كەشە استانادا جالپى ءبىلىم بەرەتىن پاندەر بويىنشا 9-11-سىنىپ وقۋشىلارىنا ارنالعان رەسپۋبليكالىق وليمپيادانىڭ III قالالىق كەزەڭى باستالدى.
وليمپيادا «ءبىر قاتىسۋشى – ءبىر كومپيۋتەر – ءبىر كامەرا» قاعيداسىمەن پروكتورينگ جۇيەسىن قولدانۋ ارقىلى رەسپۋبليكا بويىنشا ءبىر مەزەتتە باستالدى.
استانا قالاسى بويىنشا 3205 بالا قاتىستى. قالالىق كەزەڭگە ەڭ كوپ ۇپاي جيناپ, جۇلدەلى ورىندارعا يە بولعان 1220 بالا ءوتتى. وعان دارىندى بالالارعا ارنالعان مامانداندىرىلعان مەكتەپتەرمەن, رەسپۋبليكالىق جانە حالىقارالىق وليمپيادالارىنىڭ جەڭىمپازدارى قوسىلعاندا بارلىعى 1582 وقۋشى قالالىق كەزەڭگە قاتىسىپ جاتىر.
وقۋشىلار وليمپياداسى 13-18 اقپان ارالىعىندا وتەدى.
«مەكتەپ وقۋشىلارىنىڭ ينتەللەكتۋالدىق دامۋىنا باعىتتالعان مۇنداي پاندىك وليمپيادالاردى وتكىزۋدەگى نەگىزگى ماقساتىمىز – جاس زيالىلاردى انىقتاپ, ولارعا قولداۋ كورسەتۋ. سونىمەن قاتار, ءتۇرلى دەڭگەيدەگى زياتكەرلىك سايىستاردا جوعارى ساپالى ونەر كورسەتۋ ءۇشىن وليمپيادالىق رەزەرۆتى قالىپتاستىرۋ. ەلوردالىق وقۋشىلارعا رەسپۋبليكالىق وليمپيادانىڭ قالالىق كەزەڭىندە ساتتىلىك تىلەيمىن» دەدى ءبىلىم باسقارماسىنىڭ باسشىسى قاسىمحان سەنعازىەۆ وليمپيادانىڭ اشىلۋىنا ارناعان سوزىندە.
