استانا قالاسى اكىمدىگىنىڭ مەديا ورتالىعىندا وتكەن جيىندا ەلوردا يمامدارى رامازان ايىنىڭ قادىر-قاسيەتى, ءپىتىر ساداقا مولشەرى, ورازا ايت نامازى مەن باسقا دا اتقارىلاتىن ءىس-شارالار تۋرالى كەڭىنەن مالىمدەدى.
ىزگىلىككە شاقىرعان ۇندەۋ
رامازان ورازاسىن ۇستاعان ادام وسى كۇنگە دەيىنگى بۇكىل كۇنالارىنان تازارادى دەلىنگەن حاديستە. ويتكەنى بۇل ايدا ادامزاتتىڭ حاس جاۋى – شايتان كىسەندەلىپ, بىزگە جاقسىلىققا وزگەرۋگە, اعايىن-تۋىستىڭ جۇرەگىنە ىزگىلىكتىڭ ءدانىن ەگۋگە زور مۇمكىندىك تۋادى. قاسيەتتى رامازان ايى قارساڭىندا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجىۇلى حالىققا ۇندەۋ جاريالادى. ول ەڭ الدىمەن اقتوبە, اقمولا, سولتۇستىك قازاقستان وبلىستارىنداعى تابيعي تاسقىننان زارداپ شەككەن وتانداستارىمىزعا قولداۋ ءبىلدىرىپ, جومارت جانداردى قايىرىمدىلىق كورسەتۋگە شاقىردى.
«اسىل ءدىنىمىز يسلامدا «ساداقا جاريا» دەگەن ۇعىم بار. قوعامنىڭ, حالىقتىڭ يگىلىگى ءۇشىن جاسالعان ساۋاپتى ىستەردى, اتاپ ايتقاندا, مەشىت-مەدرەسە, اۋرۋحانا, بالاباقشا, سپورت كەشەندەرىن تۇرعىزۋ, كوپىر سالۋ, اۋىزسۋى جوق اۋىلدارعا سۋ تارتىپ, قۇدىق قازۋ سەكىلدى يگى ىستەردى ايتامىز. مىنە, بۇل ىزگى ءىس-شارالار حالىقتىڭ يگىلىگى ءۇشىن جاسالعان ساۋاپتى امالدار بولىپ تابىلادى. رامازان – قايىرىمدى جاندار ءۇشىن مول مۇمكىندىكتەر ماۋسىمى. مەتسەناتتار مەن كاسىپكەر ازاماتتاردى جالپى جۇرتشىلىققا قاجەتتى نىساندار تۇرعىزۋ جۇمىستارىنا جاناشىرلىق تانىتۋعا شاقىرامىن» دەلىنگەن ۇندەۋدە. سونىمەن قاتار قوعامداعى كىسى اقىسىن جەۋ, بالانى اياۋسىز ۇرۋ, نارەستەنى دالاعا تاستاۋ, ءوز-وزىنە قول جۇمساۋ, اجىراسۋ سەكىلدى ادامگەرشىلىككە جات ارەكەتتەرمەن بىرىگىپ كۇرەسۋ قاجەتتىگىن العا تارتادى.
ءپىتىر ساداقا – 300 تەڭگە
استانا قالاسىنىڭ باس يمامى ناۋرىزباي تاعانۇلىنىڭ ايتۋىنشا, رامازاننىڭ كۇنىندە دە, تۇنىندە دە اللاعا الاقان جايعان ادامنىڭ ەشبىر تىلەگى قايتارىلمايدى. ءتىپتى, قۇنى 83 جىلعا تەڭ كەلەتىن ادامنىڭ ءبىر جىلدىق نەسىبەسى, قادىر ءتۇنى دە وسى ايدىڭ ىشىندە جاسىرىلعان.
«شاريعات جاعىنان ايتار بولساق, ورازا ايىندا ادام تەك ءىشىپ-جەۋدەن عانا ەمەس, بارلىق نارسەدەن تىيىلادى. استانا قالاسى بويىنشا ەڭ ۇزاق ورازا – ماۋسىمنىڭ 24-ءى. ياعني, ەڭ سوڭعى ورازا كۇنىنىڭ ۇزاقتىعى – 18 ساعات, 37 مينۋت. حالقىمىز 25, 26, 27 ماۋسىم كۇندەرى ورازا ايت مەرەكەسىن اتاپ وتەدى. ال ورازا ايت نامازى 25 ماۋسىم كۇنى تاڭعى ساعات 7:00-دە ەلوردانىڭ سەگىز مەشىتىندە وقىلادى» دەيدى «نۇر استانا» مەشىتىنىڭ باس يمامى ناۋرىزباي وتپەنوۆ. سونىمەن, بيىل بەرىلەتىن ءپىتىر ساداقا مولشەرى قازاقستان بويىنشا جان باسىنا شاققاندا 300 تەڭگەنى قۇرادى. ياعني, ونىڭ مولشەرى بيدايدىڭ باعاسىمەن الىنعان. يمامداردىڭ پىكىرىنشە, ساداقانى شاريعاتىمىزعا ساي باسقا دا ونىمدەردەن, اتاپ ايتقاندا, قۇرما, مەيىز, ارپادان دا بەرۋگە بولادى.
«باس ءمۇفتي ەرجان قاجى مالعاجىۇلى قاسيەتتى رامازان ايى قارساڭىندا حالىققا جولداعان ۇندەۋىندە وتانداستارىمىزدى ىزگىلىك جولىنا شاقىردى. ەلىمىزدىڭ جومارت ءارى كاسىپكەر ازاماتتارىن مۇقتاج ادامدارعا قامقورلىق كورسەتۋگە, اپات سالدارىنان زارداپ شەككەن ەلدى مەكەندەرگە كومەك كورسەتۋگە ۇندەدى. تابيعات اپاتىنان زارداپ شەككەن اۋىلداردىڭ جولىن, ۇيلەرىن جوندەپ بەرسە, سانسىز ساۋاپقا بولەنەتىنى بەلگىلى» دەيدى ناۋرىزباي قاجى.
تەگىن اۋىزاشار بەرىلەدى
رامازان ايىندا قولعا الىنعان يگى ءىستىڭ ءبىرى – قوعامدىق كولىك ماسەلەسى. ەلوردانىڭ باستى مەشىتتەرىندە تاراۋيح نامازىنان كەيىن حالىقتى ۇيلەرىنە جەتكىزۋگە ارنالعان تەگىن قوعامدىق كولىك قىزمەتى ۇيىمداستىرىلماق ەكەن. «بيىل ورازا ايى ەلىمىز ءۇشىن ايتۋلى «ەكسپو-2017» كورمەسىمەن سايكەس كەلىپ وتىر. بۇيىرسا, كوپتەگەن شەتەلدىك قوناقتار كەلەدى. ءبىز دە ءوز تاراپىمىزدان مەشىتتەردى دايىنداۋدامىز» دەيدى «نۇر استانا» مەشىتىنىڭ باس يمامى ناۋرىزباي وتپەنوۆ.
رامازان ايىندا بارلىق مەشىتتەردە قۇپتان ۋاقىتىندا تاراۋيح نامازى وقىلادى. ءبىر اي بويى جالعاساتىن كەشتە قۇران كارىم تولىق جاتقا ايتىلادى. ونى وتاندىق جانە شەتەلدىك قاريلار جۇرگىزەتىن بولادى. تاعى ءبىر ايتا كەتەرلىگى, قالا مەشىتتەرىندە كۇندەلىكتى بۇقارا حالىققا تالون تاراتۋ ارقىلى تەگىن اۋىزاشار ۇيىمداستىرىلادى. استانا مەشىتتەرىندە كۇن سايىن 1600 ادامعا تەگىن اۋىزاشار بەرىلەدى. ال 22 ماۋسىم كۇنى 10 مىڭنان استام ادامعا سارەسى بەرۋ كوزدەلۋدە.
جاقسىلىق جاساپ جارىسقان ءجون
جالپى, رامازان ايى – ءىشىپ-جەۋدەن عانا ەمەس, ادامدى رۋحاني ورلەۋگە, سابىرلىققا, توزىمگە تاربيەلەيتىن قاسيەتتى اي. ەلوردا يمامدارى بۇل ايدا جاساعان جاقسىلىقتىڭ ساۋابى ەسەلەنەتىنىن ايتادى.
«ەل ازاماتتارىن مۇقتاج جاندارعا, جاعدايى تومەن وتباسىلارعا جاردەم بەرۋگە شاقىرامىز. وسى ايدا بەرىلگەن ساۋاپ ەسەلەنەدى. وسى ايدا وتەلگەن ءبىر پارىزدىڭ 70 پارىزعا تەڭ قاسيەتى بار. بارلىق تىلەك قابىل بولاتىن ايدا اللادان ەلىمىز, حالقىمىز, جۇرتىمىز ءۇشىن تىلەك تىلەيىك. كورمە كەزىندە كەلەتىن قوناقتاردى بارىنشا جوعارى دەڭگەيدە قارسى الىپ, مادەنيەتتىلىگىمىزدى, بىلىمدىلىگىمىزدى, ەڭ باستىسى, مۇسىلماندىعىمىزدى كورسەتەيىك» دەيدى «ازىرەت سۇلتان» مەشىتىنىڭ نايب يمامى باقىتجان وتكەلباەۆ.
«سادۋاقاس قاجى عىلماني» مەشىتىنىڭ باس يمامى جۇمانازار سادىرحانوۆ سوڭعى كەزدەرى ورازا ۇستاۋشىلاردىڭ قاتارى كوبەيىپ كەلە جاتقانىن العا تارتتى. اسىرەسە, جاستاردىڭ يماندىلىققا كوپتەپ كەلۋى, ولاردى ارمەن قاراي ءتۇزۋ جولعا باعىتتاۋ ءۇشىن اتقارىلىپ جاتقان جۇمىستار جالعاسا بەرەتىنىن دە ايتتى.
گۇلميرا ايماعانبەت
