بيىل «مەكتەپكە جول» قايىرىمدىلىق اكتسياسى ءۇشىن جەرگىلىكتى بيۋدجەتتەن 177 ميلليون 940 مىڭ تەڭگە كولەمىندە قاراجات ءبولىنىپ وتىر. بۇل تۋرالى كەشە «بايتەرەك» حالىقارالىق مەديا-ورتالىعىندا وتكەن ءباسپاسوز-ءماسليحاتىندا استانا قالاسى ءبىلىم باسقارماسى باسشىسىنىڭ ورىنباسارى قاسىمحان سەنعازيەۆ مالىمدەدى.
بارشاعا ايان, «مەكتەپكە جول» جالپىرەسپۋبليكالىق قايىرىمدىلىق اكتسياسى ءبىلىم جانە عىلىم مينيسترلىگىنىڭ باستاماسىمەن جەتى جىلدان بەرى ۇيىمداستىرىلىپ كەلەدى. الەۋمەتتىك باعىتتاعى شارا بيىل «بالاعا مەيىرىم سىيلا!» ۇرانىمەن وتكىزىلىپ وتىر.
ءبىلىم باسقارماسى وكىلىنىڭ ايتۋىنشا, وسى جىلعى ءىس-شارالار قازاقستان رەسپۋبليكاسى بۇۇ بالا قۇقىقتارى تۋرالى كونۆەنتسيانى راتيفيكاتسيالاۋىنىڭ 20 جىلدىعىنا ارنالعان.
بەلگىلى بولعانداي, وتكەن التى جىل ىشىندە استانا قالاسىندا «مەكتەپكە جول» اكتسياسى اياسىندا 23 000-نان اسا بالاعا 208 ميلليون 329 مىڭ تەڭگە كولەمىندە ماتەريالدىق كومەك كورسەتىلىپتى. ونىڭ ىشىندە 167 ميلليون 305 مىڭ تەڭگە بيۋدجەت ارنايى قوردان الىنسا, 39 ميلليون 700 مىڭ تەڭگە شاماسىنداعى قاراجات مەتسەناتتار تاراپىنان جۇمسالعان. بۇل قاتاردا «نۇر وتان» پارتياسىنىڭ جەرگىلىكتى وكىلدىگى, ءدىن ىستەرى اگەنتتىگى, «قازترانسگاز» اق, «اليانس بانك» اق, «تسەسنا بانك» اق, سونىمەن بىرگە, «كZ» جانە «دار» قوعامدىق قورى مەن استانا قالاسىنىڭ ورتالىق بازارى دا اكتسياعا تۇراقتى قولداۋ كورسەتىپ كەلەدى.
ءبىلىم باسقارماسى باسشىسىنىڭ ورىنباسارى مالىمدەگەندەي, بۇل اكتسيا بالالاردىڭ تەگىن ءبىلىم الۋ قۇقىن جۇزەگە اسىرۋ ماقساتىندا قولعا الىنعان. ويتكەنى, تۇرمىس تارشىلىعىنا كەپ تىرەلەتىن ءارتۇرلى سەبەپتەرمەن مەكتەپكە بارا الماي قالىپ جۇرگەن بالالار بارشىلىق. سوزىمىزگە دالەل: ءبىر عانا 2013 جىلى ءبىلىم جانە ىشكى ىستەر سالاسى ماماندارىنىڭ ارنايى رەيد جۇرگىزۋى بارىسىندا جاعالاي قاراپ وتكەن 65 847 پاتەردىڭ وزىنەن مەكتەپكە بارماعان, مەكتەپ جاسىنداعى ەكى بالا انىقتالعان. قايىرىمدىلىق شاراسى اياسىندا ول بالالار قاجەتتى وقۋ قۇرالدارى مەن مەكتەپ كيىمدەرىمەن قامتاماسىز ەتىلىپ, مەكتەپكە بارا باستادى.
جالپى 2013 جىلدىڭ وزىندە كوپ بالالى, الەۋمەتتىك جاعىنان از قامتىلعان, سونداي-اق اسىراۋشىسى جوق 6256 بالاعا جانە 250 مۇگەدەك بالاعا 23 ميلليون تەڭگە شاماسىندا كومەك كورسەتىلگەن.
سونىڭ ىشىندە, 2013 جىلى جەرگىلىكتى بيۋدجەتتەن ورتا ءبىلىم الىپ جۇرگەن جاعدايى تومەن بالالار ءۇشىن 169 ميلليون 345 مىڭ تەڭگە بولىنسە, 2014 جىل ءۇشىن 177 ميلليون 940 مىڭ تەڭگە كولەمىندە قاراجات ءبولىنىپ وتىر.
بيىل ءداستۇرلى تۇردە 1 تامىز كۇنى باستالعان «مەكتەپكە جول» اكتسياسى 30 قىركۇيەككە دەيىن جالعاسادى. قالاداعى ايالدامالار مەن كوپشىلىك ورىنداردا شارا جونىندەگى قۇلاقتاندىرۋلار ءىلىنىپ, ءۇش اۋدان مەن ساياجايلاردا دا رەيد جۇرگىزىلەدى. ال ءىرى ساۋدا ورىندارىندا شارانى ىسكە اسىرۋ ماقساتىندا ارنايى بۋتيكتەر قىزمەت ىستەپ, №13, 45, 55 مەكتەپتە ايىنا ەكى رەت حالىققا كەڭەس وتكىزىلەدى.
مەكتەپ مۇعالىمدەرى, اتا-انالار, ءبىلىم باسقارماسى مەن ىشكى ىستەر باسقارماسى وكىلدەرى قاتىسقان كەشەگى جيىندا قايىرىمدىلىق اكتسياسىنىڭ العاشقى سىيلىقتارى تاراتىلدى. بيىل مەكتەپ تابالدىرىعىن اتتاعالى وتىرعان بۇلدىرشىندەرگە 18 مىڭ تەڭگە كولەمىندەگى قاراجاتقا مەكتەپ قۇرالدارى ۇلەستىرىلدى.
ءنازيرا سايلاۋقىزى
