ەلوردالىق ارداگەرلەر قوزعالىسىنىڭ بەلسەندى وكىلدەرىنىڭ قاتىسۋىمەن القالى جيىن ءوتتى. بۇل باسقوسۋعا استانا قالاسى اكىمىنىڭ ورىنباسارى ەرمەك امانشاەۆ, «ارداگەرلەر ۇيىمى» رەسپۋبليكالىق قوعامدىق بىرلەستىگى توراعاسىنىڭ ورىنباسارى ومىرزاق وزعانباەۆ قاتىستى.
استانا قالاسى ارداگەرلەر كەڭەسىنىڭ توراعاسى سانسىزباي ەسىلوۆ بايانداما جاساپ, اتقارىلعان جۇمىستار بارىسىنا توقتالدى. «بىزدەر اعا ۇرپاقتىڭ ماڭداي تەرى مەن ەسەلى ەڭبەگىن جوققا شىعاراتىنداردىڭ قاتارىنان ەمەسپىز. سول سەبەپتى دە, ارداگەرلەرىمىز قارياسىن قازىناعا تەڭەگەن قوعامنىڭ قۇرمەتىنە بولەنىپ وتىر» دەپ ءسوزىن باستادى بايانداماشى.
جالپى العاندا, تۇرعىنداردىڭ ورتاشا ءومىر ءسۇرۋ جاسى بۇگىندە جەتپىس ەكى جاسقا جەتىپ وتىر. بۇل – ەلىمىزدىڭ الەۋمەتتىك-ەكونوميكالىق احۋالىنىڭ ىلگەرى وزعاندىعىنىڭ دا بەلگىسى. ارداگەرلەردىڭ ومىرلىك تاجىريبەسىمەن ءبولىسىپ, قوعام ومىرىنە تارتۋعا ارقاشان قولداۋ كورسەتىلۋدە. قالا بويىنشا 338 باستاۋىش ۇيىمعا بىرىگىپ وتىرعان ارداگەرلەر جاس ۇرپاقتى بيىك رۋحتا تاربيەلەۋدە كوپ مىندەتتەردى موينىنا العان. وتكەن جىلى 360 قوعامدىق-مادەني شارالار وتكىزىلىپ, التى مىڭعا تارتا زەينەتكەر تارتىلعان.
سوڭعى ون جىل ىشىندە ۇلى وتان سوعىسى ارداگەرلەرىنە 320 پاتەر, تىل جانە ەڭبەك ارداگەرلەرىنە 136 پاتەر بەرىلگەن. دەمەۋشىلەردىڭ كومەگىمەن ارداگەرلەر تۇراتىن 164 پاتەر كۇردەلى جوندەۋدەن وتكىزىلگەن. زەينەتكەرلەرگە قوعامدىق كولىكتەردە تەگىن جۇرۋگە جاعداي جاسالعان. جەرگىلىكتى اتقارۋ ورگاندارىنىڭ الەۋمەتتىك-مەديتسينالىق قولداۋ كورسەتۋ باعدارلامالارى بويىنشا دا جۇمىستار اتقارىلۋدا. وتكەن جىلى استانالىق 5000 زەينەتكەرگە كوممۋنالدى تولەمدەردى تولەۋگە جەڭىلدىك قاراستىرىلىپ, وسىنشاما قارتتارعا ازىق-تۇلىكتەي كومەك كورسەتىلگەن. 700-گە تارتا زەينەتكەر مەرزىمدى باسپاسوزگە تەگىن جازىلىپ وتىر. وتكەن جىلى قارتتار كۇنىنە ورايلاستىرىلىپ, قالا بيۋدجەتىنەن 72 036 زەينەتكەرگە ءبىر مەزگىلدىك 5 مىڭ تەڭگە بولىنگەن.
ايگۇل ۋايسوۆا,
«استانا اقشامى»
