قادىرلى مۇسىلمان باۋىرلار! ايلاردىڭ سۇلتانى ءارى كۇللى مۇسىلمان بالاسى ءۇشىن قاسيەتتى رامازان ايىمەن قيماي قوشتاساتىن كۇن دە تاياپ قالدى. ەلىمىزدەگى بارشا مۇسىلمان قاۋىم شىلىڭگىر شىلدەنىڭ ىستىعىنا قاراماستان پارىز بولعان ورازاسىن ۇستاپ, ءتۇنىن تاعات-قۇلشىلىقپەن وتكىزدى.
ناۋرىزباي قاجى وتپەنوۆ,
قمدب-نىڭ استانا قالاسى بويىنشا وكىلى, «نۇر استانا» ورتالىق مەشىتىنىڭ باس يمامى:
مۇباراك ايدىڭ ايرىقشا مەرەكەسى
شىنىندا, رامازان – قۇلشىلىق, سابىر, بەرەكە, مەيىرىم, راحىم, قايىرىمدىلىق ايى. مىنە, وسى ايدا ساۋاپ الۋ ماقساتىمەن كوپتەگەن مۇسىلمان باۋىرلارىمىز جەر-جەردەگى ۇلكەندى-كىشىلى قايىرىمدى ىستەرگە حال-قادىرىنشە اتسالىسىپ, رامازان ايىن حالىقتىق دەڭگەيدە وتكىزۋگە ءوز ۇلەستەرىن قوسا ءبىلدى. ەل مۇسىلماندارى رامازان ايىنىڭ ەرەكشەلىگىن سەزىنىپ, ءبىر اي بويى رۋحاني جىگەرگە بولەنە الدى.
اللا ەلشىسىنىڭ (س.ا.س) ساحيح حاديستەرىندە ايت مەيرامىنا تاماق جەپ, سۋسىن ءىشۋ, اللانى ەسكە الۋ, قوناق كۇتۋ, سىرقات مۇسىلمانداردىڭ كوڭىلىن سۇراۋ مەن جوق-جىتىك, كەمباعالدارعا ساداقا بەرۋ ءتان ەكەندىگى ايتىلعان. ولاي بولسا, ايت كۇندەرىن ىزگى امالدارىمىزدى كەمىتپەستەن كوتەرىڭكى مەرەكەلىك كوڭىل-كۇيمەن جانە باسقا دا ساۋابى مول ىستەرمەن وتكىزگەن ماقۇل.
پايعامبارىمىز (س.ا.س) مەككەدەن مەدينەگە قونىس اۋدارعاندا, جەرگىلىكتى حالىقتىڭ مەيرامداپ, كوڭىل كوتەرىپ جۇرگەنىن كورىپ: «بۇل قانداي مەرەكە؟» دەپ سۇراعاندا, ولاردان: «بۇل – ءبىزدىڭ يسلامعا دەيىنگى تويلاپ كەلە جاتقان مەرەكەمىز», – دەگەن جاۋاپ ەستىدى. سوندا اللا ەلشىسى (س.ا.س): «اللا سىزدەرگە مۇنان دا ۇلىق ەكى مەرەكە بەردى. ولار – رامازان جانە قۇربان ايتتارى!» – دەپ, وسى ەكى يسلامي مەيرامداردىڭ ۇلىق ەكەندىگىن سەزدىرگەن.
ايتتىڭ وزىنە لايىق جاراسىمدى دا ساۋابى مول امالدارى جەتەرلىك. سول تاڭدا ەرتە ويانىپ, عۇسىل قۇيىنىپ, دارەت الىپ, تازا, جاڭا كيىم كيىپ, جۇپار ءيىس سەۋىپ, ايت نامازىنا قاتىسۋ – سۇننەت.
ايت مەرەكەسىندە اتا-انا مەن قاريالارعا سالەم بەرىپ, باتاسىن الۋ, سىرقات كىسىلەردىڭ ۇيىنە (اۋرۋحاناعا) زيارات ەتىپ, كوڭىلىن سۇراۋ دا ىزگى امالدار قاتارىنا جاتادى.
ورازا ايت مەرەكەسىنىڭ باعدارلاماسى
قاسيەتتى ايدىڭ قۋانىشىن سۇيىنشىلەيتىن ورازا ايت كۇندەرى ەلوردا مەشىتتەرىندە ءتۇرلى شارالار ۇيىمداستىرىلماق. اتاپ ايتساق, 28 شىلدە كۇنى ساعات 06:00-06:30 ارالىعىندا قاسيەتتى قۇران اياتتارى وقىلىپ, 06:30-07:00 ارالىعىندا ورازا ايتىنا ارنالعان مەرەكەلىك ۋاعىز ايتىلىپ, ايت نامازىنىڭ وقىلۋ ەرەكشەلىگى باياندالادى. ساعات 07:00-دە مەرەكەلىك ورازا ايت نامازى وقىلادى. ەلوردالىق مۇسىلماندارعا مەرەكەلىك كوڭىل-كۇي سىيلاۋ ماقساتىندا ساعات 10:00-دەن باستاپ باس شاھارداعى «نۇر استانا», «ازىرەت سۇلتان» جانە «س.عىلماني» مەشىتتەرىنىڭ اۋلالارىنا كيىز ۇيلەر تىگىلىپ, مەرەكەلىك داستارقان جايىلادى. سونداي-اق, قازاقي داستۇرىمىزگە ساي ۇلتتىق سپورتتىق ويىنداردان جارىستار وتكىزىلىپ, ءان-تەرمەلەر جىرلانىپ, مادەني ءىس-شارالار ۇيىمداستىرۋ جوسپارلانۋدا. بارشا ەلوردالىق مۇسىلمانداردى مەرەكەلىك ايت نامازىنا قاتىسىپ, مادەني شارالاردى تاماشالاۋعا شاقىرامىز.
ارازداسىپ قالعان كىسىلەرمەن تاتۋلاسىپ, قاتىناس ۇزىلگەن تۋىستاردىڭ ۇيلەرىن ارالاۋدىڭ دا ماڭىزى ەرەكشە. ويتكەنى, اللا تاعالا: «سەن, كەشىرىم جولىن ۇستان, جاقسىلىققا بۇيىر, ناداندىقتان بەت بۇر» («اعراف» سۇرەسى, 199-ايات) دەپ مۇمىندەردى بارىنشا كەشىرىمدى بولۋعا ۇندەگەن. كوڭىلى جابىرقاۋ, قامقورلىققا مۇقتاج جاندار مەن جوق-جىتىكتەر ايت كۇندەرىندە كوبىرەك كومەك-قولداۋ, ساداقا كۇتىپ, دامەتەرى حاق. سوندىقتان دا مۇنداي جاندارعا قايىر-ساداقا ۇلەستىرىپ, كوڭىلدەرىن اۋلاعان ابزال.
ورازا ايت ادامداردى باۋىرمالدىلىق پەن كىشىپەيىلدىلىككە, كەشىرىمدىلىك پەن سۇيىسپەنشىلىككە شاقىرادى. بۇل كۇندەرى ءۇي-ۇيدە مەرەكەلىك داستارقان جايىلىپ, تۋعان-تۋىس, دوس-جاران, كورشى-قولاڭ ءبىر-ءبىرىن ارالاپ, ءدام تاتىسىپ, مارە-سارە بولادى.
ەل مۇسىلماندارىن ۇلتارالىق كەلىسىم مەن دىنارالىق توزىمدىلىكتى ودان ءارى دە نىعايتۋعا, سۇيىكتى وتانىمىزدى وركەندەتۋ مەن ونىڭ مادەني, رۋحاني قۇندىلىقتارىن ساقتاپ, دامىتا تۇسۋگە مۇنان بىلاي دا كۇش-جىگەرىن اياماي جۇمساي بەرۋگە شاقىرامىز. بىزدەگى بۇگىنگى ءوزارا سىيلاستىق پەن جاراسىمدىلىق, ىنتىماقتاستىق پەن دىندەرگە دەگەن قۇرمەت – باستى ماقساتىمىز بولىپ قالا بەرمەك. ءبىز بۇل جەتىستىكتەرىمىز ءۇشىن اللا تاعالاعا سانسىز ماداق ايتىپ, شۇكىرلىك ەتۋگە ءتيىسپىز.
قۇرمەتتى اعايىن! بارشاڭىزدى ەڭ قاسيەتتى دە ۇلىق مەرەكە – ورازا ايت مەيرامىنىڭ كەلۋىمەن شىن جۇرەكتەن قۇتتىقتايمىن! مۇسىلمان بالاسىن قۋانىشقا بولەيتىن بۇل مەيرام ەلىمىزگە, جەرىمىزگە قۇت-بەرەكە مەن ىنتىماعىن, ىرىسى مەن بەرەكەسىن الا كەلسىن دەپ تىلەيمىز. اللا تاعالا بارشامىزدىڭ ۇستاعان ورازامىزدى بەن جاساعان قۇلشىلىق-عيباداتتارىمىزدى جانە ساۋاپتى ىستەرىمىزدى قابىل ەتىپ, كەلەر جىلعى رامازان ايىنا امان-ەسەن جەتۋدى ءناسىپ ەتكەي. حالقىمىزدىڭ ىنتىماق-بىرلىگىن ارتتىرىپ, ىرىس-نەسىبەسىن ادالىنان مولايتقاي! دىنىمىزگە قۋات, حالقىمىزعا يمان بايلىعىن بەرگەي! ءاۋمين!
