردىڭ قۇرىلىسى بار. جىل سوڭىنا دەيىن وڭ ديناميكا بەرەتىن 470,5 ميلليارد تەڭگەگە تاتيتىن جوبالاردى ەنگىزۋ جوسپارلانىپ وتىر.
