وتكەن جەكسەنبىدە ەلوردا تۇرعىندارى مەن قوناقتارى حالىقارالىق وتباسى كۇنىن استانالىق پاركتە اتاپ ءوتتى. وسى كۇنى جەتى كوماندا كوڭىلدى جارىستاردا باسەكەگە ءتۇستى.
سپورتتىق مەرەكەگە بالالار مەن ەرەسەكتەر قاتىستى. اتا-انالار مەن بالالار ەپتىلىك پەن جىلدامدىق قابىلەتتەرىن كورسەتەتىن جارىستاردا سىنعا ءتۇستى. كوڭىلدى ستارت باعدارلاماسىنا اسىق اتۋ مەن ارقان تارتۋ سياقتى ۇلتتىق ويىندار دا ەندى.
– حالىقارالىق وتباسى كۇنى 1993 جىلى بەكىتىلىپ, جىل سايىن 15 مامىردا اتالىپ وتىلەدى. ءبىز وتباسىلىق جارىستار, ساياحاتتار جانە ت.ب وتكىزەمىز. بۇل جولى مەرەكە ساياباقتا جاتتىعۋ جاساۋدان باستالدى. سودان كەيىن كەزەك جارىستارعا بەرىلدى, – دەدى استانا قالاسى سالاۋاتتى ءومىر سالتىن قالىپتاستىرۋ ورتالىعىنىڭ ديرەكتورى اقمارال قۇرمانباەۆا.
ادەنوۆتەر اۋلەتى وسى سياقتى بۇقارالىق شارالارعا بۇكىل وتباسىمەن قۋانا قاتىسادى. ولار بۇگىن دە تىس قالعان جوق.
– ادەتتەگىدەي, بۇكىل وتباسىمىزبەن كەلدىك. ءار دەمالىس سايىن تازا اۋاعا شىعىپ وتىرۋعا تىرىسامىز, قالالىق ساياباقتاردا ۇيىمداستىرىلاتىن ويىن-ساۋىقتارعا قاتىسىپ جۇرەمىز. وسىنداي قىزىقتى سپورتتىق جارىستار وتكىزۋ – تاماشا يدەيا, مۇنداي شارالاردى ءجيى ۇيىمداستىرعان دۇرىس, – دەپ اسقار ادەن ءوز پىكىرىمەن ءبولىستى.
استانالىق پاركتە 8 مامىردان باستاپ دەمالىس كۇندەرى اشىق اسپان استىندا بۇقارالىق سپورتتىق جانە فيتنەس جاتتىعۋلار جاساۋ ۇيىمداستىرىلىپ كەلەدى. تاجىريبەلى نۇسقاۋشىلاردىڭ جەتەكشىلىگىمەن يوگا, زۋمبا جانە كروسسفيتتەن ساباق الۋعا بولادى.
