قازاق ۇلتتىق ونەر ۋنيۆەرسيتەتىنىڭ «شابىت» عيماراتىندا «رۋحاني جاڭعىرۋ» باعدارلاماسى اياسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ «وزگەرىستەردى وزىڭنەن باستا» ىشكى باعدارلاماسى شەڭبەرىندە اقىندار وڭايگۇل تۇرجان, جادىرا بايبۇلانوۆا جانە جازۋشى-دراماتۋرگ روزا مۇقانوۆامەن شىعارماشىلىق كەزدەسۋ ءوتتى. جۇزدەسۋدى اتالمىش اگەنتتىك جازۋشىلار وداعىنىڭ استانا قالالىق فيليالىمەن بىرلەسىپ ۇيىمداستىردى.
«بۇرىن اقىندارمەن, جازۋشىلارمەن, كەشەگى قازاق ادەبيەتىنىڭ كلاسسيكتەرىمەن ەل-ەلدە, جەر-جەردە كەزدەسۋلەر ءجيى ۇيىمداستىرىلاتىن. قازىر بۇل ءداستۇر كەنجەلەپ قالدى. جويىلۋعا دا شاق قالدى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى باسشىمىز اليك شپەكباەۆتىڭ باستاماسىمەن بۇل ءداستۇردى جاڭعىرتىپ وتىر. سەبەبى قالامگەرلەر ەلدى ءبىر اۋىز سوزبەن اۋزىنا قاراتىپ, تاربيە بەرىپ, وقىرماندارعا جاعىمدى اسەرلەر سىيلايدى» دەدى كەزدەسۋدىڭ تىزگىنىن ۇستاعان اگەنتتىكتىڭ جۇرتشىلىقپەن بايلانىس جونىندەگى دەپارتامەنتىنىڭ ديرەكتورى ارمان بەردالين.
بۇگىنگى قوعامدا رۋحاني بايلىقتىڭ الدىنا ماتەريالدىق بايلىق شىقتى. مەملەكەتتىك قىزمەتكەرلەردىڭ ءىسى ءبىر باسقا, كەزىندە حالىققا ىقپالى كۇشتى بولعان قالامگەرلەردىڭ ءىسى ءبىر باسقا بولىپ كەتتى. وقىرماندار مەن اقىن-جازۋشىلاردىڭ اراسىنداعى بايلانىس ناشارلادى. وسى تۋرالى اڭگىمە وربىتكەن وڭايگۇل تۇرجان «رۋحاني جاڭعىرۋ» باعدارلاماسىنىڭ ءمان-ماڭىزىنا توقتالدى.
روزا مۇقانوۆا ستۋدەنتتىك شاعىنداعى قادىر مىرزا ءالى, فاريزا وڭعارسىنوۆا, بيكەن ريموۆا, حاديشا بوكەەۆامەن كەزدەسۋلەرىنەن اسەر العانىن جەتكىزدى. الدىڭعى تولقىن اعا-اپالارىنىڭ اسىل بەينەلەرىن ەسكە الدى. 20 جىل مەملەكەتتىك قىزمەت ىستەگەنىن ايتا كەلە, بۇل جۇمىستىڭ وڭاي ەمەستىگىن اتاپ ءوتتى.
جازۋشىلار وداعىنىڭ استانا قالالىق فيليالىنىڭ جەتەكشىسى باۋىرجان قاراعىزۇلى كەزدەسۋگە قاتىسقان قالامگەرلەردىڭ شىعارماشىلىعىنداعى ەرەكشەلىكتەرگە توقتالدى. ەمەن-جارقىن جۇزدەسۋگە اينالعان كەشتە وقىرماندار سۇراق قويىپ, ولەڭ وقىلدى.
مەملەكەتتىك قىزمەت ءىستەرى جانە سىبايلاس جەمقورلىققا قارسى ءىس-قيمىل اگەنتتىگى وسىنداي كەزدەسۋدى ايىنا ەكى رەت بەيسەنبى كۇنى وتكىزۋدى ۇيعاردى.
